Read Cuvok 2 Kweriŋtiye hay 3 Bible Online

2 Kweriŋtiye hay 3 - Cuvok bible

2 Kweriŋtiye hay 3

¹Akwa wal sə, andaw de ŋguzdek yaŋ taciya fəma takwar saya geyey? Daha aabay, andə ka hwar mavakwar leeter ta maŋguzad yaŋ taciya kad akwar ara ndah mekele ta ŋgiya geyey? Daha aabay saya, andə ka hwar manəkafakwar leeter ta maŋguzad yaŋ taciya geyey?

²Leeter ta maŋguzad yaŋ taciya sə, akwar ava yaŋ takwar ana, leeter masa aŋga mavinda dapa rav taciya, masa ndana hay fakwanay aca səniya, aca jaŋgiya.

³Aŋga, eve metehwe ana, akwar sə, akwar leeter te Kəristi masa andaw te kəsekey. Leeter ana sə, mavinda ava ha ta ndana bay, amaa Mesfen Mavəna masa aŋga eve ndey ta vindiya. Leeter ana sə, mavinda fe beelem bay, amaa mavinda dapa rav takwar.

⁴Anda gweɗ ara nesey sə, afa andə ka paɗ mawulak yaŋ taciya fa Zlavay jaka pa Kəristi.

⁵Andaw ava yaŋ taciya sə, andə ka zlafa te meŋgə mezlərey ana nesey sə, aabay. Amaa gədaŋ taciya ta maŋgiya sə, e dek da vara Zlavay.

⁶Mavandaw gədaŋ andə da zlafa meŋgə mezlər ta mabəzad Majaw ma Waya ana sə, aŋga. Majaw ma Waya ana ŋgesey, aŋga macama ava ma majawa masa mavinda sə, aabay, amaa aŋga macama ava Mesfen Mavəna, afa ma majawa masa mavinda sə, a kəɗa nda, amaa Mesfen Mavəna sə, a və mesfeney.

⁷Ma hay ta ma majawa sə, ac mavinda fe beelem. Meweɗ ta gədaŋ ta Zlavay ke weɗ da yaŋ ana, ndey ta Muyiz ke weɗ macəkuma bay, meweɗey ana sə, ka njah gaa aabay. Isreyel hay kwa ac ka zlafa mawala ndey ta Muyiz ana ta manjah gaa sə, aabay. Daha ma majawa masa a kəɗa nda ke ŋguzdek gədaŋ ara nesey,

⁸naa gədaŋ te mezlər te Mesfen Mavəna sə, e de ŋgə gwagumalamaw?

⁹Yaw, daha mezlər masa e hwedek mataɗ ma kad yaŋ ndah masa aca zay aŋga ava gədaŋ sə, naa gədaŋ te mezlər masa a tər ndana hay ka ndah maŋga mezlər eve cəvey ana sə, de ŋgə gwagumalamaw?

¹⁰Eve metehwe ana, gədaŋ ta Majaw ma Waya təlam nesey sə, a fəna gədaŋ ta Majaw ma Mava macəkuma bay.

¹¹Yaw, daha jə masa aŋga da yaŋ sek aŋga ava gədaŋ mabay sə, naa jə masa a ta njah katar ka midakw sə, e de ŋguzdek gədaŋ tata gwagumaw?

¹²Ava map mawulak yaŋ da yaŋ ma ana nesey, anda gweɗ ava zidaw dapa vaw aabay, afa anda səniya ma ana sə, tehwe.

¹³Anda ŋgiya ara Muyiz masa ka bərɗa ndey tata ava rəkwat sə, aabay. Muyiz ana a ŋgiya ara nesey sə, afa Isreyel hay ac da wala meweɗ ta Zlav masa ka njah aabay ana ŋgesey.

¹⁴Leŋgesl tec hay maɓəzla kasl pəsna, dapa masa aca jaŋgə ma hay dapa Majaw ma Mava sə, rəkwat ana sə, aŋga ɓa jaŋgata. Rəkwat ana ŋgesey, e te kes sə, say ava macam vaw ava Kəristi.

¹⁵Kasl pəsna nesey, dapa masa aca jaŋgə ɗelewer hay ta Muyiz sə, leŋgesl tec masərata jaŋgata.

¹⁶Rəkwat ana ŋga e te kezley sə, say jaka pa maŋgwad rav ta ndana kad vara Bay Mazlakava war.

¹⁷Bay Mazlakava sə, aŋga Mesfen Mavəna. Dapa slam masa Mesfen ta Bay Mazlakava aŋga faŋga sə, mapəla vaw dapa ɓeley aŋga faŋga may.

¹⁸Andakwa fakwan masa ndey tandakwa masərata aabay, anda ŋguzdakakwa membeɗ ta Bay Mazlakava ara meezeŋ te jene masa e də jaka pa mahwarhwar. Ara nesey, andə ta ŋgwad tandakwa ka ta njah ara Bay Mazlakava. Ara nesey anda dakwa dapa membeɗey kad pe membeɗ masa mazlakava mafəna ana jaka pa Bay Mazlakava masa aŋga Mesfeney.