Read Cuvok 2 Kweriŋtiye hay 4 Bible Online

2 Kweriŋtiye hay 4 - Cuvok bible

2 Kweriŋtiye hay 4

¹Zlav a gərandan mezlərey ana nesey pa ha taciya sə, jaka pe metekwen tata fandaw. Mafay ana, anda məca vaw taciya aabay.

²Andaw sə, andə ka tal yaŋ taciya pe mezlər hay te mehwedek hwaray masa ndana hay aca raɓiya meereɓey sə, aabay. Anda ŋgə mezlər eve wewer va maŋgwad ma ta Zlavay sə, aabay. Sesəker anda ŋguzdek metehwe ana eve cəv masa mapana kad ndana hay va maŋguzad yaŋ taciya, afa aca ra səna dapa rav teceŋ fa yam te ndey ta Zlavay, andaw sə, andaw ndah maŋga mezlər eve cəvey ana.

³Daha Labara mambəla ana masa anda bəzadiya aŋga masərata ava rəkwat heley sə, aŋga masərata ana ŋgesey sə, fəma ta ndah masa ac dapa cəv te mezlekey,

⁴va fəma ta ndah masa rav tec masasala, mafay ta masa Saadan zlav ta vavara nesey ke həɗezlecen leŋgesl tec avəda, afa aca ra wala meweɗ ta Labara mambəla ana masa e ŋguzdek gədaŋ te Kəristi sə, bay. Kəristi ana sə, aŋga meezeŋ ta Zlavay.

⁵Dapa mezlər taciya sə, anda bəzad ma da yaŋ yaŋ taciya sə, aabay, amaa anda bəzad sə, Yesu Kəristi, masa aŋga Bay Mazlakava. Andaw sə, anda gweɗey, andaw ndah maŋga mezlər takwar mafay te Yesu.

⁶Afa Zlav masa aŋga te gweɗ: «Da lada sə, slam de weɗ dapa ləvaŋ» sə, aŋga ana saya ke weɗ dapa rav tandakwa hay, afa a da waɗandakwa dapa mesen jene ta gədaŋ tata masa e weɗ fe ndey te Kəristi.

⁷Andaw masa andə eve zleley ana nesey, andaw ara wuseɗef hay ta rəɓasl. Zlav a ŋgiya ara nesey sə, afa ndana hay aca ra səna, gədaŋ mazlakava masa mececeley ana aabay nesey sə, e dek jaka vara vaw, bəna da varandaw bay.

⁸Andaw sə, andə ka sə marga hay mekele mekele macəkuma bay, amaa marga ana hay ka zlafa masasarafandaw aabay. Andaw maŋgəra, amaa andə ke zleŋgə taciya,

⁹andaw matatara, amaa andaw matəhaza aabay, andaw makakaɗa fa vara, amaa andaw makəɗa aabay.

¹⁰Cəɗem cəɗem andaw sə, anda kəsiya, andə ta məc ara tərsam ta maməc te Yesu, afa ndana hay aca ra wala manjah te Yesu dapa vaw taciya.

¹¹Andaw masa andə eve ndey nesey sə, andaw mapa cəɗem cəɗem ka ta məcay mafay te Yesu, afa ndana hay aca ra wala manjah te Yesu dapa vaw taciya kwa masa a ta məcata pas mekele.

¹²Ara nesey, maməc e ŋgə mezlər dapa andaw, amaa takwar sə, mesfen e ŋgə mezlər dapa akwar.

¹³Ara masa mavinda dapa Ɗelewer mavəna, gege: «Ya ka kəsaw pa rav aɗaw, mafay ana, ye ke gweɗey[2].»

¹⁴Aŋga, anda sənakwa, Zlav mapəraka Bay Mazlakava Yesu dapa maməcay kad pe mesfeney sə, a ta pərakakandakwa avəda kad pe mesfeney ava Yesu ana va maŋguzdakandakwa fa slam ana ava akwar fəma tata.

¹⁵Marga hay masa andaw ta ɓəsiya fakwan nesey sə, mafay takwar, afa mambəla ana ta Zlavay e de husefec ndana hay gaa ec de gel fəma fəma, ndana hay gaa ac ta ŋgana wasay, ara nesey, ac ta vana gədaŋ kad Zlavay.

¹⁶Mafay ana, andə ka məca vaw taciya aabay. Kwa dapa andaw, daha slaw ta vaw taciya e kwez neke neke, amaa makəsparav taciya e tər ka waya ka waya, fa pas fa pas.

¹⁷Eve metehwe ana, marga hay masa andaw ta siya təlam nesey sə, gədaŋ dapa aabay, ac ta njah gaa aabay. Amaa, a ləmadandan mehehəm taciya masa e te ndəv aabay. Mehehəmey ana ŋgesey, a ta njah katar ka midakw, aŋga mazlakava ana, a fəna marga taciya hay fakwanay.

¹⁸Mawulak yaŋ taciya sə, mapa da yaŋ jene hay masa ece wel na bay, amaa aŋga da yaŋ jə masa e wel bay. Jene hay masa ece weley sə, ac ta njah gaa aabay, amaa jene hay masa ece wel bay sə, ac ta njah katar ka midakw.