Read Cuvok Galat hay 2 Bible Online

Galat hay 2 - Cuvok bible

Galat hay 2

¹Ava dəɓa ta mavay kuraw dapa yaŋ ana faɗ sə, ye ke veh saya kad Zeruzelem, anda veh ava Barnabas. Ya ka kəs Tit kad veŋ andaw may.

²Ye də kad arŋga ana sə, afa Zlav te ŋguzediyey jene, ara nesey, ye ke bəzedec Labara mambəla ana masa ye te bəzedec kad ndah masa Zuwef hay bay. Asaya, ye ke bəzedec Labara ana kad mesnendə hay dapa macam yaŋ teceŋ wal, afa mezlərey aɗaw masa ya ta ŋgiya taanta hay va pəsna sə, de tər ke jene taambəla bay.

³Tit, masa e cəpiyey nesey sə, aŋga nda Gərek ana, amaa ac ka tatəkaw masa cama da ŋgəla ŋgwal tata avəda sə, aabay.

⁴Amaa malamaŋ hay makəsparav fa yam te ndey ta miya sə, ac ka wal a da ŋgəla ŋgwal avəda. Ndah ana ece dek kad pa taɓa taciya andaw makəsparav hay sə, ava makar, aca ra səŋgalandaw, andaw mapəla dapa Yesu Kəristi sə, gwagumaw. Aca wal matərandaw ke ɓel ta kwakwas ana hay saya.

⁵Amaa andə ke vec cəv kwa kusetke aabay. Anda wal Labara mambəla ana masa metehwe ana sə, da njah kad akwar katar.

⁶Ndah masa ndana hay ece pec ke mesnendə hay sə, aɓa, amaa vereyey sə, ŋgesey, jə masa e ɓəliyey aabay, afa fa yam te ndey ta Zlavay sə, ndana hay fakwanay amta. Ndah ana hay ŋgesey, ec ke tetəkiyey jene mekele sə, aabay.

⁷Sesəker ac ka səna masa Zlav ke viyey mezlər ta mabəzad Labara mambəla ana tata kad ndah masa Zuwef hay bay, ara masa aŋga ta vana kad Piyer ta mabəzadiya kad Zuwef hay sə, may.

⁸Zlav ka paɗ Piyer ka maslaŋ te Zuwef hay, ara masa aŋga te peɗiyey ka maslaŋ ta ndah masa Zuwef hay bay.

⁹Zak, Keyfas va Zaŋ sə, ac ara darakw hay masa ac ava gədaŋ dapa Macam yaŋ ta ndah ta Zlavay. Ac ka səna gədaŋ te mezlər masa Zlav ta vuwa. Andə ka cama yaŋ fa slam ana anda da ŋgat mambəla ana dapa taɓa taciya, andə ka vəna mezlərey. Ava dəɓa ana, andaw ava Barnabas andə ke dey ke te bəzedec Labara mambəla ana kad ndah masa Zuwef hay bay, ec may, kad vara Zuwef hay.

¹⁰Ac ka nəkafandaw jene amta te meŋgey, jeŋ ana sə, masənafa maslamarga hay dapa Macam yaŋ ta ndah ta Zlavay de Zeruzelem fana. Nesey jə masa ya ka ŋgaw ava rav aɗaw pal amta.

¹¹Masa Keyfas e husek a Antakiya sə, ya ka ɓaɓəcaw meendey ta makəsparav hay, afa ka zlakata.

¹²Yaw, wagaa ndah masa Zak te zlərekeceŋ ec te husekey sə, ka ndə ɗaf ava ndah masa Zuwef hay bay fa slam ana. Amaa ava dəɓa te mehusek teceŋ sə, ka gərda mandə ɗaf, ka raɓata ava zlalav, afa ke ŋgə zidaw fe Zuwef hay.

¹³Zuwef hay dərziya ec ke kezlec pe meŋgə jə masa e teh bay ara aŋga ana, kwa Barnabas ava yaŋ tata ana, ka zlar meŋgə zidaw, afa ke ŋgə jeŋ ana ara aŋga ana may.

¹⁴Amaa masa ya wala, ece də dapa cəv manduwak ana ara ma metehwe ana ta Labara mambəla ana ta waya ɓasabay sə, ya ka gwaɗa Keyfas meendey ta ndana hay fakwanay: «Kaa, masa ka nda Zuwef ana, daha ka manjaha ara nda masa aŋga Zuwef bay, ŋgesey, ka ka gərda manjah te Zuwef hay. Naa təlam nesey ka wal metetəkec ndah masa Zuwef hay bay ke Zuwef hay sə, meemey?»

¹⁵Andaw sə, anda heyek dapa tərsam te Zuwef hay, bəna dapa tərsam ta ndah masa Zuwef hay bay, masa aca sən ma majawa ta Zlav bay.

¹⁶Anda sənakwa təlam nesey, ndana e de tər ka nda mambəla ana fa yam te ndey ta Zlavay jaka pe mezlər ta ma majawa sə, aabay, amaa say jaka pe makəsparav dapa Yesu Kəristi. Andaw may, andə ka kəs ma te Yesu Kəristi, afa andaw de tər ka ndah mambəla ana fa yam te ndey ta Zlavay jaka pa makəsparav ana ŋgesey, bəna jaka pe mezlər ta ma majawa sə, ndana a zlafa metər ka nda mambəla ana fa yam te ndey ta Zlav aabay.

¹⁷Daha andaw Zuwef hay, anda yah metər ka ndah mambəla ana fa yam te ndey ta Zlavay jaka pe mekəs ma te Kəristi, andaw ana sə, anda səniya andaw eve mebərey ara ndah mekele, naa daha ara nesey sə, a wal megweɗ Kəristi ta zadandaw kad pe mebər la geyey? Away, ara na bay!

¹⁸Amaa daha ndana ka gərda ma majawa ta Muyiz, ava dəɓa ana, ka vahata kad pa sə, ŋgesey, ka jawa yaŋ tata avəda.

¹⁹Jaka pə ma majawa sə, yey ara nda maməca mafay ana, afa ya da njah eve ndey mafay ta Zlavay. Ava Kəristi sə, ya mazləlawa fa hap mazləlawa.

²⁰Maŋgana mezlər dapa yey təlam nesey sə, yaŋ taaɗaw bay, amaa Kəristi te ŋgə mezlərey. Təlam nesey, manjahay aɗaw dapa vavara nesey sə, ya hwadiya ava mavan rav aɗaw kad Wut ta Zlav masa ke weliyey, ka vana mesfen tata avəda mafay taaɗaw.

²¹Yey sə, ya pə mambəla ana ta Zlavay ke jene taambəla aabay. Daha ndana ka zlafa metər ka nda mambəla ana fa yam te ndey ta Zlavay jaka pə ma majawa ta Muyiz sə, ŋgesey, Kəristi a macə taambəla.