Read Cuvok 2 Kweriŋtiye hay 2 Bible Online

2 Kweriŋtiye hay 2 - Cuvok bible

2 Kweriŋtiye hay 2

¹Ara nesey, ya ka kəs mawulak yaŋ ta mavahaɗ kad varakwar ɓasabay sə, afa a ta məcakwaɗ vaw saya.

²Yaw, daha ya ka məcakwaɗ vaw avəda sə, me te weslədeyey sə, wa la wa? Say akwar ana masa ya ta məcakwaɗ vaw ana ŋgesey.

³Mawala mafay te mey masa ya vindakwar leeter, ya wal masa daha ya ka ta husata varakwar, vaw aɗaw da məc mafay takwar ndah me te weslədeyey sesəker bay. Ya səniya eve metehwe ana, daha ya ka ŋgat mewesley, ŋgesey, akwar fakwanay, akwar te wesl may.

⁴Ya vində leeter ana nesey sə, ava makuɗa dapa ndey mabay, leŋgesl aɗaw madəŋgazla mabay, rav aɗaw ka ləzata mabay. Ya vindakwaɗ ara nesey sə, ta maməcakwaɗ vaw bay. Amaa, afa akwar da səna sə, ya walakwar elehey.

⁵Daha ndana deveŋ akwar ma ta məca vaw ɓa sə, ŋgesey, e te məcek vaw taaɗaw babəla bay, amaa e te məcek vaw takwar fakwanay. Daha aabay, anda zlafa magwaɗakwa e te məcek vaw mahwalhwala ana sə, ta ndah dərziya deveŋ akwar.

⁶Ta nda ana ŋgesey, ara masa hamazlakava ta ndah deveŋ akwar, ac ka payafa, ŋgesey, mak cay.

⁷Mafay ana, təlam nesey, sesəker mapəlan mebər tata, matəkan rav, afa a da məcan vaw avəda mahwalhwala ana sabay.

⁸Mafay ana, ya ŋgakwar mbahw: Maŋguzdan mawal vaw takwar.

⁹Ya vindakwar leeter ana nesey sə, ka ta cakakwar, afa ya da səna ma hay masa ya ta gwaɗakwar sə, akwar ka nahda yaŋ kad pa fakwan geyey.

¹⁰Daha akwar ka pəlan mebər ta ndana, yey may, ya pəlanay. Daha ya pəlan mebər ta ndana da yaŋ jene masa ya da pəlanay sə, ya pəlan ŋgesey mafay takwar, meendey te Kəristi,

¹¹afa Saadan da zlafa mafəcandakwa sabay. Mafay ta masa anda sənakwa mawulak yaŋ tata hay da yaŋ andakwa mambəla ana.

¹²Mahusa taaɗaw a Turwas ka ta bəzad Labara mambəla ana te Kəristi, afa Bay Mazlakava ke viyey cəv te meŋgə mezlər dərŋga.

¹³Amaa leŋgesl aɗaw ka ŋgat masasak vaw aabay, afa ya ka ŋgat malama Tit aabay. Mafay ana, ye ke gweɗefec avəda, ya ka data pa vavara ta Masiduwan.

¹⁴Anda ŋgə wasay kad Zlavay, afa a padandan ma cəɗem cəɗem kad pa bigula tata ava Kəristi. Aŋga ana, a ŋguzad Kəristi kad ndana hay jaka pa andaw vəla vəla ara jene masa andaw ta ndaliya masa mezekey ana e ŋgeŋgəz kad a wudam, e zek vəla vəla.

¹⁵Eve metehwe ana, andaw sə, andaw ara jə te meŋgeŋgez mambəla ana masa Kəristi ta viya kad Zlavay. Mezek te jeŋ ana ŋgesey sə, aŋga mapa kad ndah masa Zlav ke mbəlec avəda va kad ndah masa ac dapa mazə mesfen teceŋ dəreŋ ava Zlavay.

¹⁶Ta ndah leŋgeɗey, mezekey ana ŋgesey sə, mezek masa a hwada nda kad pa maməcay. Ta ndah dərziya sə, mezekey ana ŋgesey, mezek te mesfen masa a hwada nda kad pe mesfeney. Naa ma ta zlafa maŋgana mezlərey ana na wa?

¹⁷Taciya sə, andaw ara ndah mekele mabəzada ma ta Zlavay mafay ta maŋgat jene bay. Sesəker ara masa Zlav ka zlardandaw, anda gweɗ metehwe ana fa yam te ndey ta Zlavay, anda gweɗ sə, ma masa e dek da vara vaw dapa macam vaw ava Kəristi.