Read Cuvok 2 Kweriŋtiye hay 10 Bible Online

2 Kweriŋtiye hay 10 - Cuvok bible

2 Kweriŋtiye hay 10

¹Yey Pawl, ava yaŋ taaɗaw ana, ya nəkafakwar jaka pa makwaɗma va mambəla ana te Kəristi. Yey masa ndana hay ece gweɗey daha ya da varakwar sə, ya makwaɗma, amaa daha ye dəreŋ ava akwar sə, ya ɓaɓəcakwar meeɓeɓəcey.

²Ara nesey, ya ŋgakwar mbahw, mambəla sə, maŋgwada rav takwar, afa daha ya ka ta husata varakwar sə, akwar te tetəkiyey ka ta ɓaɓəcakwar bay. Ndah dərziya dapa taɓa takwar aca wulakiya, anda ŋgə mezlər sə, ta maŋgat jene ara ndah ta vavara. Kad ndah ana ŋgesey sə, ye te ɓeɓəcec meeɓeɓəcey.

³Eve metehwe ana, andaw ndah ta vavara, amaa anda ŋgə vəram ava jə ta vəram ta vavara aabay.

⁴Dapa vəram taciya sə, anda ŋgə mezlər ava jə ta vəram hay masa ta vavara sə, aabay, amaa ava jə ta vəram hay ta Zlavay masa ac ava gədaŋ. Jən ana hay ŋgesey, ac ava gədaŋ ta mambəɗa way hay masa ac ava gədaŋ sə, avəda. Anda zə mawulak yaŋ hay mambəla ana aabay sə, ava aŋga,

⁵va mambaɗ gədaŋ ta magal yaŋ hay fakwanay masa ece recen ma ta ndana hay ta masən Zlavay. Anda ŋgwedecen mawulak yaŋ tec hay fakwanay aca ra nahda yaŋ kad pa ma te Kəristi,

⁶va andaw maləmada te metəɗec ma yaŋ ndah masa aca gwam ka nahda yaŋ tec bay, pas masa akwar te ŋguzdek manah yaŋ takwar fakwanay.

⁷Mawala jeŋ ana hay nesey eve ndey takwar. Daha ndana a kəsiya dapa yaŋ tata aŋga sə, aŋga nda te Kəristi, a da wulaka mambəla ana fa ma nesey: Andaw may, andaw ndah te Kəristi ara aŋga ana.

⁸Bay Mazlakava ka vandaw gədaŋ ta magal ndah takwar, bəna ta makwakwaciya bay. Kwa daha ya ŋgə həɓa mabay mafay ana sə, amaa hwar e te kəɗiyey fətiya aabay.

⁹Akwar ta wulakiya, ya ŋgə sə, ya rarəɓakwar eve leeter aɗaw hay bay,

¹⁰afa ndah dərziya, gege: «Leeter hay ta Pawl sə, ece ŋgə bay, ece ɓəs bay. Amaa daha aŋga dapa taɓa tandakwa sə, aŋga bəle, ma tata ana hay, ac ava gədaŋ aabay.»

¹¹Ndah magwaɗa ma ana ara nesey sə, ac da səna mambəla ana, pas masa andaw dəreŋ, anda vindakwar leeter hay masa gədaŋ dapa te meɓəsey. Pas masa andaw varakwar sə, anda ta ŋgiya ara aŋga ana,

¹²afa andaw ava rav ta macacal yaŋ taciya, daha aabay ta malav yaŋ taciya ava ndah dərziya mahahəma yaŋ teceŋ sə, aabay. Aca kəs yaŋ teceŋ ana ara jə ta malav jene hay ka ta ləv yaŋ teceŋ va macacal yaŋ teceŋ ava ndah dərziya. Eceŋ sə, ac ndah marəzla.

¹³Taciya sə, andə ta zlafa meŋgə həɓa masa a da fəna kwakumakw ta həɓa taciya sə, aabay, amaa andaw sə, andə te ŋgə mezlər dapa kwakumakw hay masa Zlav ta ləvandanay, pas masa ka hwadaɗandaw kasl varakwar.

¹⁴Ara masa andə ka husaɗ varakwar aabay heley nesey sə, anda zlaŋda kwakumakw taciya aabay. Eve metehwe ana, andə ka husaɗ macaaca ana kad varakwar ava mahwadakwar Labara mambəla ana te Kəristi.

¹⁵Andaw ava həɓa gaa masa a da fəna kwakumakw masa andə da ŋgə həɓa fe mezlər ta ndah mekele sə, aabay. Anda wulakiya sə, makəsparav takwar e te gəley fəma fəma, masa mezlər taciya dapa taɓa takwar e de gəley mafəna ana saya, amaa fa kwakumakw hay masa Zlav ta pandanay.

¹⁶Ava dəɓa ana, anda zlafa mahwad Labara mambəla ana kad pa vavara hay masa dəreŋ ava akwar. Andə ta zlafa meŋgə mezlər de ley ta ndah masa ac ka həva cay, andə da ŋgə həɓa ava aŋga sə, aabay.

¹⁷Mavinda dapa Ɗelewer mavəna, gege: «Nda masa a wal meŋgə həɓa sə, da ŋgaw mafay ta masa a ŋgə mezlər ta Bay Mazlakava.»

¹⁸Aŋga, eve metehwe ana, nda mambəla ana sə, nda masa Bay Mazlakava ta ŋguzdiya, bəna nda maŋguzda yaŋ tata bay.