Read Cuvok Galat hay 1 Bible Online

Galat hay 1 - Cuvok bible

Galat hay 1

¹Yey, Pawl ta vindakwar leeter nesey. Ya maslaŋ te Yesu Kəristi, bəna ya maslaŋ ta ndana hay bay. Mezlərekiyey sə, Yesu Kəristi va Zlavay, Papaŋ tandakwa, mepərekek Yesu ana dapa maməcay.

²Malamaŋ va dəmaŋ taciya hay fana fakwanay aca gwaɗafakwar may, akwar ndah dapa Macam yaŋ ta ndah ta Zlavay dapa vavara ta Galat.

³Da lada sə, Zlav Papaŋ tandakwa va Bay Mazlakava Yesu Kəristi ac da vakwar mapəsma va metehey.

⁴Kəristi ka vana yaŋ tata avəda mafay te mebər hay tandakwa, afa a da pəraslakandakwa avəda dapa ha ta vavara masa e teh teh bay nesey, ara masa Zlavay, Papaŋ tandakwa ta waya.

⁵A lada ndana hay aca ra mbaɗ Zlavay katar ka midakw. E de ŋgey!

⁶Zlav a zalakakwar taambəla jaka pa Kəristi sə, afa ka maməcata mafay te mebər tandakwa, amaa ya cəna mambəla ana bay, afa akwar ka ŋgwadafa dəɓa Zlavay zef ka ta cəp labara mekele.

⁷Eve metehwe ana, Labara mambəla ana mekele sə, aabay. Amaa ndah mekele mafəca nda te sehw pa taɓa takwar ava maŋgal ma teceŋ war, aca yah maŋgwad Labara mambəla ana te Kəristi.

⁸Andaw sə, andə ka bəzadakwar Labara mambəla ana cay. Yaw, daha ndana mekele, kwa andaw, daha aabay kwa Maskəla masa e dek da baymaləvaŋ ta bəzadakwar Labara mambəla ana mekele sə, a lada Zlav da gwadara avəda!

⁹Ya ka gwaɗakwaɗ ma ana cay, amaa ya vahakwaɗ ma ana saya: Daha ndana ka bəzadakwar labara mekele ara masa andə ta bəzadakwaɗ bay sə, ŋgesey, Zlav da gwadara nda ana avəda!

¹⁰Yaw, təlam nesey, akwa wulakiya sə, ya yah mehehəm da vara ndana hay geyey? Away, ara na bay, ya yah sə, mehehəm vara Zlavay. Asaya, akwa wulakiya sə, ya yah meŋgə jə masa e wefec ndana hay geyey? Away! A ra na bay, daha ya ŋgiya ara nesey sə, ŋgesey, ya nda maŋga mezlər te Kəristi bay.

¹¹Malama va dəma hay dapa makəsparav, ya gwaɗakwar: Labara mambəla ana masa ya ta bəzadakwaɗ nesey sə, e dek dapa mawulak yaŋ ta nda magəda bay,

¹²afa ye ŋgetekey va mesesərekek da vara ndana bay, amaa jaka pa maŋguzad jene te Yesu Kəristi.

¹³Akwar ka cəna ma da yaŋ manjah taaɗaw zleezle dapa masa ya cəp kwakwas te Zuwef hay heley. Dapa ŋgesey ana, ye ke ŋgedec marga mabay kad makəsparav hay te Kəristi, afa ye de zenec avəda.

¹⁴Dapa ŋgesey ana, ye fənec mandala aɗaw hay masa Zuwef hay ava manah yaŋ kad pa kwakwas te Zuwef hay. Ye ke fənec gaa ava matəhaz rav dapa kwakwas ta Papaŋ ta Papaŋ taciya hay.

¹⁵Amaa Zlav ke yeheɗiyey ha dəga ya da hwaɗ ta mma heley, dapa mambəla ana tata, ke zeliyey.

¹⁶Pas amta, ka wafa, ka wunawa ndey ya da səna wudiya, afa ya da ŋguzdiya kad ndah masa Zuwef hay bay. Dapa ŋgesey ana, ye ke dey ke te nəkek mamənak vara ndana sə, aabay.

¹⁷Ye ke də Zeruzelem vara ndah masa ac maslaŋ hay kamma fe yey sə, aabay may. Amaa ya ka vas vaw te medey kad pa vavara masa aca zaliya Arabiya. Ava dəɓa ana, ye vehek kad pe berne ta Damas.

¹⁸Mavay mahkar ava dəɓa ana, ye ke də Zeruzelem, afa ya da səna Keyfas. Andaw ka njah ava aŋga manah kuraw dapa yaŋ ana zlam.

¹⁹Ya ka wala maslaŋ mekele faŋga sə, aabay, say Zak malamaŋ ta Bay Mazlakava.

²⁰Jene hay masa ya vindakwaɗ fakwan nesey sə, metehwe ana, ya gwaɗiya fa yam te ndey ta Zlavay, Zlav a səniya, ya ŋgal ma aabay.

²¹Ava dəɓa ana, ya də kad pa vavara te Siriya va vavara te Selekiya.

²²Dapa ŋgesey ana, Macam yaŋ hay ta ndah ta Zlavay dapa vavara te Zudey, ec ke weliyey fe ndey aabay heley.

²³Amaa ac ka cəna masa ndah mekele te gweɗec war, gege: «Nda mayahafandakwa ma zleezle sə, təlam nesey, aŋga dapa mabəzad Labara mambəla ana da yaŋ makəsparav masa a yah magədasiya.»

²⁴Ara nesey, ac ka mbaɗ Zlavay mafay taaɗaw.