Read Cuvok Efez hay 4 Bible Online

Efez hay 4 - Cuvok bible

Efez hay 4

¹Yey masa ya maɓəzla dapa daŋgay mafay ta Bay Mazlakava nesey, ya kəɗakwar ha: Madaɗ dapa mambəla ana ara masa Zlav ta zalakwar ta maŋgiya.

²Manahda yaŋ cəɗem cəɗem, manjah makwaɗma hay, ndah mapana sek dapa jene hay. Maɓəs vaw fa vaw takwar amta amta ava mawal vaw.

³Meŋgə gədaŋ ta matəhaza macam vaw masa Mesfen Mavəna ta vakwar dapa meteh masa a camakwar amta va amta.

⁴Vaw sə, aŋga pal amta, Mesfeney, aŋga pal amta, ara aŋga ana map mawulak yaŋ ta maŋgat jene sə, aŋga pal amta may, nesey jə masa Zlav ta zalakakwar kad pa.

⁵Bay Mazlakava, aŋga pal amta, makəsparav, pal amta, beetem, pal amta,

⁶Zlavay, aŋga pal amta, aŋga Papaŋ ta ndana hay fakwanay, a ŋgə bay da yaŋ ndana hay fakwanay, e ŋgə mezlərey ava ndana hay fakwanay va a njah dapa ndana hay fakwanay.

⁷Kwa waawa tandakwa ka ŋgat mambəla ana ta Zlavay, ara gədaŋ te mezlər masa Kəristi ta vəniya kad kwa waawa.

⁸Mavinda dapa Ɗelewer mavəna gege: «Dapa masa a ŋgaɗ vaw kad wudam sə, ke həlec ndah masa ece təhezekec dapa vəram sə, avəda daha, ke vec gədaŋ te meŋgə mezlərey kad ndana hay.»

⁹Yaw, «ka ŋgəɗata kad wudam» sə, a wal megweɗ gwagumaw? A wal megweɗ sə, ka bəraŋgata kad pa slam dapa dar ta vavara ɗagay.

¹⁰Nda mebəreŋgek nesey sə, meveh kad baymaləvaŋ a wudam sə, aŋga ana, afa a da nəha jene hay fakwanay.

¹¹Mavana gədaŋ wal te meŋgə mezlər kad ndana hay sə, aŋga ana: Ndah leŋgeɗey, e pec ka maslaŋ hay, te leŋgeɗ hay, e pec ka ndah mehwedek ma, ŋgeɗ hay saya, ka ndah mabəzad labara mambəla ana, ŋgeɗ hay ka gwala jene hay, daha aabay ka ndah masasəraka ndana hay.

¹²A ŋgiya ara nesey sə, afa e de jənec ndah tata, ac da zlafa meŋgə mezlər tata ta magal vaw te Kəristi

¹³kasl masa andə ta hus tandakwa fakwanay fa slam ana pa macam vaw ta makəsparav va masən Wut ta Zlavay. Andə ta tərakwa ka ndah masəfa ara Kəristi masa ka maɗa jene hay avəda fakwanay.

¹⁴Eve cəvey ana nesey, andə ta njahakwa ara wudeh ɓasabay. Andə ta tərakwa ara kaslkaslah wuje masa meŋgeŋgel ta yam ta daŋgwafiya sə, aabay. Memeɗ te mesesərek hay mambəla ana aabay sə, a ta zlafa mazəɓandakwa ara masa aŋga ta waya sə, ɓasabay. Ndah mafəca nda sə, wewer tec hay ac ta zlafa mafəcandakwa va mazandakwa ɓasabay.

¹⁵Amaa eve megweɗ metehwe ana dapa mawal vaw, andə ta gəlakwa dapa jene hay fakwanay kad vara nda masa aŋga yaŋ ta vaw, a wal megweɗey, Kəristi.

¹⁶Mbalay aŋga, masa vaw aŋga malama ara jə masasala, manjəɓa mambəla ana fe ndelek fe ndelek ara Zlav ta viya. Ara nesey, daha kwa waawa ta gəva ta vaw e ŋgə mezlər tata sə, vaw fakwanay e gəley, e sekey jaka pa mawal vaw.

¹⁷Mawala masa ya gwaɗakwar, ya nəkafakwar ava mavahda saya dapa mezel ta Bay Mazlakava: Akwar ta njah ara ndah masa aca sən Zlav bay sə, sabay. Eceŋ sə, mawulak yaŋ tec e hwedec kad pa mazay.

¹⁸Leŋgesl tec aŋga dapa ləvaŋ. Mesfen masa Zlav a viya sə, aca ŋgatiya aabay, afa ac ka tərata ndah masa ece sen jene bay mahwalhwala ana da yaŋ Zlavay, rav tec ka sasalata.

¹⁹Hwar dapa ndey tec kwa kusetke ɓasabay, ec ke kezlec pa makəs vaw fa zaŋ ana va meŋgə jene hay maləza mekele mekele kwa e ŋgel aabay.

²⁰Takwar sə, akwa sesərekek da yaŋ Kəristi ana ara na bay.

²¹Akwar ka cəna jene hay fakwanay da yaŋ Kəristi, ac ka sasərakakwaɗ manjah dapa makəsparav fakwanay ara metehwe ana masa anda ŋgatakwa dapa Yesu.

²²Ara nesey, a lada akwa gərda manjah takwar mezleezle ana. Macəkwa vaw takwar mezleezle ana masa akwar ka njah dapa masa mawulak yaŋ ta mafəca nda tata a hwad nda kad pa magədas nda sə, avəda.

²³A lada akwa vana cəv kad Mesfeney da ŋgwada leŋgesl takwar, akwar de tər ka waya fakwanay.

²⁴Mapaɗ fa vaw takwar vaw waya masa Zlav ta lamiya ara mawulak yaŋ tata, afa a da njah dapa meŋgə mezlər eve cəvey ana va mavəna vaw ava jene hay maləza masa e dek dapa metehwe ana.

²⁵Mafay ana, magərda maŋgal ma, kwa waawa de gweɗ ma metehwe ana kad maslavda tata, afa andakwa fakwanay gəva hay ta vaw amta va amta.

²⁶Daha rav a zamakwar sə, akwar te ŋgə mebər bay. A lada pas da kazlafakwar dapa mazam rav bay.

²⁷Akwar ta vana cəv kad bay ta haalay de ŋgə bay da yaŋ akwar bay.

²⁸Nda masa e kərey sə, da gərda makar, a lada de ŋgə mezlər ava ha tata eve cəvey ana masa a da ŋgat mazlafa majən ndah masa aca hwar jene.

²⁹Ma hay masa mambəla ana aabay sə, de təhek dapa ma takwar kwa kusetke bay. Sesəker megweɗ sə, ma hay mambəla ana masa a ta jəna nda, masa e te gəlec ndana hay fəma fəma dapa makəsparav va ma hay masa e te ŋgec mambəla ana kad ndah macəkafakwar zləmay.

³⁰Akwar ta ŋgə jə masa a da məcan vaw te Mesfen Mavəna masa aŋga ta vakwar bay, afa Mesfeney ana ŋgesey, aŋga ara tampaŋw mapa fakwar masa e de ŋguzdek akwar ndah tata, a da mbəlakwar avəda ava aŋga dapa pas te membəley.

³¹Magərda magwaɗ ma hay masa dendərek kad ndana, ma hay masa a ta guvaɗ rav ta ndana ka zam rav, mazam rav, mapay ava ndana va malaf nda. Malaləka vaw takwar fe suwe hay fakwanay.

³²Metər ka ndah mambəla ana dapa taɓa takwar amta va amta, meŋgə metekwen fa nda dapa taɓa takwar. Mapal mebər fa vaw takwar ara masa Zlav ta pəlakwaɗ takwar jaka pa Kəristi.