Read Cuvok Efez hay 5 Bible Online

Efez hay 5 - Cuvok bible

Efez hay 5

¹Mazazahw Zlavay, afa akwar wudeh masa a walakwar elehey.

²Manjah dapa mawal vaw ara masa Kəristi ta walandakwa. Ka vana yaŋ tata avəda kad Zlavay mafay tandakwa ara mavə jene taambəla daha aabay mavə jene eve mesfeney ka ta ŋgə kwakwas, ara mal te meŋgeŋgez masa a wafa kad Zlavay.

³Akwar sə, akwar ndah ta Zlavay, mafay ana, kwa jene ara makəs vaw fa zaŋ ana, meŋgə tərsam te jə maləza hay va meŋgə ndey fa ndana sə, a lada de cen da varakwar bay, ara masa da lada kad ndah ta Zlavay.

⁴Ara aŋga ana, magwaɗ ma ta hwaray, ma hay masa saw va meseser fa nda. Zuwan akwar ta gwaɗ ma hay te meŋgə wasay kad Zlavay.

⁵Masəna mambəla ana, kwa nda amta makəsa vaw fa zaŋ ana, nda maŋgana jə maləza va nda masa a wal jene hay fakwan kad aŋga. Mawal jene hay fakwan kad aŋga nesey, a wal megweɗ sə, matə mbat. Tərsam ta ndah ana hay ŋgesey, ac ta ŋgat mesehw pa Wunam ta bay te Kəristi va Zlavay sə, aabay.

⁶Da lada sə, ndana da zlakdakwar ava ma ta maŋgal ma ta mafəca nda bay. Tərsam te mebərey ana hay nesey sə, e hwedek mazam ta rav ta Zlavay kad yaŋ ndah maŋgaŋgəra nda hay.

⁷Akwar ta ŋgə jene ara ec bay.

⁸Zleezle sə, akwar ləvaŋ, amaa təlam nesey, dapa macam vaw takwar ava Bay Mazlakava, akwar slam mawaɗa. Manjahay ara wudeh ta slam mawaɗa,

⁹afa slam mawaɗa sə, e heyek sə, meŋgə jə mambəla ana, meŋgə mezlər eve cəvey ana va metehwe ana.

¹⁰Meŋgə gədaŋ ta masən jə masa a wafa Bay Mazlakava.

¹¹Akwar ta ŋgə mezlər hay ta ləvaŋ masa ece heyə aabay ŋga bay, amaa meŋguzdekec kad a vəda,

¹²afa jə masa ndah ana aca ŋgiya meereɓ ŋgesey sə, kwa makar maɗay ana, e ŋgə hwaray.

¹³Amaa daha jeŋ ana hay fakwanay ŋgesey mapəlaha avəda sə, ece weley jaka pa slam mawaɗa,

¹⁴afa jə mapəlaha fakwanay mambəla ana sə, a tərata slam mawaɗa. Mafay ana ma ɓa ke gweɗ, gege: «Pərekek takaa, kaa masa manja waŋ, pərek dapa maməcay, ara nesey, Kəristi a ta waɗakaa.»

¹⁵Mep leŋgesl mambəla ana fa manjah takwar. Akwar ta njah ara ndah marəzla bay, amaa manjah ara ndah masəna mavən jene,

¹⁶masa aca ŋgə jə mambəla ana dapa pas hay pəsna nesey, afa pas ana hay masa pəsna nesey sə, ac mambəla ana aabay.

¹⁷Mafay ana, akwar ta njah ara ndah masa ec eve leŋgesl aabay bay, amaa macəna mambəla ana masa Bay Mazlakava a ɓəliya da varakwar.

¹⁸Akwar ta kwə ava wuzam[1] bay, afa makwa nda ta wuzam sə, a had nda pe meŋgə jene hay saw. Amaa manəha vaw ta akwar eve Mesfeney.

¹⁹Maslə law hay fa slam ana dapa Jaabura, law hay ta mahahəm Zlavay va law hay masa Mesfen ta vakwar. Maslə law hay va mamɓaɗ Bay Mazlakava ava rav takwar fakwanay.

²⁰Maŋgana wasay kad Zlav Papaŋ cəɗem cəɗem mafay te jene hay fakwanay eve mezel ta Bay tandakwa Mazlakava Yesu Kəristi.

²¹Akwar ndah macənan ma te Kəristi, macən ma fa vaw takwar.

²²Akwar ŋgwaza hay, mecənecen ma ta mawulah takwar ara masa akwa cənan ma ta Bay Mazlakava,

²³afa mawal sə, aŋga yaŋ ta ŋgwaz, ara Kəristi aŋga yaŋ ta Macam yaŋ ta ndah ta Zlavay. Kəristi, aŋga nda mambəla Macam yaŋ ta ndah ta Zlavay masa aŋga vaw tata.

²⁴Amaa ara masa Macam yaŋ ta ndah ta Zlavay ta cənan ma te Kəristi, a lada ŋgwazah ece re cənecen ma ta mawulah teceŋ dapa jene hay fakwanay.

²⁵Akwar mawula hay, mawal ŋgwazah takwar ara Kəristi ta wal Macam yaŋ ta ndah ta Zlavay kasl pa mavə mesfen tata mafay teceŋ.

²⁶Ka wal mapaɗ macam yaŋ ta makəsparav ana hay ara nesey wal kad Zlavay ava dəɓa te mepenec ava yam te beetem jaka pa ma tata.

²⁷Ka wal meŋguzdek macam yaŋ ana dapa meteh tata fakwanay fəma tata ana ava magwazav fa vaw aabay, ndey magursa aabay, kwa jene mazləɓa fa vaw aabay, aŋga mapana, kwa ndana mazlafa megweɗ mambəla ana aabay fətiya bay.

²⁸Ara aŋga ana, mawal da wal ŋgwaza ara aŋga ta wal vaw tata. Nda masa a wal ŋgwaza sə, ŋgesey, a wal yaŋ tata ana.

²⁹Kwa ndana masa vaw tata a ndarana sə, aabay, sesəker a ndana jene, a pafa leŋgesl, ara Kəristi ta ŋgiya kad Macam yaŋ ta ndah ta Zlavay,

³⁰andakwa sə, andakwa gəva hay ta vaw tata bay geyey?

³¹Mafay ana, ndana a ta gərda papaŋ va mamaŋ, a ta cam vaw ava ŋgwaza, ec cuweeney ec te tərec ara nda amta.

³²Ma metehwe ana mazlakava maraɓa dapa slam ana na ɓa. Da vara yey sə, ma ana e gweɗ da yaŋ Kəristi va Macam yaŋ ta ndah ta Zlavay.

³³Amaa ma ana e gweɗ kad akwar may. Da lada sə, kwa waawa takwar da wal ŋgwaza ara yaŋ tata, ŋgwaz may da nahan yaŋ kad mawula.