Read Cuvok 2 Kweriŋtiye hay 12 Bible Online

2 Kweriŋtiye hay 12 - Cuvok bible

2 Kweriŋtiye hay 12

¹Naa zuwan ya ŋgaɓa həɓa la geyey? A jəna nda aabay! Amaa, ye te gweɗ da yaŋ cah hay va maŋguzad jene ta Bay Mazlakava kad yey.

²Ya sən nda makəsparav te Kəristi ɓa, makəsa avəda kad a wudam kasl a baymaləvaŋ, masa ke ŋgə mavay kuraw dapa yaŋ ana faɗ təlam nesey, aŋga dapa vaw tata, daha aabay gəla meshweney, ya səniya bay, amaa masəniya sə, Zlav pal aŋga amta.

³Aŋga, ya səniya masa nda ana, na aŋga dapa vaw tata, daha aabay gəla meshweney, ya səniya bay, amaa Zlav pal aŋga amta sə, a səniya,

⁴Zlav ka kəsa nda ana avəda kasl pa slam ta mambivaw. Dərŋga sə, a cəna ma hay masa kwa ndana aŋga eve cəv ta magwaɗiya aabay.

⁵Mafay ta nda ana ŋgesey, ya zlafa meŋgə həɓa. Amaa taaɗaw ya ta ŋgaɓa həɓa sə, say da yaŋ bəle taaɗaw.

⁶Kwa daha ya wal ma ta ŋgə həɓa sə, ŋgesey, ye te tər ka nda marəzla sə, aabay, ye te gweɗ sə, ma metehwe ana, amaa ya wal maŋgə həɓa bay, afa ndana de peɗiyey kad yaŋ jene masa a wala ya ŋgiya, daha aabay jə masa a cəna ya gwaɗiya sə, bay.

⁷Jə masa Bay Mazlakava ta ŋguzdawa sə, e teh kwa macəkuma bay. Amaa ka paɗ jene pa vaw aɗaw ɓa ara mətak, afa ya da ŋgə həɓa mafay ana bay. Jeŋ ana sə, maskəla ta Saadan, aŋga mapa te mekəɗiyey, afa ya da ŋgə həɓa bay.

⁸Ya ka cə mbahw kad Bay Mazlakava ka mahkar, de mbəliyey avəda dapa ha ta marga ana.

⁹Amaa ke gweɗiyey, gege: «Meŋgə mambəla ana taaɗaw kad kaa sə, makakaa, afa gədaŋ aɗaw mazlakava a ŋgə mezlər dapa kaa ɗahw sə, pas masa ke bəle.» Mafay ana, ya ŋgə həɓa dapa bəle aɗaw ana eve mewesley, afa gədaŋ te Kəristi da njah eve yey.

¹⁰Mafay ana, ye wesley da yaŋ bəle aɗaw hay, kwa daha ndana hay ece lefiyey, kwa dapa marga hay, kwa ndana hay ece yehefiyey ma va maɓəs zidaw hay mafay te Kəristi, afa pas masa ye bəle sə, dapa ŋgesey ana, ya ava gədaŋ ɓa.

¹¹Mawala, ya ka tərata ara nda marəzla, akwar ke tetəkiyey avəda, efes aabay me te ŋguzdek yaŋ aɗaw kad a vəda sə, sesəker akwar! Kwa na daha yey ara jene taambəla, mazlakava takwar hay masa akwa pec ka maslaŋ hay mambəla ana sə, ece fəniyey aabay.

¹²Jə te meɗel hay masa aca tə yaw da yaŋ yey, ya maslaŋ sə, ec ke ŋguzdekey dapa taɓa takwar: Mepəsek aɗaw dapa mecek hay fakwanay, meŋgə cah hay va meŋgə mezlər hay marəzla nda.

¹³Yaw, jene hay mambəla ana masa ye te ŋgec kad Macam yaŋ hay ta ndah ta Zlavay dərziya sə, ya ka ŋgakwaɗ aabay ŋgəɗa geyey? Ara masa ya səniya sə, jene pal amta: Ya ka nəkafakwar te mejəniyey dapa jene hay masa ya waya sə, aabay. Mapəlawa mebərey aɗaw hay!

¹⁴Təlam nesey sə, ya ka ləmada vaw aɗaw ta madaɗ kad varakwar mamahkar ana. Daha ya ka ta husaɗ cay sə, ya ta nəkafakwar jene aabay, afa ya yah zleley takwar hay bay, amaa ya yah sə, yaŋ takwar ana. Eve metehwe ana, wudeh ta ndana ɗaf kad papaŋ tec bay, amaa papaŋ te wudeh te ndec ɗaf kad wudiya hay.

¹⁵Taaɗaw sə, jene hay masa ya ava aŋga fakwanay sə, ya ta vakwaɗay eve mewesley, kwa yaŋ taaɗaw ana. Daha yey, ya walakwar mabay sə, afa akwar de weliyey pahata geyey?

¹⁶Akwar sə, akwa səniya, ya ka ŋgadakwar hahar ta manəkafakwar jene sə, aabay. Amaa ndah dərziya deveŋ akwar, ece piyey ka nda wewer, masa ya ka kwatakwaɗ səlay takwar avəda eve wewer.

¹⁷Daha aabay, nda amta deveŋ ndah masa ye ke zləreɗec kad varakwar sə, ka kəsakwaɗ jene hay takwar avəda geyey?

¹⁸Ya ka ŋgana mbahw Tit, ece re dey ava malamaŋ tandakwa masa akwa səniya sə, kad varakwar. Aŋga, Tit ana sə, ka kəsakwaɗ jene hay takwar avəda geyey? Andə ke də cuweeney dapa mawulak yaŋ taciya amta jaka pa macəp cəv pal amta aabay geyey?

¹⁹Dəga zleezle akwa wulakiya sə, anda pan yaŋ taciya fa yam te ndey takwar war geyey? Away! Anda gweɗ sə, fa yam te ndey ta Zlavay jaka pa Kəristi. Anda ŋgiya fakwanay ara nesey sə, mafay ta magəlakwar guula aɗaw hay masa ya walakwar elehey.

²⁰Ya ŋgə zidaw, gəla pas masa ya ta daɗay kad varakwar sə, ya ta ŋgatafakwar ara masa ya ta waya aabay kwa. Akwar may, akwar te ŋgetiyey ara masa akwar ta waya aabay. Asaya, ya ŋgə zidaw, afa gəla ya ta ŋgatafakwar, akwar dapa mapay, səlek, matəhaz nda pa rav, mavən vaw, maŋgaldar fa ndana, meŋgə suwe, magal yaŋ va meŋgə mezlər eve cəvey ana aabay.

²¹Asaya, ya ŋgə zidaw, gəla Zlav a ta piyey hwar pe ndey fəma takwar. Gəla ya ta kuɗa mafay ta ndah masa ece dey fəma fəma dapa meŋgə mebərey ara tecəɗem, masa aca gwam ka ŋgwada rav tec dapa jə maləza, dapa mezlər masa ta hwaray va makəs vaw fa zaŋ ana hay bay.