Read Cuvok Efez hay 1 Bible Online

Efez hay 1 - Cuvok bible

Efez hay 1

¹Yey Pawl, ya maslaŋ te Yesu Kəristi jaka pa mawulak yaŋ ta Zlavay, ya vində leeter nesey kad ndah ta Zlavay va makəsparav hay te Yesu Kəristi masa ac dapa berne te Efez.

²Da lada sə, Zlav Papaŋ tandakwa va Bay Mazlakava Yesu Kəristi ac da vakwar mapəsma va metehey.

³Mambaɗakwa Zlavay, Papaŋ ta Bay tandakwa Mazlakava Yesu Kəristi. Ka pəsafandakwa ma ava mapəsma hay te Mesfen fakwanay masa ac da baymaləvaŋ jaka pa macam vaw tandakwa ava Kəristi.

⁴Ka paɗandakwa ha wal jaka pa Kəristi wagaa a ta zlar malam vavara afa andə da tərakwa ka ndah tata mapana, ndah masa ec eve mebər fa yam te ndey tata aabay. Dapa mawal nda tata,

⁵ka ləmadaɗandakwa ha dəga zleezle, afa andə da tərakwa ke wudeh tata jaka pa Yesu Kəristi. Ka wal maŋgiya ara nesey ana dapa mambəla ana tata,

⁶afa andə da mbaɗakwa mesek ta mambəla ana tata, masa aŋga ta ŋgandakwa jaka pa Wudiya masa a waya elehey,

⁷jaka pa aŋga, jaka pe bembez tata, andə ka mbəl tandakwa dapa jene hay masa ece teh bay, mebər tandakwa hay mapəla avəda. Ara nesey, Zlav ka ŋguzdandakwa mambəla ana tata macəkuma bay,

⁸ka kwakwacaɗ a yaŋ andakwa macəkuma bay. Ava mambəla ana tata ŋgesey, andə ka ŋgatakwa mesen jene hay fakwanay ve leŋgesl.

⁹Ka ŋguzdandakwaɗ maləmad vaw te mezlər tata masa maraɓa. Dapa mambəla ana tata, ka kəsa mawulak yaŋ ta maŋgiya ana dəga zleezle jaka pa Kəristi.

¹⁰Maləmad vaw ana nesey, Zlav a ta ŋgiya dapa pas te mendəv te jene hay fakwanay. Pas ana ŋgesey, a ta cam jene hay fakwanay da baymaləvaŋ va dapa vavara a hwaɗ ta ha ta bay amta, bay ana sə, Kəristi.

¹¹Dapa macam vaw ava Kəristi may, andə ka ŋgatakwa meven ta ma tandakwa masa magwaɗa ana daha, afa Zlav ka yahaɗandakwa ha dəga zleezle dapa maləmad vaw tata. Ara nesey, e ŋgə jene fakwanay sə, ara masa ka kəsa mawulak yaŋ ana va masa ka walaw.

¹²Ara nesey, andakwa masa mapana mawulak yaŋ kamma ta maŋgat jene dapa Kəristi sə, mahahəmakwa membeɗ ta Zlavay.

¹³Dapa macam vaw ava aŋga saya, akwar ka cəna mabəzad ma te metehwe ana, Labara mambəla ana masa ka hwadakwar membəley. Dapa macam vaw ava aŋga saya, akwar ka kəs pa rav. Zlavay may, ka ɗalakwar ava jə ta maɗal nda tata, jeŋ ana sə, Mesfen tata masa ka wulak mavakwar dəga zleezle.

¹⁴Mesfeney ana sə, aŋga jə magəha macaaca ana masa Zlav ta piya kad ndah tata, kasl pa pas te membəl mamaɗ yaŋ ana masa andə ta camakwa slam ta manjah tandakwa. Mehehəmey de ŋgə kad membeɗ tata.

¹⁵Mawala mafay te mey, yey may, dəga dapa masa ya ta cəna ma da yaŋ makəsparav takwar da yaŋ Bay Mazlakava Yesu va da yaŋ mawal nda takwar kad vara ndah ta Zlavay,

¹⁶ya gərda meŋgə wasay kad Zlavay mafay takwar aabay. Ya slaf mezel takwar dapa macə mbahw aɗaw hay,

¹⁷afa Zlav ta Bay tandakwa Mazlakava Yesu Kəristi, Zlav Papaŋ masa aŋga eve mehehəm mabay, jaka pe Mesfen tata da vakwar leŋgesl te mevən jene hay masa a da ŋguzdakwaɗ yaŋ tata, afa akwar da səna eve metehwe ana,

¹⁸a da wuna ndey takwar kad fe meweɗ tata, afa akwar da səna map mawulak yaŋ da yaŋ jə te meŋget wula masa a zalakwar kad pa. Asaya, afa akwar da səna mehehəm te membeɗ tata va mehehəm te jene hey masa ndah tata ac ta camiya.

¹⁹Asaya, afa akwar da səna gədaŋ tata mazlakava masa aŋga ta ŋguzdiya jaka pe mezlərey kad andakwa makəsparav hay. Gədaŋ ana ŋgesey sə, masa Zlav ta ŋguzdiya, ka fəna gədaŋ hay fakwanay,

²⁰masa e pərekek Kəristi dapa maməcay, a njahaɗ fa slam ta bay a ha ta zam tata da baymaləvaŋ.

²¹Dərŋga sə, Kəristi a ŋgə bay da yaŋ Gədaŋ ta bay hay fakwanay, da yaŋ Matimaazlaɓ hay fakwanay, da yaŋ Gədaŋ hay mazlakava fakwanay, da yaŋ Bay da yaŋ jene hay fakwanay va mezel hay mekele fakwan masa te mepey, kwa dapa vavara masa təlam nesey va masa maayaŋ kad fəma.

²²Aŋga, Zlav ka paɗ jene hay fakwanay a dara sek te Kəristi. Ka paɗ a yaŋ jene hay fakwanay, ka vana manjah ka yaŋ ta Macam yaŋ ta ndah ta Zlavay.

²³Macam yaŋ ta ndah ta Zlavay sə, aŋga vaw te Kəristi. Kəristi aŋga dapa macam yaŋ ana fakwanay cəɗem cəɗem. Aŋga nda masa manəha slam da baymaləvaŋ va vavara.