Read Cuvok Efez hay 6 Bible Online

Efez hay 6 - Cuvok bible

Efez hay 6

¹Akwar wude hey, menehecen yaŋ kad papaŋ va ta mamaŋ takwar hay dapa Bay Mazlakava, afa ara nesey mambəla ana.

²«Hehəlecen yaŋ ta papakw va mmakw» sə, ŋgesey, ma majawa macaaca ana masa ava ma magwaɗa ana daha dapa, gege:

³Afa ka da ŋgat mambivaw va manjah gaa dapa vavara.

⁴Akwar papaŋ hay va mamaŋ hay, akwar te zəmecen rav te wudeh takwar bay, amaa megəlec dapa mesesərekeceŋ. Megəlec dapa mesesərekeceŋ va mevec mamənak masa e dek da vara Bay Mazlakava.

⁵Akwar ɓel hay, menehecen yaŋ kad bay ta way takwar hay dapa vavara nesey, eve meleley va mekekesl feceŋ, ava rav mapana ara kad Kəristi.

⁶Akwar ta ŋgiya sə, fa yam te ndey tec babəla ara masa akwa yah mehehəm vara ndana hay bay, amaa meŋgə jə masa Zlav a waya ava rav takwar fakwanay ara ɓel hay te Kəristi.

⁷Meŋgec mezlər kad bay ta way takwar hay ava rav mambəla ana, ara akwar ta ŋgiya kad Bay Mazlakava, bəna ara kad ndana bay.

⁸Akwa səniya, kwa waawa masa e te ŋgə mezlər mambəla ana sə, a ta ŋgat meyev tata vara Bay Mazlakava kwa aŋga ɓeley, kwa aŋga mapəla.

⁹Akwar may, bay ta way hay, maŋgaw ara aŋga ana kad ɓel takwar hay. Akwar te heyefec ndey bay, akwa səniya, akwar va ɓel takwar ana hay sə, Bay takwar aŋga da baymaləvaŋ. Aŋga sə, a pal nda meepel aabay.

¹⁰Ke te meɗey sə, majaha vaw dapa macam vaw ava Bay Mazlakava va dapa gədaŋ tata mazlakava.

¹¹Mapaɗ jə ta vəram hay ta Zlavay fa vaw, afa akwar da zlafa mezlec mambəla ana fəma te wewer ta bay ta haalay,

¹²afa andə ta ŋgakwa vəram ana sə, ava ndamagəda bay, amaa eve mesfen hay mazlakava, mesfen hay masa ac ava gədaŋ va mesfen hay maŋga bay da yaŋ vavara ta ləvaŋ nesey. Asaya, eve mesfen hay mambəla ana bay masa ac da baymaləvaŋ.

¹³Mafay ana, təlam nesey, mapaɗ jə ta vəram hay ta Zlav fakwanay fa vaw, afa akwar da ŋgat majah vaw dapa pas masa mambəla ana aabay va mezlec deŋ dapa vəram dekw pe memeɗey ana.

¹⁴Maləmada vaw meezlecey, ara megweɗey: Majawaɗ metehwe ana a ŋgwah ara kanda. Mapaɗ meŋgə mezlər eve cəvey ana sə, ara rəkwat ta mbal fa vaw.

¹⁵Mahwar mabəzad Labara mambəla ana te metehey sə, da njah ara tahkar dapa sek.

¹⁶Matəhaza makəsparav sə, ka gambar takwar cəɗem cəɗem, afa a da vakwar cəv ta mar hav hay magəɗa ava kwakwaw fətiya fakwanay ta nda suwe.

¹⁷Mamaɗ yaŋ ana sə, makəs membəley ara tarakwa va ma ta Zlavay ara kafaya masa Mesfen Mavəna ta viya.

¹⁸Da lada sə, Mesfen da hahaɗa dar ta macə mbahw takwar dapa tərsam ta macə mbahw hay mekele mekele, dapa menək jene hay takwar dapa pas wula wula. Manjah eve ndey dapa macə mbahw mafay ta ndah ta Zlavay fakwanay, akwar te yəv bay.

¹⁹Macə mbahw mafay taaɗaw, afa daha ye gweɗey sə, Zlav da paɗ ma tata pa ma aɗaw masa ya da zlafa mabəzad jə maraɓa ta Labara mambəla ana kad ndana hay ava zidaw kwa kusetke dapa vaw aabay.

²⁰Kwa ya majawa dapa daŋgay təlam nesey, ya maslamda ta Zlavay ka ta bəzad Labara mambəla ana jaŋgata. Mafay ana, macə mbahw, afa ya da bəzad Labara ana ava zidaw kwa kusetke dapa vaw aabay ara masa ya da gwaɗiya.

²¹Ya wal sə, akwar may, akwar da səna manjah taaɗaw va mezlər masa ya ŋgiya. Tisek, malama masa ya waya elehey, aŋga nda maŋga mezlər ta Bay Mazlakava eve cəvey ana, a ta ŋguzdakwaɗ labara ana fakwanay.

²²Ya zləraɗ kad varakwar faŋga sə, ya səniya, afa a da gwaɗakwaɗ ma da yaŋ manjah taciya fana va matəkakwaɗ rav.

²³Da lada sə, Zlav Papaŋ va Bay Mazlakava Yesu Kəristi de vec metehey, mawal vaw va makəsparav kad malamaŋ hay va dəmaŋ hay.

²⁴Da lada sə, mambəla ana ta Zlavay da njah da yaŋ ndah masa aca wal Bay tandakwa Mazlakava Yesu Kəristi ava mawal vaw masa e ndəv aabay.