Read Cuvok 2 Kweriŋtiye hay 13 Bible Online

2 Kweriŋtiye hay 13 - Cuvok bible

2 Kweriŋtiye hay 13

¹Ya ta daɗ kad varakwar nesey sə, ka mamahkar ana. Ara masa mavinda: «Matəɗ ma kad yaŋ ndana de zlecey sə, say da yaŋ matə yaw ta ndah ecew, daha aabay mahkar.»

²Ye ke gweɗ cay, ara masa dapa madaɗ taaɗaw meecew ana, ya vahda megweɗ saya, kwa pəsna masa ya varakwar aabay nesey, kad ndah masa ec ke ŋgə mebər zleezle va ndah dərziya fakwanay. Daha ya ka ta vahaɗay sə, ya ta ŋgə metekwen fa ndana aabay,

³afa akwa hwar masəna daha Kəristi e gweɗ jaka pa ma taaɗaw. Aŋga, masa aŋga bəle kad varakwar sə, aabay, amaa e ŋguzdek gədaŋ tata mazlakava dapa akwar.

⁴Eve metehwe ana, pas masa aca zləlawiya fa hap sə, aŋga dapa bəle, amaa təlam nesey, aŋga eve ndey jaka pa gədaŋ mazlakava ta Zlavay. Ara aŋga ana, andaw may, andaw dapa bəle jaka pa aŋga, amaa andaw ta njah eve ndey ava aŋga jaka pa gədaŋ mazlakava ta Zlavay kad varakwar.

⁵Akwar ava yaŋ takwar ana, mawzaɗa manjah takwar, afa akwar da səna daha akwar manjaha dapa makəsparav, mawzaɗaw dapa yaŋ takwar ana. Akwa səniya mambəla ana, Yesu Kəristi sə, aŋga dapa akwar biba? Daha akwar ka sənaw aabay, ŋgesey, akwar ka təɗata.

⁶Amaa ya wulakiya sə, akwar ta səna avəda, andaw sə, andə ke təɗ aabay.

⁷Anda cə mbahw kad Zlavay, afa akwar de ŋgə suwe bay. Anda wal magwaɗakwar masa andaw sə, andə ke təɗ aabay. Amaa anda wal, a da lada akwa ŋgə jə mambəla ana kad ndana hay jaŋgata, kwa daha ndana hay aca wala sə, mezlər taciya ana ara jene taambəla ana,

⁸afa anda zlafa meŋgə vəram ava metehwe ana ta Zlavay sə, aabay, say maŋgana mezlərey.

⁹Andaw dapa meweslə cəɗem cəɗem masa andaw bəle hay, masa akwar ava gədaŋ. Jə masa anda nəkiya dapa macə mbahw taciya kad Zlavay sə, masa akwar de tər ka ndah maŋgana jene hay kasl pe memeɗey ana.

¹⁰Mafay ana, ara masa ye dəreŋ hel nesey, ya vindakwar jene hay na fakwanay sə, afa ya wal ya da payafakwar ava matimaazlaɓ masa Bay Mazlakava te viyey bay. E viyey sə, ta magəlakwar, bəna ta makwakwacakwar bay.

¹¹Yaw təlam nesey, malama va dəma hay dapa makəsparav, manjahay dapa mewesley, meŋgə mezlər masa a da tərakwar ka ndah maŋgana jene hay kasl pe memeɗey ana, mavə gədaŋ fa vaw takwar, manjah dapa macacal ma, manjah dapa metehey. Ara nesey, Zlav nda mavana mawal nda va metehey, a ta njah ava akwar.

¹²Megweɗ fa vaw takwar amta amta ava mahumbat vaw ta malamaŋ va dəmaŋ hay ara masa a wafa Zlavay. Makəsparav hay fakwanay fana, aca gwaɗafakwar.

¹³A lada mambəla ana ta Bay Mazlakava Yesu Kəristi, mawal nda ta Zlavay va macam yaŋ te Mesfen Mavəna da njah ava akwar fakwanay.