Read Cuvok Fəlipi hay 1 Bible Online

Fəlipi hay 1 - Cuvok bible

Fəlipi hay 1

¹Pawl va Timawtey, ndah maŋga mezlər te Yesu Kəristi, anda vində leeter nesey kad Macam yaŋ ndah ta Zlav fakwanay dapa Yesu Kəristi masa ac dapa berne te Filipi ava mesnendə tec hay va ndah majəna makəsparav hay.

²A lada Zlav Papaŋ tandakwa va Bay Mazlakava Yesu Kəristi ac da vakwar mambəla ana va metehey.

³Cəɗem cəɗem masa ya wulak yaŋ da yaŋ akwar sə, ya ŋgə wasay kad Zlavay aɗaw.

⁴Cəɗem cəɗem dapa masa ya cə mbahw mafay takwar fakwanay sə, ya ciya eve mewesley,

⁵mafay ta masa akwar macama ava andaw dapa mabəzad Labara mambəla ana dəga dapa pas macaaca ana kasl pəsna.

⁶Jene pal amta ɓa masa ya səniya eve metehwe ana: Zlav masa ka zlara mezlər mambəla ana nesey dapa akwar, a ta cəpiya kasl pe memeɗey ana pa pas masa Yesu Kəristi e te vehekey.

⁷Kad yey sə, jə mambəla ana macəkuma bay ta mawulakafakwar yaŋ fakwanay, afa ya ka paɗakwar pe leŋgesl aɗaw. Akwar masa kwa ya dapa daŋgay va masa ya dapa maŋgə vəram mafay ta mabəzad Labara mambəla ana, akwar ka cam vaw eve yey dapa mambəla ana ta Zlavay masa aŋga te ŋgiyey.

⁸Zlav sə, aŋga nda mata yaw da yaŋ yey, a səniya, ya walakwar fakwanay ara masa Yesu Kəristi ta wal nda.

⁹Macə mbahw taaɗaw sə, nesey: A lada mawal nda takwar de gel fəma fəma, a da jənakwar mabay ta masəna jene hay mambəla ana va macəna jene hay mambəla ana,

¹⁰afa akwar da zlafa mavən jə masa mambəla ana. Ara nesey, akwar ta tərata ka ndah mapana, ndah masa kwa ma da yaŋ ec aabay dapa pas te mevehek te Kəristi.

¹¹Akwar ta ŋgat mezlər hay masa ac ara aŋga ana mabay dapa manjah takwar mbalay Yesu Kəristi, kad pa mambaɗ Zlavay va mahahəlan yaŋ.

¹²Ya wal sə, masəna, malama va dəma hay: Jə masa aŋga te ŋgetefiyey nesey sə, sesəker ka jəna nda ta mazlazlan Labara mambəla ana de gel fəma fəma.

¹³Ndah da way ta bay hay fakwanay va ndah fəla fəla fakwanay aca səniya təlam nesey ya maɓəzla dapa daŋgay sə, mafay te mezlər te Kəristi.

¹⁴Ha mazlakava ta malamaŋ hay makəsparav ac ka ŋgat gədaŋ dapa makəsparav teceŋ kad vara Bay Mazlakava mafay ta masa ece weleyey ya dapa daŋgay nesey. Aca ŋgə gədaŋ saya ta mabəzad ma ta Zlavay, kwa ac ava zidaw ɓasabay.

¹⁵Eve metehwe ana, ndah leŋgeɗey deveŋ eceŋ, aca bəzad ma te Kəristi ava meŋgə səlek fiyey, ŋgeɗ hay ava maŋgaŋgar vaw. Amaa ta ndah dərziya sə, aca bəzad ma da yaŋ Kəristi ava mawulak yaŋ mambəla ana.

¹⁶Ndah ana ŋgesey aca ŋgiya ava mawal vaw sə, afa aca səniya, ya fana nesey sə, afa ya dapa meŋgə vəram mafay ta Labara mambəla ana.

¹⁷Amaa ndah dərziya aca bəzad ma te Kəristi ava maŋgaŋgar vaw, mawulak yaŋ tec masa ac ta kəsiya sə, mapana aabay. Aca wulak matəkafa ha manjah taaɗaw dapa daŋgay sə, de ŋgə gədaŋ dapa.

¹⁸Nesey ana sə, kwa e ŋgiyey jene aabay, kwa daha mawulak yaŋ tec mambəla ana, mambəla ana aabay, jə mambəla ana sə, aca ra bəzad ma te Kəristi. Taaɗaw sə, ye wesley. Kwa maayaŋ kad fəma nesey, ye te wesley jaŋgata,

¹⁹afa ya səniya, mamaɗ yaŋ ta marga ana hay nesey, e te hwediyey pe membəley mbalay macə mbahw takwar va majəna nda te Mesfen te Yesu Kəristi.

²⁰Ya ɓəliya e de ŋgə zef zef va masa ya hwar maŋgatiya, ya ta zal marava mafay ana aabay. Sesəker təlam nesey, kwa ewey ewey sə, ya səniya metehwe ana ya ta ŋguzadiya kad ndana hay masa Kəristi aŋga mazlakava jaka pa manjahay aɗaw, kwa dapa manjah eve ndey, kwa jaka pa maməcay aɗaw.

²¹Taaɗaw sə, Kəristi sə, aŋga manjahay aɗaw eve ndey. Maməcay sə, aŋga meyəvey aɗaw.

²²Amaa daha manjah eve ndey dapa vavara nesey, e viyey cəv te meŋgə mezlər masa a ta jən ndana hay sə, ŋgesey, ya san jə masa ya yahiya sabay.

²³Leŋgesl aɗaw ka vənata ecew: Ya hwar maməcaɓa, ya ra ta njahaɓa a cak te Kəristi, nesey jə mambəla ana,

²⁴amaa manjah eve ndey dapa vavara nesey, aŋga mambəla ana jaŋgata mafay takwar.

²⁵Asaya, ya səniya eve metehwe ana, ya səniya ya ta njahay eve ndey, a lada ya da njah da cak takwar fakwanay ka ta gəlakwar fəma fəma va manjah eve mewesley dapa makəsparav takwar.

²⁶Ara nesey, pas masa ya ka ta husata a cak takwar, akwar te wesley dapa macam takwar ava Yesu Kəristi mafay taaɗaw.

²⁷Jə mazlakava ana sə, manjahay ara Labara mambəla ana da yaŋ Kəristi te gweɗey, afa kwa daha ya daɗ faŋga ka ta wuzaɗakwar, kwa daha ya daɗ faŋga aabay, a lada ya cəna ece gweɗ da yaŋ akwar: Akwar masasala dapa leŋgesl takwar amta, ava maŋgə vəram fa slam ana ava rav amta ara makəsparav masa magasa fa Labara mambəla ana.

²⁸Akwar ta ŋgə zidaw kwa kusetke fa maslagəra takwar hay bay. Ara nesey, ac ta səna avəda masa eceŋ ava yaŋ teceŋ ana ac dapa cəv ta mazay. Amaa kad akwar sə, akwar ta səna avəda masa akwar ka mbəlata. Ŋgesey ana sə, jə masa e dek da vara Zlavay.

²⁹Zlav ka ŋgakwar mambəla ana ta maŋgana mezlər kad Kəristi sə, afa akwar da kəs ma tata babəla bay, amaa afa akwar da sə marga hay mafay tata may.

³⁰Təlam nesey akwar ka camata eve yey dapa vəram masa zleezle akwar te weleyey dapa, akwa səniya masa ya ta ŋgiya saya.