Read Cuvok Efez hay 2 Bible Online

Efez hay 2 - Cuvok bible

Efez hay 2

¹Akwar may, zleezle akwar sə, akwar ka njah ndah maməca mafay te mezlekey va mebər takwar hay.

²Akwar manjaha sə, dapa macəp zlav ta vavara nesey. Akwa nah yaŋ sə, kad bay ta damkwaw hay masa aŋga dapa memeɗ. Mesfeney ana ŋgesey, e ŋgə mezlər dapa ndah maŋgaŋgəra nda pəsna.

³Zleezle sə, andakwa fakwan andə ka njahakwa ara eceŋ ana may, anda cəpakwa mekekesl ta slaw ta vaw tandakwa. Anda ŋgakwa jene sə, ara masa slaw ta vaw va mawulak yaŋ tandakwa ta waya. Ara nesey, mafay ta masa anda hayakakwa dapa mebərey sə, anda ɓəlakwa mazam ta rav ta Zlavay ara ndah dərziya may.

⁴Amaa metekwen ta Zlav kad ndana sə, mabay. Mafay ta mawal nda tata mazlakava masa aŋga ta walandakwa ava aŋga ŋgesey sə,

⁵andakwa masa andə ka məc tandakwa mafay te mezlek tandakwa, ka tərandakwa avəda ta manjah eve ndey dapa Kəristi. Akwa mbəlek dapa mebərey sə, jaka pa mambəla ana ta Zlavay.

⁶Dapa macam vaw tandakwa ava Yesu Kəristi, Zlav ka pərakakandakwa avəda dapa maməcay ava aŋga ka ta ŋgə bay ava aŋga da baymaləvaŋ.

⁷A ŋgiya ara nesey sə, ka ta ŋguzad mambəla ana tata masa e cecel aabay maayaŋ kad fəma jaka pa mambəla ana tata masa aŋga ta ŋguzdandakwaɗ jaka pa Yesu Kəristi,

⁸afa akwa mbəlek dapa mebərey sə, jaka pa mambəla ana tata, jaka pe cəv ta makəsparav. Membəley ana nesey sə, e dek da varakwar bay, maviya Zlavay.

⁹Membəley ana nesey, e dek dapa mezlər takwar bay, afa kwa ndana da zlafa meŋgə həɓa bay,

¹⁰afa malamakandakwa sə, Zlavay. A lamakandakwa dapa macam vaw tandakwa ava Yesu Kəristi, afa andə da ŋgakwa mezlər hay mambəla ana, mezlərey ana hay masa Zlav ka ləmadaɗ ha dəga zleezle, afa andə da ŋgakwa mezlər ava aŋga.

¹¹Masənafa, zleezle sə, akwa heyek dapa tərsam te Zuwef hay bay. Zuwef ana hay aca zalakwar ndah masa ŋgwal maŋgəla bay. Eceŋ sə, aca zal yaŋ teceŋ, ndah masa ŋgwal tec maŋgəla mafay ta masa ndana hay ta ŋgəliya.

¹²Masənafa, dapa ŋgesey ana, akwar ava Kəristi aabay. Ma magwaɗa ana daha jaka vara Zlavay dapa majaw ma tata hay ava ndah tata sə, ke ŋgə kad akwar aabay. Akwar manjaha dapa vavara sə, akwar ava mawulak yaŋ ta maŋgat jene aabay, akwar ava Zlav aabay.

¹³Amaa təlam nesey, dapa macam vaw takwar ava Yesu Kəristi, akwar masa zleezle akwar dəreŋ ava Zlavay. Kəristi ka ŋgucakakwar avəda kad vara Zlavay jaka pe bembez tata,

¹⁴afa aŋga sə, meteh tandakwa. Ke tərec Zuwef hay va ndah masa Zuwef hay bay sə, ka tərsam amta. Ava mavə mesfen tata fa hap mazləlawa sə, ka mbəɗa galaŋ te mevənec sə, avəda. Galaŋ ana sə, vəram.

¹⁵Ka vavəsa mehehəm ta ma majawa ta Muyiz va kwakwas tec hay avəda. A ŋgiya ara nesey sə, afa e de tərec Zuwef hay va ndah masa Zuwef hay bay sə, ka tərsam mekele waya dapa macam vaw ava aŋga. Ara nesey, ka paɗ metehey pa taɓa teceŋ,

¹⁶ke tərec tərsam ana hay cuweeney nesey ka vaw amta, ke dərezlecen ma teceŋ ava Zlavay. Jaka pe cəv ta hap mazləlawa, ka mbəɗa vəram ana avəda.

¹⁷Ke dekey ka ta bəzad metehey ara labara mambəla ana kad ndah masa ac ka njah dəreŋ va kad ndah masa ac ka njah zef,

¹⁸afa jaka pa Kəristi, andakwa Zuwef hay va ndah masa Zuwef hay bay, andə ka ŋgatakwa cəv ta mahusa a cak ta Zlav Papaŋ jaka pe Mesfen pal amta.

¹⁹Ara nesey, akwar ndah masa Zuwef hay bay, akwar məlaŋ hay sabay, akwar ndah maslaayam hay sabay, amaa akwar ndah ta wunam ava ndah ta Zlavay, akwar ndah da hwaɗ ta way ta Zlavay.

²⁰Ac ka paɗakwar a yaŋ sek ta way masa ac maslaŋ hay va ndah mehwedek ma. Kekeŋ macəɓa mambəla ana da macakiya ana hay sə, Yesu Kəristi ava yaŋ tata ana.

²¹Dapa macam vaw ava Yesu Kəristi, way macacala mambəla ana sə, a vana gədaŋ, e gəley, e tər ka way ta kwakwas mavəna kad Bay Mazlakava.

²²Dapa macama vaw ava Kəristi, akwar may, aca lamakwar fa slam ana ava ndah dərziya, afa akwar de tər ka way masa Zlav a ta njah dapa jaka pa Mesfen tata.