Read Cuvok 2 Kweriŋtiye hay 7 Bible Online

2 Kweriŋtiye hay 7 - Cuvok bible

2 Kweriŋtiye hay 7

¹Gulaɗaw hay masa ya walakwar elehey, ma hay fakwan masa Zlav ka gwaɗa daha nesey sə, kad andakwa. Ara nesey, mapanakwaɗ yaŋ tandakwa ava yaŋ tandakwa ana dapa jene hay fakwan masa a dakala kwa vaw tandakwa, kwa mesfen tandakwa avəda. Maŋgakwa gədaŋ ta manjah ka ndah mapana kasl pe memeɗey ana dapa melel fa Zlavay.

²Mawunandan rav takwar. Andə ka ŋgə jə masa e teh bay kad ndana sə, aabay. Andə ka kəs jene ta ndana eve wewer sə, aabay.

³Ye gweɗ ara nesey sə, ta matəɗakwar ma yaŋ bay, afa ya ka gwaɗakwar cay, akwar dapa rav taciya kwa kad pa maməcay va kwa kad pa manjah eve ndey, andakwa macama.

⁴Ya ka pakwar ka ndah mambəla ana dapa manjah taaɗaw mabay. Ye wesl gaa mafay takwar, andaw manəha ava matək rav. Dapa marga taciya hay fakwanay sə, ya manəha eve meweslə mabay.

⁵Dapa masa anda husa pa vavara ta Masiduwan sə, andə ka ŋgat masasak vaw kwa kusetke aabay. Andə ka cə yaŋ ava marga hay mekele mekele. Ndana hay ac ka yahafandaw ma eve cəv hay mekele mekele, rav ka təɗandaw mabay.

⁶Amaa Zlav nda matəka rav ta ndah dapa marga hay, ka təkandan rav eve medek te Tit.

⁷Matəkandan rav taciya ana sə, medek tata babəla bay, amaa masa akwar ta təkan rav saya. Ka gwaɗandaw da yaŋ masa akwa hwar meweleyey, da yaŋ matakwa takwar va matəhaz rav takwar te mejəniyey. Ara nesey, ke weslədeyey kwa macəkuma bay.

⁸Daha leeter aɗaw leŋgeɗey masa ya ta vindakwaɗay, ka kazlaɗakwar pa matakwa sə, ya zalda marava aabay. Aŋga, ya səniya mambəla ana, leeter ana nesey, ka kazlaɗakwar pa matakwa ta manjah kusetke. Naa daha ya ka zalda marava sə,

⁹ye wesl təlam nesey. Ye wesl sə, mafay ta matakwa takwar bay, amaa mafay ta masa matakwa ana ŋgesey, ka ŋgwada rav takwar. Matakwa ana ka wafa Zlavay, ara nesey, andə ka ŋgakwar jə masa e teh bay sə, aabay,

¹⁰afa matakwa masa a wafa Zlavay sə, a ŋgwad rav ta ndana masa a hwad nda pe membəley. Ara nesey, ndana a zlafa mazal marava mafay ana sə, aabay. Amaa matakwa ara masa vavara na ta waya sə, a hwad nda pa maməcay.

¹¹Mawala matakwa takwar masa a wafa Zlavay ke heyek jene hay dapa akwar, matakwa ana ka vakwar maŋgaŋgar vaw te meŋgə jene! Mapan yaŋ takwar dapa mebərey! Mazal marava te meŋgə jə masa e teh bay! Maŋgə zidaw mabay fe meŋgə jene hay masa ece teh bay! Akwa hwar meweleyey! Matəhaz rav ta makət nda maŋga mebərey. Dapa jeŋ ana hay na fakwanay sə, akwar ke ŋguzdek yaŋ takwar avəda masa akwar eve mebər kwa kusetke aabay.

¹²Ava ma mekusetke ana, daha ya ka vindakwar leeter sə, ya vindiya mafay ta nda maŋga mebər bay, kwa daha aabay mafay ta nda masa mebər maŋga fa yam te ndey tata bay. Amaa ya ka wal maŋguzdakwar fa yam te ndey ta Zlavay, masa akwar ka ləmada vaw te meŋgə mezlərey mafay taciya.

¹³Nesey, jə masa ka təkandan rav. Kad veŋ matək rav ana ŋgesey, andaw ava meweslə mabay saya mafay ta Tit masa aŋga dapa mewesley da yaŋ akwar, afa akwar fakwanay, akwar ka sasakan leŋgesl tata.

¹⁴Afa ya ka ŋgə həɓa mabay fəma tata da yaŋ akwar, amaa kwa ka ŋgiyey hwar aabay. Amaa ara masa cəɗem cəɗem anda gwaɗakwar metehwe ana, ara nesey, ke ŋguzdek jene pal amta: Maŋgə həɓa taaɗaw da yaŋ akwar fəma ta Tit sə, ka ŋguzdakata tehwe.

¹⁵Ara nesey, mawal vaw tata kad varakwar sə, e gəley fəma fəma dapa masa a sənafa manah yaŋ takwar fakwanay, afa akwar ka kəsaw ava manahan yaŋ va mekekesley.

¹⁶Ye wesley da yaŋ masa ya zlafa mapakwar ka ndah mambəla ana dapa jene hay fakwanay.