Read Cuvok 2 Kweriŋtiye hay 9 Bible Online

2 Kweriŋtiye hay 9 - Cuvok bible

2 Kweriŋtiye hay 9

¹Mavində ma da yaŋ majən nda kad vara ndah ta Zlavay de Zeruzelem sə, a jəna nda ɓasabay.

²Ya sən mawulak yaŋ takwar te mejəneceŋ sə, aŋga mambəla ana. Ya ka hahəmakwar mabay da vara ndah da Masiduwan, ye ke gweɗeceŋ: «Malamaŋ tandakwa hay dapa vavara ta Akay, ac maləmada dəga teveney ta maviya.» Maŋgə gədaŋ takwar ana ŋgesey sə, ke vec gədaŋ kad ndana hay mabay deveŋ eceŋ.

³Təlam nesey, ya zlərakwar malamaŋ tandakwa hay nesey, afa akwar da ləmada vaw ara masa ya ta gwaɗakwa. Dapa mezlərey ana nesey, ya ka ŋgə həɓa da yaŋ akwar, amaa ya wal həɓa ana de tər ke jene taambəla bay.

⁴Ye leley, afa daha andə ta daɗ ava ndah da Masiduwan, andə ta ŋgatafakwar, akwar ka ləmada vaw aabay sə, ŋgesey, e te piyey hwar pe ndey, afa andə ka ŋgə həɓa da yaŋ akwar elehey. Hwaray ana e te kəɗ mahwalhwala ana sə, kad akwar saya may.

⁵Mafay ana, ya ka wulakaw, zuwan ye ŋgec mbahw kad malamaŋ tandakwa ana hay ŋgesey, aca ra daɗay kamma fandaw. Aca ra ləmada jene hay macəkala masa akwar ka gwaɗa daha ta maviya, aca ra ɓəca. Ara nesey, ac ta wala sə, akwa viya ana sə, ava rav mambəla ana, bəna ava mazal marava bay.

⁶Masənafa, Nda masləka jene kusetke sə, e te cek jeŋ ana kusetke may. Nda masləka jene gaa sə, e te cek jeŋ ana gaa may.

⁷Da lada sə, kwa waawa da vaw ara masa aŋga ta wulakiya dapa rav tata, bəna ava mazal marava, daha aabay ara ndana ta tatəkiya bay, afa Zlav a wal sə, nda mavana jene eve mewesley.

⁸Zlav sə, aŋga ava gədaŋ ta mavakwar jene hay mambəla ana mekele mekele mabay. Akwar da ŋgat jene hay fakwanay cəɗem cəɗem masa akwa waya sə, may. Asaya, akwar ta ŋgat jene hay masa mak akwar te meŋgə mezlər hay fakwanay mambəla ana.

⁹Ara mavinda dapa Ɗelewer mavəna, gege: «A vəniya ava rav mapəla kad maslamarga hay, mambəla ana tata, a ta njah katar ka midakw.»

¹⁰Zlav mavana hulefey va jə ta manday kad ndana sə, a ta vakwar hulefey, a ta sakakwaɗay, a ta gəlakwaɗay, afa meŋgə jene eve cəvey ana takwar de heyek wudiya ana hay mabay.

¹¹Zlav a ta tərakwar avəda ka ndah eve zleley hay jaka pe jene hay fakwanay, afa akwar de ŋguzdek yaŋ takwar ava rav mapəla te mejənec ndana hay. Ara nesey, ndana hay gaa ac ta ŋgana wasay Zlavay mafay ta mavə jene takwar masa akwar te veceŋ jaka pa ha taciya.

¹²Afa jeŋ ana hay nesey sə, e te jənec makəsparav hay dapa jene hay masa aca waya war sə, ara na bay, amaa e te beŋgeɗek meŋgə wasay ta ndana hay gaa kad Zlavay.

¹³Ac ta hahəm mezlərey ana nesey, ac ta mbaɗ Zlavay mafay ta manahan yaŋ takwar kad pa Labara mambəla ana te Kəristi va mavə jene ava rav mapəla masa akwar ta viya fa slam ana eve eceŋ va ava ndana hay fakwanay.

¹⁴Jaka pa macə mbahw teceŋ mafay takwar, ac ta ŋguzdakwar mawal vaw teceŋ, mafay ta masa mambəla ana ta Zlavay aŋga mabay varakwar.

¹⁵Maŋgakwa wasay kad Zlavay mafay te jene hay mambəla ana mazlakava masa aŋga ta vandakwa.