Read Cuvok 2 Kweriŋtiye hay 5 Bible Online

2 Kweriŋtiye hay 5 - Cuvok bible

2 Kweriŋtiye hay 5

¹Anda sənakwa, daha meker tandakwa dapa vavara nesey ka nasata sə, andakwa ava way masa a ta njah katar ka midakw masa Zlav ta lamiya kad andakwa da baymaləvaŋ sə, aɓa. Way ana sə, ndana hay ta lamiya bay.

²Təlam nesey, anda jarakwa, afa anda hurakwa mesehw pə way tandakwa masa aŋga da baymaləvaŋ ara ndana ta pə rəkwat waya fa vaw.

³Yaw, daha andə ka ta sahw tandakwa pə way ana sə, Zlav a ta ŋgatafandakwa meetersey ɓasabay.

⁴Masa andakwa dapa way tandakwa dapa vavara nesey sə, anda jarakwa ara nda mazəɓa jə masa e zeɓ bay. Eve metehwe ana, anda walakwa madaɓa dapa vaw tandakwa na bay, amaa anda walakwa map vaw masa aŋga da baymaləvaŋ sə, a yaŋ ana war, afa mesfen da ŋgwada vaw masa a ta məcata sə, avəda.

⁵Yaw, maləmadandakwa ha ka ta njah katar ka midakw nesey sə, Zlavay ana. Ka vandakwa Mesfen tata ara jene magəha masa aŋga ta raɓaɗ ha kad andakwa.

⁶Ara nesey, rav tandakwa matəhaza cəɗem cəɗem mambəla ana. Anda sənakwa, dapa masa andakwa dapa slaw ta vaw tandakwa nesey sə, andakwa dəreŋ ava Bay Mazlakava.

⁷Anda njahakwa nesey sə, jaka pa makəsparav, bəna andə ka walakwaɗ jeŋ ana eve ndey tandakwa sə, aabay heley.

⁸Aŋga, matəhazakwaɗ rav mambəla ana, anda walakwa ɗahw sə, madaɓa dapa slaw ta vaw nesey, anda ra ta njahakwa a cak ta Bay Mazlakava.

⁹Amaa jə masa anda walakwa kamma sə, maŋgə jə masa a wafa, kwa andakwa dapa slaw ta vaw, kwa andə ka gərakwaɗ slaw ta vaw ana.

¹⁰Afa andə ta zlacakwa fakwanay fəma te Kəristi ka ta mbaɗ ma tandakwa, a da təɗandakwa ma yaŋ. Ara nesey, kwa waawa tandakwa a ta ŋgat meyəv te mezlər tata masa aŋga ta ŋgiya mambəla ana, kwa mambəla ana aabay dapa manjah tata dapa vavara.

¹¹Melel fa Bay Mazlakava sə, anda sən masa a wal megweɗey. Mafay ana, anda yah meŋgə gədaŋ te meŋguzdecen eve metehwe ana kad ndana hay aca ra kəsaw. Zlavay sə, a sənandaw mambəla ana. Ya wulakiya, akwar may, dapa rav takwar sə, akwa sənandaw mambəla ana.

¹²Andə ka yah masa andə da ŋgə həɓa fəma takwar sə, aabay. Amaa anda wal sə, akwar da ŋgat ha ta maŋgə həɓa mafay taciya. Ara nesey, akwar ta zlafa mevehecen ma ta ndah maŋga həɓa fe jene hay masa ece weley, da yaŋ maŋgə həɓa fe jene hay masa ac dapa rav.

¹³Daha akwa wulakiya andaw sə, andaw ndah marəzla sə, anda rəzl mafay ta Zlavay. Amaa daha andaw sə, andaw ndah eve leŋgesl, andaw eve leŋgesl mafay takwar.

¹⁴Eve metehwe ana, mawal nda te Kəristi ka nəha rav tandakwa, daha anda wulakakwa da yaŋ ma nesey: Nda amta ka məcata mafay ta ndana hay fakwanay, nda ana sə, Kəristi. Ara nesey, ndana hay fakwanay ac ta məcata ara aŋga.

¹⁵A məc sə, mafay ta ndana hay fakwanay, ara nesey, ndah eve ndey aca njah eve ndey sə, ta yaŋ tec sabay, amaa aca njah eve ndey sə, mafay te Kəristi ta məcay mafay teceŋ va masa ka pərakata dapa maməcay mafay teceŋ.

¹⁶Mafay ana, maayaŋ kad fəma sə, anda ta sən ndana ara masa ndana hay ta wulakiya ɓasabay. Daha anda sənek Kəristi ara masa ndana hay ta wulakiya, təlam nesey, anda səniya ara na ɓasabay.

¹⁷Mafay ana, daha nda masa aŋga macama ava Kəristi sə, ka tərata ka nda waya, jene hay mezleezle ana dapa aŋga sə, ec ke meməheceŋ, jene hay waya ece dekey, aca njah pa.

¹⁸Jeŋ ana hay fakwanay nesey sə, ece dek da vara Zlavay, ka dərazlandakwaɗ ma ava aŋga ana jaka pa Kəristi. Ka vandan mezlər ta mabəzad ma da yaŋ madərazl ma ana nesey kad ndana hay.

¹⁹Aŋga, Zlavay ava yaŋ tata ana ke dərezlecen ma ta ndana hay dapa vavara ava aŋga jaka pa Kəristi. A ŋgaf mebər ta ndana hay dapa vavara ɓasabay. Ka vandan mezlər ta mabəzad ma da yaŋ madərazl ma ana nesey kad ndana hay.

²⁰Andaw sə, andaw maslaŋ hay te Kəristi. Zlavay ava yaŋ tata ana, a zalakakwar sə, jaka pa mabəzad ma taciya. Ara nesey, anda ŋgakwar mbahw eve mezel te Kəristi, makəs medekey, madərazla ma takwar ava Zlavay.

²¹Kəristi ke ŋgə mebər kwa kusetke aabay. Amaa Zlavay ka paɗ mebər tandakwa fakwanay pə yaŋ tata, afa andə da tərakwa ka ndah maŋga mezlər eve cəvey ana fa yam te ndey tata mafay ta macam vaw tandakwa ava Kəristi ana.