Read Cuvok 2 Kweriŋtiye hay 11 Bible Online

2 Kweriŋtiye hay 11 - Cuvok bible

2 Kweriŋtiye hay 11

¹Ara masa ya ta waya sə, mambahw mepiyey sek, kwa daha ya nda marəzla ana. Aŋga, mambahw, mepiyey sek.

²Ya walakwar mabay ava matəhaz rav masa e dek da vara Zlavay. Ya ka səɓaɗakwar ha kad mawal pal amta, ka ta ŋguzadakwar kad Kəristi ara dem dahəla masa a sən mawal bay heley, aŋga mapana.

³Amaa ya ŋgə zidaw gəla ac ta nasakwaɗ leŋgesl va mazlakdakwar ava maŋgal ma hay afa masa akwar da njah macama amta dapa Kəristi ava rav amta bay. Ara masa zezekw ta ŋgiya zleezle ava Hawa

⁴Eve mececeley, daha ndana e dekey, a bəzadakwar ma da yaŋ Yesu mekele, masa aŋga wal ava Yesu masa andaw bəzadakwaɗ nesey, daha aabay daha akwar kəs mesfen masa aŋga wal eve mesfen masa akwar ta kəsiya, daha aabay saya, akwa kəs labara mambəla ana masa aŋga wal ava masa akwar ta cəna, akwa kəsiya war.

⁵Ya wulakiya sə, maslaŋ hay mapana yaŋ tec ka mazlakava hay ŋgesey sə, ece fəniyey aabay.

⁶Aŋga, eve metehwe ana, gəla akwa wulakiya sə, ya maada kwa, amaa te mesen jene da yaŋ Zlavay sə, ŋgesey, jə mekele. Dapa jene hay fakwanay va jaka pe cəv hay mekele mekele andə ka ŋguzdakwaɗay.

⁷Mebər taaɗaw ɓa ta manahda yaŋ aɗaw ka ta baŋgaɗakwar dapa masa ya bəzadakwar Labara mambəla ana ta Zlavay taambəla geyey?

⁸Dapa masa ya ŋgə mezlər kad akwar sə, ya ka njah fa ha ta Macam yaŋ hay ta ndah ta Zlavay dərziya, ya ka kəsaw ece re pəliyey, ya ke ŋgə mezlər ava səlay ana ka ta ŋgə mezlər kad akwar.

⁹Masa ya da varakwar sə, ya ka hwar səlay, amaa kwa ya ka nəkafakwar aabay, afa malamaŋ tandakwa hay medek da Masiduwan, ec ke viyey jene hay masa ya hwariya. Cəɗem cəɗem ya ka wal mayah jene masa a da fənakwar fa gədaŋ sə, aabay, kwa maayaŋ kad fəma nesey, ya ta waya aabay jaŋgata.

¹⁰Jaka pe metehwe ana te Kəristi masa aŋga dapa yey, ya ŋguzdiya eve metehwe ana, kwa ndana ma ta zlafa maraɓawa həɓa ana nesey dapa vavara ta Akay sə, aabay.

¹¹Ye gweɗ ara nesey sə, mafay te mey? Afa ya walakwar bay geyey? Kwa Zlavay ava yaŋ tata, a səniya ya walakwar!

¹²Jə masa ya ŋgiya təlam nesey sə, ya ta ŋgiya saya, afa ndah maslahəɓa hay, macacala yaŋ tec ava andaw sə, ac da ŋgə həɓa sabay.

¹³Ndah ana ŋgesey sə, maslaŋ hay metehwe ana bay, ac ndah maŋgəla ma hay, mapana yaŋ tec ara maslaŋ hay te Kəristi.

¹⁴Ma ana nesey, a rəzla nda aabay, afa Saadan ava yaŋ tata ana, a pə yaŋ tata ka maskəla ta slam mawaɗa.

¹⁵Nesey jə mekusetke ana kad ndah maŋga mezlər tata ka ta pə yaŋ tec ka ndah maŋga mezlər ta Zlavay eve cəvey ana. Mamaɗ yaŋ ta manjah teceŋ sə, a tərata ara mezlər teceŋ ana.

¹⁶Ya vahda magwaɗakwar saya, masa ndana a ta wulakiya, yey sə, ya nda marəzla ana bay. Daha aabay, gəla aca wulakiya ara ŋgesey, makəsaw ya nda marəzla ana, afa yey may, ya da ŋgat meŋgə həɓa kusetke.

¹⁷Ma masa ya ta gwaɗiya nesey sə, ya gwaɗiya ara masa Bay Mazlakava ta waya bay, amaa ye gweɗ ara nda marəzla va nda masa aŋga eve cəv te meŋgə həɓa da yaŋ jene,

¹⁸afa ndana hay gaa aca ŋgə həɓa mafay ta maŋgat jene ara ndah ta vavara. Yaw mambəla ana, yey may, ya ta ŋgə həɓa ara aŋga ana.

¹⁹Akwar masa ndah masəna jene hay, akwa ɓəsec ndah marəzla sə, ava ha.

²⁰Ndana hay aca pakwar ke ɓel hay, aca pəraslakwaɗ jə takwar hay avəda fa gədaŋ, aca kərakwaɗ jə takwar hay avəda, aca pakwar ke jene taambəla, aca kəɗakwar darzləmay. Ava aŋga ana fakwanay, akwa ɓəsiya jaŋgata.

²¹Hwar e kəɗiyey ta magwaɗakwaɗ ma ana, ara andə ka njah bəle hay. Təlam nesey, ye te gweɗey ara nda marəzla, daha ndana a ŋgə həɓa da yaŋ jene, ya ta ŋgiya ara aŋga ana may.

²²Eceŋ sə, ece gweɗ, gege: Ec Ebəre hay biba? Ye Ebəre ana may. Ac Isreyel hay biba? Ye Isreyel ana may. Ac dapa tərsam ta Abəraham biba? Ya dapa tərsam ta Abəraham ana may.

²³Ac ndah maŋga mezlər te Kəristi biba? Ye sə, ye te gweɗ ara nda marəzla, yey sə, ye fənec gaa fakwanay eve mezlər te Kəristi! Ye ke ŋgə mezlər masa gədaŋ dapa ke fəneceŋ, ec ke ɓəzliyey pa daŋgay ke fəneceŋ, ec ke kəlepiyey mabay ke fəneceŋ, ye ke fənec ta manjah dapa makaslafay ta maməcay.

²⁴Zuwef hay ec ke kəlepiyey law kwakwar mahkar dapa yaŋ ana cuɗ ndey zlam.

²⁵Rawma hay ac ke kəɗiyey dəɓa mahkar. Ac ke keliyey eve kekeŋ ndey amta, kaslkaslah ka vərakwata a yaŋ yam ava yey ana ka mahkar, ya ka ŋgə vaɗ amta, pas amta dapa yam.

²⁶Pas mekele, ya ka ŋgway eve sek, ya ka cə yaŋ ava makaslafay ta maməcay da wayam hay, ye mbəlek dapa makaslafay ta makar hay makəɗa nda, dapa makaslafay ta malamaŋ taaɗaw Zuwef hay, va ndah masa Zuwef hay bay, ya ka cə yaŋ ava makaslafay ta maməcay dapa berne, dapa yaŋ ta səɓak, da yaŋ yam mafayakfayak ana, dapa taɓa ta ndah mapana yaŋ tec ka malamaŋ tandakwa hay.

²⁷Ye ke yəvey va masə marga hay mabay, pas mekele ya ka njawaŋ aabay, ya ka ndə jene aabay, ya ka sə jene aabay, pas mekele mayə ke kəɗiyey, pas mekele memeɗ ke kəɗiyey mabay, ya ka ŋgat rəkwat fa vaw aabay.

²⁸Ye ŋgəfec marga hay dərziya aabay, meŋgiyey mahwalhwala ana cəɗem cəɗem sə, mawulak yaŋ da yaŋ ndah dapa Macam yaŋ hay ta ndah ta Zlavay fakwanay.

²⁹Daha ndana aŋga eve bəle sə, bəle tata ana e husefiyey may. Daha ndana ka təɗata pe mebərey sə, e heciyey fa rav mabay ara kwakwaw te ndeliyey.

³⁰Daha a lada ye de ŋgə həɓa sə, ya ta ŋgə həɓa da yaŋ bəle taaɗaw.

³¹Zlavay, Papaŋ ta Bay Mazlakava Yesu a səniya, ya ŋgal ma aabay. Da lada sə, ndana hay aca ra hahəmaw katar ka midakw.

³²Zleezle masa ya dapa berne ta Damas, gwevernel masa maŋga mezler kad bay mazlakava Aretas, ka pə ndana ta maɓal fa ma ta way te berne ana ke te təheziyey.

³³Amaa ec ke telekiyey avəda kad a vəda jaka pe melever te meɗəzley, ya makutakwa dapa waŋ mazlakava ana. Ara nesey, ye mbəlek yaŋ aɗaw kad a vəda.