Read Cuvok 2 Kweriŋtiye hay 6 Bible Online

2 Kweriŋtiye hay 6 - Cuvok bible

2 Kweriŋtiye hay 6

¹Ara masa anda ŋgə mezlər fa slam ana ava Zlavay, anda ŋgakwar mbahw, akwar ta paɗ mambəla ana ta Zlavay masa aŋga ta vakwar ŋga ara jene taambəla bay,

²afa ke gweɗ, gege: «Dapa pas mambəla ana sə, ya ka cəna macə mbahw takaa. Masa pas te membəley e dekey sə, ya ka jənakaa.» Təlam nesey, pas mambəla ana sə, ka husakata cay, Pəsna nesey sə, pas masa Zlav a mbəlandakwa.

³Anda wal masa ndana da ŋgaldar fe mezlər taciya bay, mafay ana, anda ŋgə jene masa a da taɗda ndana dapa cəvey sə, aabay.

⁴Sesəker jaka pe jene hay fakwanay, anda ŋgə gədaŋ ta maŋguzdakwaɗay, akwar da səna, andaw sə, andaw ndah maŋga mezlər ta Zlavay, jaka pə mepəsek mabay dapa: Makaslafay hay, jene hay masa aca bəzlaw rav, maŋgə zidaw,

⁵mekəlep hay, daŋgay hay, mayah ma ta ndana hay, tərsam te meyəv hay mekele mekele, manjah eve ndey, mayə.

⁶Anda dey dapa manjah masa mapana, maŋguzad mesen jene taciya da yaŋ Zlavay, mepəsek dapa marga hay, meŋgə jə mambəla ana, Mesfen Mavəna, aŋga ava andaw, anda wal nda metehwe ana.

⁷Anda bəzad ma te metehwe ana, Zlavay, a vandaw gədaŋ meŋgə mezlər eve cəvey ana taciya ka tərata jə ta vəram ta malalak vaw taciya.

⁸Ndana hay aca mbaɗandaw, dərziya aca mbəraslandaw, aca hahəmandaw va dərziya aca lafandaw, aca pandaw ka ndah maŋgəla ma, anjəkar anda gweɗ tehwe.

⁹Aca pandaw ara ndah masa ndana e sənec bay, anjəkar aca sənandaw. Aca pandaw ara ndah maməca, anjəkar andaw eve ndey heley. Aca ŋgadandaw marga mabay, amaa ac ka kəɗandaw aabay.

¹⁰Aca məcandan vaw, amaa cəɗem cəɗem andaw dapa mewesley. Aca wulakiya sə, andaw maslamarga hay, anjəkar andaw eve zleley mabay. Aca wulakiya sə, anda hwar jene, anjəkar andaw eve jene fakwanay.

¹¹Guula aɗaw Kweriŋtiye hay, andə ka cafakwar ma sə, aabay, andə ka wunakwaɗ rav taciya fakwanay.

¹²Daha jene a randan ma ta mawalakwar ɓa sə, ŋgesey, e dek da varakwar.

¹³Ya gwaɗakwar ara papaŋ te wudeh te gweɗ kad wudiya hay: Maŋgaw ara andaw, mawunandan rav takwar may.

¹⁴Akwar ta gaɓa vaw ava ndah masa ac ka kəs zlav pa rav aabay bay. Jə masa eve cəvey ana va jə masa eve cəvey ana aabay sə, ece də amta fa slam ana geyey? Slam mawaɗa va ləvaŋ sə, aca njah fa slam ana geyey?

¹⁵Kəristi va Saadan aca ra cacal ma fa slam ana sə, a ŋgana gwagumaw? Daha aabay, nda makəsparav te Kəristi va nda masa ka kəsaw pa rav aabay sə, aca ra ŋgat mawulak yaŋ fa slam ana amta sə, a ŋgana gwagumaw?

¹⁶Macama Way ta kwakwas va veŋ ta mbat hay sə, mey? Afa andakwa sə, andakwa Way ta kwakwas ta Zlav masa aŋga eve ndey. Zlavay ana ke gweɗey: «Yey Zlavay, ya ta njah dapa taɓa teceŋ, ye te dey eve eceŋ. Ya ta njah ka Zlav teceŋ, ac may, ac ta njah ka ndah taaɗaw.»

¹⁷Mafay ana, Bay Mazlakava ke gweɗ saya, gege: Madaɓa dapa taɓa ta ndah ana, manjah ava zlalav. Akwar ta dəzlafa ha jə maləza bay, ara nesey, yey may, ya ta kəsakwar.

¹⁸Bay Mazlakava, nda masa aŋga ava gədaŋ mabay, ke gweɗ saya, gege: Dapa pas ana ŋgesey, akwar te səneyey avəda, yey sə, ya papaŋ takwar, akwar may, akwar wude hey aɗaw, mawula hay va dehwey.