Read Cuvok Galat hay 5 Bible Online

Galat hay 5 - Cuvok bible

Galat hay 5

¹Kəristi ka mbəlandakwa avəda, afa andə da njahakwa ndah mapəla paɗ. Ara nesey, masasala vaw, akwar ta vana cəv kad ndana da vahdakwar kad pa jajarɓay te ɓel sabay.

²Mecəkefiyey zləmay! Yey Pawl, ya gwaɗakwaɗay: Daha akwar ka ŋgəla ŋgwal, ŋgesey, jə masa te Kəristi ta ŋgiya kad akwar sə, a ta jəna nda aabay.

³Ya wun zləmay saya, kad nda masa a wal ma ta ŋgəl ŋgwal sə, ŋgesey, cama nda ana a nahan yaŋ kad pə ma majawa ta Muyiz fakwanay.

⁴Akwar mayaha metər ka ndah mambəla ana fa yam te ndey ta Zlavay jaka pe cəv ta ma majawa sə, ŋgesey akwar mavəna ava Kəristi. Asaya, akwar ka zana mambəla ana ta Zlav masa aŋga ta vakwar sə, avəda.

⁵Andaw sə, anda pə mawulak yaŋ taciya da yaŋ Zlav a ta paɗandaw ka ndah mambəla ana fa yam te ndey tata. Nesey ana sə, jə masa anda ɓəliya jaka pa gədaŋ te mesfen Mavəna masa e ŋgə mezlər dapa andaw jaka pa makəsparav.

⁶Daha ndana aŋga macama ava Yesu Kəristi sə, kwa ŋgwal tata maŋgəla, kwa maŋgəla aabay sə, fakwanay jene amta. Jə mambəla ana sə, makəsparav masa e ŋguzdek jaka pa mawal vaw.

⁷Akwar ke zlerek mambəla ana, naa mazlacakwar sə, wa? Madarakwaɗ ma ta manah yaŋ kad pa ma metehwe ana sə, wa?

⁸Mawulak yaŋ ana nesey sə, e dek da vara Zlav nda mazalakwar bay.

⁹Masənafa: «Is kusetke sə, mak maɓəsla kəfa mahaɗa avəda fakwanay.»

¹⁰Yey sə, ya pakwar ka ndah mambəla ana, afa andakwa macama ava Bay Mazlakava Yesu Kəristi. Ya səniya, akwar sə, akwa wulak yaŋ ara taaɗaw. Amaa, nda mafəcakwar sə, kwa aŋga waawa, Zlav a ta təɗana ma yaŋ.

¹¹Taaɗaw sə, malama va dəma hay, daha ya bəzad ma da yaŋ maŋgal ŋgwal jə mambəla ana saya sə, naa ndana hay aca ŋgediyey hahar sə, mafay te melemey? Ara nesey, mabəzad ma da yaŋ maməc te Yesu fa hap sə, a tər ara jə te mezəmec fa rav ta ndana hay sə, a ŋgana gwagumaw?

¹²Da lada sə, ndah mafəcakwar ana ŋgesey sə, ece re dey lana vaw teceŋ avəda təlam nesey.

¹³Malama va dəma hay, Zlav a zalakakwar sə, afa akwar da njah dapa mapəla vaw. Amaa dapa mapəla vaw ana sə, akwar ta ŋgə jene ara mekekesl ta vaw takwar ta waya war bay. Sesəker, mavə yaŋ takwar dapa mawal vaw, majən vaw dapa taɓa takwar.

¹⁴Ma majawa ta Muyiz fakwanay macama dapa ma amta: «Wal ndana ara ka ta wal yaŋ takaa.»

¹⁵Amaa daha akwa hac vaw, akwa ŋgə gada dapa taɓa takwar ara gənaw hay sə, ŋgesey, map leŋgesl akwar ta zana yaŋ takwar bay.

¹⁶Macəna jə masa ya wal ma ta gwaɗakwar: Manjahay ara masa Mesfen Mavəna ta waya, ara nesey, akwar te ŋgə jə masa slaw ta vaw ta waya sə, ɓasabay,

¹⁷afa jene hay mambəla ana aabay masa slaw ta vaw ta waya sə, aca ŋgə vəram ava jə masa Mesfen Mavəna ta waya. Asaya, jene hay masa Mesfen Mavəna ta waya sə, aca ŋgə vəram ava jə masa slaw ta vaw ta waya, dapa taɓa teceŋ sə, vəram ɓa. Ara nesey, akwar ta zlafa meŋgə jə masa akwar ta waya sə, ɓasabay.

¹⁸Amaa daha Mesfen Mavəna a padakwaɗ ma sə, ŋgesey, ma majawa ta Muyiz a zlafa meŋgə bay da yaŋ akwar ɓasabay.

¹⁹Mezlər masa slaw ta vaw ta ŋgiya sə, ece weley: Makəs vaw fa zaŋ ana, meŋgə jene hay masa a ndara nda, meŋgə jene ta hwar hay,

²⁰mekekəred kad pa mbat hay, meslemedey, suwe, maŋgə gada, səlek, mazam rav, mapay, magal yaŋ, mavən vaw, mahal vaw gəva va gəva,

²¹meŋgə ndey fa jə ta ndana, mekwey, mambarhwalam va mezlər hay mekele mekele ara nesey ana. Ya sləfakwaɗ saya ara masa ya ka gwaɗakwar dəga zleezle cay: Ndah maŋga tərsam te jeŋ ana hay ara nesey sə, ac ta ŋgat manjah dapa Wunam ta bay ta Zlav aabay.

²²Amaa jene hay masa ece dek dapa Mesfen Mavəna sə, ac ara nesey: Mawal nda, mewesley, metehey, mepə sek, metekweney, meŋgə jene mambəla ana, meŋgə mezlər eve cəvey ana,

²³makwaɗma va matəhaz mekekesl ta vaw. Ma majawa a ŋgə vəram mafay ta ma ana hay nesey sə, aabay.

²⁴Kwa waawa masa ka tərata ka nda te Yesu Kəristi sə, slaw ta vaw va jə mambəla ana aabay masa a waya fakwanay sə, ka daraɗ fa hap mazləlawa.

²⁵Mesfen Mavəna ka vandakwa mesfeney, ara nesey magərakwaɗ manjah tandakwa kad aŋga, da padandakwaɗ ma.

²⁶Anda ta gəlakwa yaŋ bay, anda ta zəmakwa rav dapa taɓa tandakwa bay, anda ta ŋgakwa səlek bay.