Read Cuvok Efez hay 3 Bible Online

Efez hay 3 - Cuvok bible

Efez hay 3

¹Mafay ana, yey Pawl, ya ara nda masa maɓəzla dapa daŋgay dapa mezler te Yesu Kəristi mafay takwar ndah masa Zuwef hay bay.

²Eve metehwe ana, akwar ka cəna ma magwaɗa da yaŋ mezlər masa Zlavay dapa mambəla ana tata ka gərawa pa ha aɗaw te meŋgey mafay takwar.

³Jaka pa maŋguzad jene tata, Zlav ka ŋguzdawa maləmad vaw tata maraɓa dəga zleezle, ara masa ya ka vindakwaɗ ma da yaŋ ana kusetke da wudam.

⁴Daha akwa jaŋgə leeter ana nesey sə, akwar ta səna avəda, yey sə, ya sən ma masa maraɓa da yaŋ Kəristi mambəla ana.

⁵Zleezle sə, Zlav ke ŋguzdecen ma maraɓa ana nesey kad ndana hay ara masa aŋga te ŋguzdecen təlam nesey jaka pe Mesfen tata kad maslaŋ tata hay mavəna va kad ndah mehwedek ma tata hay sə, aabay.

⁶Ma maraɓa ana sə, a wal megweɗ ara nesey: Jaka pe cəv ta Labara mambəla ana, ndah masa Zuwef hay bay sə, ac ta ŋgat macam jene hay mambəla ana masa Zlav ta ləmadiya kad ndah tata Zuwef hay, ec te tərec ka vaw amta, ac ta ŋgat jə masa Zlav ka gwaɗa daha, e te vecen kad ndah tata dapa Kəristi.

⁷Ya ka tərata nda maŋga mezlərey jaka pa gədaŋ te mezlər masa Zlav ta vuwa dapa metekwen tata, eve meŋguzdek gədaŋ tata mazlakava.

⁸Yey, nda masa metekweɗ ana deveŋ ndah ta Zlav fakwanay. Ya ka ŋgat metekweney ana ka ta bəzad Labara mambəla ana da yaŋ mambivaw magaa ana te Mesfeney dapa Kəristi kad ndah masa Zuwef hay bay

⁹va mepenecen ma da yaŋ ana kad ndamagəda hay fakwanay, cəv masa Zlav e ŋgə maləmad vaw tata maraɓa dəga zleezle. Aŋga masa malama jene hay fakwanay, ka raɓaɗ maləmad vaw ana nesey ha dəga zleezle,

¹⁰afa təlam nesey, mbalay jaka pa Macam yaŋ ta ndah ta Zlavay, Maskəla hay maŋga bay va Maskəla hay masa ac ava matimaazlaɓ da baymaləvaŋ sə, aca zlafa masən leŋgesl te meven jene hay ta Zlavay mekele mekele.

¹¹Fakwanay nesey sə, e ŋgə ara maləmad vaw ta Zlavay masa aŋga ta ŋgiya dəga zleezle. A ŋgiya ana sə, jaka pa Yesu Kəristi, Bay tandakwa Mazlakava.

¹²Dapa macam vaw tandakwa ava Yesu Kəristi va makəsparav tandakwa da yaŋ ana, andakwa mapəla paɗ te meŋguzdek yaŋ tandakwa fa yam te ndey ta Zlavay kwa ava mawulak yaŋ ecew ecew aabay.

¹³Mafay ana, ya kəɗakwar ha, akwar ta məca vaw takwar mafay ta marga hay masa ya ta siya mafay takwar na bay. Marga ana hay nesey sə, ac ta vakwar mehehəmey.

¹⁴Mafay ana, ye kekəred fəma ta Zlav Papaŋ,

¹⁵masa tərsam hay da baymaləvaŋ va dapa vavara fakwanay aca ŋgat mezel tec vara vaw,

¹⁶a da zlafa makəsiya ara membeɗ tata masa aŋga eve mehehəm mabay, da sasala nda masa aŋga dapa akwar jaka pa gədaŋ mazlakava te Mesfen tata.

¹⁷A da vakwar makəsparav masa Kəristi da njah dapa rav takwar, da vakwar slaslalay va masasalakwar dapa mawal vaw,

¹⁸afa akwar da zlafa masəna ava makəsparav hay fakwanay mewuney, zambəla, megəley va mezlel ta mawal nda te Kəristi sə, aŋga memey

¹⁹va masəna mawal nda te Kəristi masa a fəna mesen jene fakwanay, afa Zlav da nəhakwar ava mambivaw tata fakwanay.

²⁰Kad Zlav masa a zlafa meŋgə jene jaka pa gədaŋ tata mazlakava masa e ŋgə mezlər dapa andakwa, ka fəna masa andə ta nəkakwa va masa andə ta wulakakwa.

²¹Da lada sə, ndana hay aca ra hahəmaw dapa Macam yaŋ ta ndah ta Zlavay, jaka pa Yesu Kəristi cəɗem cəɗem va katar ka midakw. E de ŋgey!