Read Cuvok Galat hay 6 Bible Online

Galat hay 6 - Cuvok bible

Galat hay 6

¹Malama va dəma hay dapa makəsparav daha akwar ka wala ndana aŋga dapa meŋgə mebərey kwa wula wula, akwar ndah ava Mesfen Mavəna ɓa, majəna nda ana te mevehek avəda kad pe cəv mambəla ana. Amaa akwar ta jəniya ana sə, eve leŋgesl eve leŋgesl. Map leŋgesl fə yaŋ takwar, afa akwar de təɗ pe mebərey ana ŋga bay may.

²Majən vaw dapa taɓa takwar. Daha akwa ŋgiya ara nesey, e ŋguzdek manah yaŋ takwar kad pə ma majawa te Kəristi,

³afa daha ndana ka paɗ yaŋ tata ara aŋga nda mazlakava, amaa anjəkar aŋga ara jene taambəla, e ŋgə ŋgesey, a fəc yaŋ tata.

⁴Da lada sə, kwa waawa da wuzaɗa mezlər tata mambəla ana. Daha a wala mezlər tata ana mambəla ana sə, e de wesley da yaŋ mezlər tata ana ŋga war, bəna a ta cacaliya eve mezlər ta nda mekele bay,

⁵afa kwa waawa a ta zaɓ jene tata.

⁶Da lada sə, nda masasəraka ma ta Zlavay, a da vəna zleley tata fakwanay masa aŋga ava aŋga, ava nda masasərakan ma ana.

⁷Akwar ta fəca yaŋ takwar bay! Ndana a zlafa masasarafa Zlav bay. Jə masa ndana ta sləkiya sə, a ta cə sə, aŋga ana.

⁸Nda masa a slak jə masa a wafa kad slaw ta vaw tata sə, ŋgesey, a ta cə sə, jə masa slaw ta vaw tata ana te heyekey, ara megweɗey, a ta zana yaŋ tata avəda. Amaa daha a slak jə masa a wafa Mesfen Mavəna, ŋgesey, a ta cə sə, jə masa Mesfeney ana ta hayiya, ara megweɗey, manjah katar ka midakw.

⁹Andə ta yəvakwa te meŋgə jə mambəla ana bay, afa daha andə ka yəvakwa aabay, kasl pa pas ana sə, ŋgesey, andə ta ŋgatakwa meyəv te mezlər tandakwa.

¹⁰Ara nesey, daha ha a məzandakwa sə, maŋgakwa jə mambəla ana kad ndana hay fakwanay, mahwalhwala ana, kad malamaŋ va dəmaŋ tandakwa hay dapa makəsparav.

¹¹Mawala alfabey hay mavinda mazlaŋw zlaŋw ana nesey. Yey, ya ta vindakwaɗ ava ha taaɗaw.

¹²Ndah matatəkakwar ka ta ŋgal ŋgwal sə, ac ndah mayaha mehehəm vara ndana hay jaka pe mezlər ta slaw ta vaw, afa Zuwef hay ec de yehefec ma mafay ta maməc te Kəristi fa hap mazləlawa bay.

¹³Ndah masa ŋgwal tec maŋgəla ana ŋgesey sə, eceŋ ava yaŋ teceŋ ana, aca nah yaŋ kad pə ma majawa ta Muyiz aabay. Amaa aca wal sə, akwar da ŋgəla ŋgwal takwar, afa aca ra ŋgə həɓa eve mezlər masa ac ta ŋgiya da yaŋ akwar.

¹⁴Yey sə, ya wal ma ta ŋgə həɓa mafay te jene pal amta: Jeŋ ana sə, hap masa Bay tandakwa Mazlakava Yesu Kəristi mazləlawa fətiya. Jaka pa hap mazləlawa ana ŋgesey sə, vavara mazləlawa avəda mafay taaɗaw, yey may, ya mazləlawa avəda mafay ta vavara.

¹⁵Mafay ana, kwa daha ŋgwal takwar maŋgəla, kwa maŋgəla aabay sə, a jəna nda aabay, amaa jə mambəla ana sə, metər ka nda waya.

¹⁶Da lada sə, Zlav de vec metehey va mambəla ana tata kad ndah manaha yaŋ kad pe mesesərekey ana nesey va kad ndah tata Isreyel.

¹⁷Kad fəma nesey sə, kwa ndana e te ŋgediyey marga sabay. E zler dəga ta pəsna sə, ya da vara Yesu, vevek te mbəlek hay fa vaw aɗaw e ŋguzdekey.

¹⁸Malama va dəma hay, da lada sə, Bay tandakwa Mazlakava Yesu Kəristi da pəsafakwar ma. E de ŋgey!