Read Cuvok 2 Kweriŋtiye hay 8 Bible Online

2 Kweriŋtiye hay 8 - Cuvok bible

2 Kweriŋtiye hay 8

¹Malama va dəma makəsparav hay, anda wal akwar da səna ara gwagumaw mambəla ana ta Zlavay masa e ŋguzdek jaka vara makəsparav hay dapa vavara ta Masiduwan.

²Ac ka sə marga hay macəkuma bay, amaa cəɗem cəɗem ac dapa mewesley. Kwa ac maslamarga hay mahwalhwala ana, amaa ec ke ŋguzdek yaŋ teceŋ ac ava rav mambəla ana, ac ka cəkal jene hay mabay ka ta jəna nda.

³Ya tə yaw da yaŋ eceŋ eve metehwe ana, ac ka cəkal jene hay mabay, ka fəna gədaŋ teceŋ. Aca cəkaliya ana sə, ara mawulak yaŋ tec ta waya, bəna ndana ke nəkefec aabay,

⁴ac ka nəkafandaw a yaŋ a yaŋ, afa aca ra ŋgat cəv ta macam vaw ava andaw dapa mejənec makəsparav hay de Zeruzelem.

⁵Ac ka və jene hay mabay ka fəna masa anda ɓəliya da vereceŋ sə, ka fəna mawulak yaŋ taciya. Macaaca ana sə, ac ka van vaw teceŋ kad Bay Mazlakava, ava dəɓa ana, ac ka kəs ma taciya, afa aca ra ŋgə jə masa Zlav a waya.

⁶Mafay ana, andə ke gweɗ a yaŋ a yaŋ kad Tit da pafa leŋgesl mezlər te mecəkel jə ta majəna nda ana ŋgesey da varakwar. Andaw ka gwaɗa a da ndəvda mezlərey ana ara masa aŋga ta zlariya.

⁷Mawala jene hay masa akwar ava aŋga macəkuma bay: Akwar ava makəsparav ɓa, masən magwaɗ ma, mesən jene hay da yaŋ Zlavay, matəhaz rav te meŋgə mezlərey va mawal nda takwar kad varandaw. Ara aŋga ana, meŋguzdek yaŋ takwar eve mevəley ana nesey jaka pa mavə jene dapa mezlər ta macəkal jene ava rav mambəla ana may.

⁸Ya ka gwaɗakwar ara ma majawa masa cama akwar da vaw ara nesey sə, aabay. Amaa ya wal sə, macacalakwaɗ matəhaz rav ta ndah dərziya dapa macəkal jene, afa akwar da ŋgat ha te meŋguzdek mawal nda takwar masa metehwe ana.

⁹Yaw, akwar sə, akwa sən mambəla ana ta Bay tandakwa Mazlakava Yesu Kəristi. Aŋga, nda masa ka njah eve zleley, amaa ka paɗ yaŋ tata ka nda maslamarga mafay takwar, afa a da tərakwar ka ndah eve zleley jaka pa maslamarga tata ana.

¹⁰Teveney sə, mazlara megweɗ macaaca ana, akwar te jənec makəsparav hay de Zeruzelem sə, akwar ana, mazlara maŋgiya macaaca ana sə, akwar ana may. Ara nesey, ya gwaɗakwar mawulak yaŋ aɗaw da yaŋ ana, ŋgesey jə mambəla ana kad akwar may.

¹¹Təlam nesey, meŋgə gədaŋ ta mandəvda mezlərey ana. Mavaw ava mawulak yaŋ hay masa akwar ta kəsiya dəga dapa mezlerey ana kasl pe memeɗey ana. Mavaw təɗe fa gədaŋ takwar masa akwar ava aŋga ɓa.

¹²Daha ndana a və jene ava mawulak yaŋ ta rav mambəla ana sə, ŋgesey Zlav a kəsiya ava jə tata ana mambəla ana may. Ka nəkafandakwa jə masa andakwa ava aŋga aabay sə, aabay.

¹³Akwar ta wulakiya ya ŋgə sə, ya kazlaɗakwar pa maslamarga mafay te metəkecen rav ta ndah mekele bay. Amaa ya wal sə, ndana hay fakwanay aca ra njah mendemende fa yam te ndey ta Zlavay.

¹⁴Təlam nesey, akwar dapa mambivaw. Akwa zlafa mejənec ndah masa aca hwar jene. Ara nesey, pas masa akwa hwar jene, daha ac dapa mambivaw sə, ac ta jənakwar ava jene hay tec may. Manjah mendemende sə, ara nesey.

¹⁵Ara mavinda dapa Ɗelewer mavəna, gege: «Nda meŋgek jene hay gaa sə, ka ŋgataw gaa mafəna ana sə, aabay. Nda meŋgek jene kusetke sə, ka hwar jene mahwalhwala ana sə, aabay.»

¹⁶Wasay ta Zlav mavana matəhaz rav kad Tit ta majənakwar ara andaw.

¹⁷Tit ana ka kəs mbahw taciya. Asaya, aŋga ava maŋgaŋgar vaw te mezlər gaa, aŋga ava yaŋ tata ana, ka kəs mawulak yaŋ ta madaɗ kad varakwar ana.

¹⁸Anda zləraɗ sə, ac ava malamaŋ tandakwa masa Macam yaŋ hay ta ndah ta Zlavay aca hahəmiya mafay te mezlər tata, ta mabəzad Labara mambəla ana kad ndana hay.

¹⁹Nesey ana babəla bay, Macam yaŋ hay ta ndah ta Zlavay aca kəsiya sə, afa a da padandan ma dapa maŋgway taciya pas masa anda hwad jene hay macəkala sə, kad Zeruzelem. Anda ŋgiya ara nesey sə, ka ta hahəlan yaŋ ta Bay Mazlakava ava yaŋ tata ana. Ara aŋga ana saya, anda ŋgə sə, anda ŋguzdek mawulak yaŋ taciya mambəla ana.

²⁰Ac ka vandan səlay hay macəkala sə, mabay. Anda pə leŋgesl, afa ndana hay aca ra dakalandan mezel taciya da yaŋ meŋgə mezlər ava səlay ana na bay.

²¹Ara nesey, anda wal meŋgə mezlər mambəla ana sə, fa yam te ndey ta Bay Mazlakava babəla bay, amaa fa yam te ndey ta ndana hay fakwan may.

²²Andə ka zlar malamaŋ tandakwa mekele kad veŋ eceŋ ana saya. Andə ka caka matəhaz rav tata dəɓa gaa hay, anda ŋgatiya sə, aŋga ava gədaŋ cəɗem cəɗem. Kwa təlam nesey, aŋga ava gədaŋ mafəna ana saya, afa ka paɗakwar ka ndah mambəla ana mabay.

²³Ta Tit sə, aŋga nda mejəniyey dapa mezlərey mafay takwar. Malamaŋ tandakwa hay, masa ac maslaŋ hay ta Macam yaŋ hay ta ndah ta Zlavay, ece ŋgə mezlər ta mambaɗ Kəristi.

²⁴Meŋguzdecen mawal vaw takwar kad eceŋ metehwe ana. Ara nesey Macam yaŋ hay ta ndah ta Zlavay ac ta səniya eve metehwe ana maŋgə həɓa taciya da yaŋ akwar sə, aŋga ava slam ana.