Read Cuvok Galat hay 4 Bible Online

Galat hay 4 - Cuvok bible

Galat hay 4

¹Mawala masa ya wal magwaɗakwar: Dapa masa wat ma ta cama jene ta papaŋ aŋga wat heley sə, ac mavəna ava ɓel aabay, kwa aŋga wat ma ta cama jene hay fakwanay.

²Amaa aŋga dapa ha ta ndah mapafa ndey fe jene tata va ndah maraɓan jene hay tata fakwanay, kasl pa pas masa papaŋ ta piya.

³Ara aŋga ana andakwa may, dapa masa andakwa wudeh heley sə, andə ka nahakwa yaŋ kad mesfen hay maŋga bay dapa vavara, andə ka njahakwa ɓel hay.

⁴Amaa daha pas ana masa Zlav ka pana sə, ka husakata cay sə, ke zlərek wudiya. Wat ana, e heyek jaka pa ŋgwaz va ka nah yaŋ kad pə ma majawa,

⁵afa e de husemekec ndah manaha yaŋ kad pa ma majawa va da tərandakwa ke wudeh ta Zlavay.

⁶Akwar sə, akwar wudeh ta Zlavay eve metehwe ana. Mafay ana, Zlav ka zlərandakwa Mesfen ta wudiya kad pa rav tandakwa. Mesfeney ana ŋgesey, a vandakwa gədaŋ te megweɗey: «Aba!» Ara megweɗey: «Papa!»

⁷Ara nesey sə, ke ɓel sabay, amaa ka wat da hwaɗ ta way. Anjəkar daha ka wat da hwaɗ ta way cay sə, ka wat ma ta cama jene may: Nesey sə, mezlər ta Zlavay.

⁸Zleezle sə, akwa sən Zlav bay, akwar ɓel ta mbat hay masa ac Zlav metehwe ana bay.

⁹Amaa təlam nesey sə, akwa sən Zlav cay, zuwan ya zlafa megweɗey, Zlav a sənakwar cay. Naa akwa veh kad ava dəɓa kad vara mesfen hay taambəla masa gədaŋ aabay sə, mafay te mey? Akwa wal manjah ke ɓel tec saya geyey?

¹⁰Akwa vana mehehəmey kad pas hay dərziya, kad kiya hay, kad manah hay va mavay hay dərziya.

¹¹Ya ka ŋgə zidaw, afa mezlərey aɗaw hay masa ya ta ŋgiya mafay takwar sə, de tər ke jene taambəla bay.

¹²Malama va dəma hay dapa makəsparav ya ŋgakwar mbahw: Manjah ara yey, afa ya ka tərata ara akwar. Akwar ke ŋgiyey jə masa e teh bay sə, aabay.

¹³Akwa sənafa masa ya ta zlar mabəzadakwad Labara mambəla ana macaaca ana. Dapa ŋgesey ana, ya gwabay.

¹⁴Dapa mehecey aɗaw ana sə, vaw aɗaw e teh fe ndey ta ndana bay. Amaa akwar ke gərdeyey aabay, akwar ke seserefiyey aabay. Sesəker akwar ke kəsiyey ara maskəla ta Zlavay, ara Yesu Kəristi.

¹⁵Dapa ŋgesey ana sə, akwar dapa mewesley. Təlam nesey, meweslə takwar ana kəla la wula? Ya tə yaw da yaŋ akwar: Eve metehwe ana daha efes a ŋgafakwar sə, akwar ke huslekek wut te ndey takwar, akwar ka vuwa.

¹⁶Naa təlam nesey sə, ya ka tərata maslagəra takwar mafay ta masa ya gwaɗakwar ma metehwe ana geyey?

¹⁷Ndah mekele aca wal ma takwar mabay, amaa mawulak yaŋ teceŋ sə, ŋga bay. Aca yah sə, mavənakwar eve yey war, afa akwar da cəp ma teceŋ.

¹⁸Mawulak meŋgə jə mambəla ana cəɗem cəɗem sə, mambəla ana, amaa akwar ta ŋgiya sə, say pas masa ya dapa taɓa takwar war bay.

¹⁹Akwar wude hey aɗaw, ya dapa masə marga mafay takwar saya, ara ŋgwaz masa e səfey, kasl fa akwar te tər ara Kəristi.

²⁰Ya wal ma ta njah metehwe ana ava akwar təlam nesey sə, afa ya da sən jə masa ya ta gwaɗakwar sə, gwagumaw, afa ya sən jə masa ya ta gwaɗakwar bay.

²¹Megweɗiyey, akwar masa akwa wal manah yaŋ kad pa ma majawa ta Muyiz. Akwa cəna masa ma majawa ana e gweɗ sə, aabay geyey?

²²Mavinda dapa Ɗelewer mavəna, gege: «Abəraham aŋga ava wudeh ecew, ŋgeɗey wut ta ŋgwaz masa aŋga ɓeley, leŋgeɗey wut ta ŋgwaza.

²³Amaa wut ta ŋgwaz masa aŋga ɓeley sə, e heyek ara wudeh fakwanay, amaa wut ta ŋgwaza sə, e heyekey ara na bay, Zlav ka gwaɗa daha dəga zleezle a ta vana wat.»

²⁴Ma maraɓa dapa slam ana na ɓa: Ŋgwazah ecew nesey sə, ece ŋguzdek ma hay majawa ecew. Ma majawa macaaca ana sə, e dek dapa wudam ta Sina, e te heyek wudeh ɓel hay: Aŋga sə, Agar.

²⁵Agar sə, wudam ta Sina dapa vavara ta Arabiya. Aŋga berne te Zeruzelem təlam nesey masa aŋga ɓeley ava wudiya ana hay fakwanay.

²⁶Amaa Zeruzelem masa aŋga da baymaləvaŋ sə, aŋga mapəla, aŋga sə, aŋga mamaŋ tandakwa,

²⁷afa mavinda dapa Ɗelewer mavəna, gege: «Wesley, kaa ŋgwaz dəlay, masa wudiyak hay aabay. Cə lalaw eve mewesley, kaa masa kwa ka ka cəna mehec te mesef aabay, afa ŋgwaz jakəzlarɗay sə, a ta ŋgat wudeh gaa ka fəna ta ŋgwaz masa aŋga ava wudeh mawulah mabay.»

²⁸Akwar may, malama va dəma hay, takwar sə, akwar wudeh masa akwa heyek ara dapa ma magwaɗa ana daha ara Izak.

²⁹Amaa zleezle wat masa e heyek ara wudeh fakwanay sə, ka ŋgada hahar kad wat masa e heyek jaka pe Mesfen Mavəna. Kwa təlam nesey, ara aŋga ana jaŋgata.

³⁰Mavinda, gege: «Mbasana ŋgwaz ɓeley ava wudiya, afa wat ana a da cam jene ava wut ta ŋgwaz masa aŋga ɓel bay.»

³¹Ara nesey, malama va dəma hay, andakwa wudeh ta ŋgwaz ɓel bay, amaa andakwa wudeh ta ŋgwaz masa aŋga mapəla.