Read Cuvok Fəlipi hay 2 Bible Online

Fəlipi hay 2 - Cuvok bible

Fəlipi hay 2

¹Daha macam vaw takwar ava Kəristi a sasalakwar, mawal nda tata a vakwar gədaŋ, akwar macama eve Mesfen Mavəna, akwa ŋgə mambəla ana va meŋgə metekwen fa ndana hay,

²ara nesey, manəhawa mewesley aɗaw ava manjah dapa macacal ma: A lada mawal nda takwar de ŋgə amta, rav takwar de ŋgə amta va mawulak yaŋ takwar de ŋgə amta.

³Akwar te ŋgə jene ava maŋgaŋgar vaw bay, ava magal yaŋ bay, amaa ava manah yaŋ, mepec ndah dərziya ka ndah mazlakava da yaŋ akwar.

⁴A lada ndana e de pə ndey fa yaŋ tata aŋga amta bay, amaa fa ndah dərziya may.

⁵Manjah ara nesey ana dapa taɓa takwar, ara manjah ta ndah masa ac dapa Yesu Kəristi.

⁶Dəga zleezle sə, aŋga Zlavay, amaa ka wal manjah cəɗem cəɗem ara Zlavay ana sə, aabay.

⁷Sesəker ka səkwataɗ vaw ta Zlavay sə, ha, ka paɗ manjah ta nda maŋga mezlərey fa vaw, ka tərata ara ndana hay, ndana hay ka səna avəda aŋga sə, aŋga ndana.

⁸Ka paɗ yaŋ tata ana ka nda mekusetke ana, ka tərata nda manaha yaŋ kasl pa maməcay, maməc masa fa hap mazləlawa.

⁹Mafay ana, Zlav ka baŋgaɗaɗ a yaŋ jene hay fakwanay, ka vana Mezel masa a fəna mezel hay dərziya fakwanay.

¹⁰Afa ara nesey, eve mezel te Yesu, ndana hay fakwanay da baymaləvaŋ, dapa vavara va da dara vavara, ec re kekəredey fəma tata

¹¹va masa tərsam hay fakwanay ec re gweɗey: Yesu Kəristi sə, aŋga Bay Mazlakava. Ara nesey, ac ta hahəm Zlav Papaŋ.

¹²Ara nesey, guula aɗaw hay masa ya walakwar elehey, akwar masa akwar ka nahawa yaŋ cəɗem cəɗem dapa masa ya da cak takwar faŋga. Mambəla sə, maŋgaw mafəna ana saya təlam nesey masa ya faŋga aabay. Meŋgə mezlər te membəl takwar eve meleley va mekekesley fəma ta Zlavay,

¹³afa Zlav aŋga dapa meŋgə mezlər dapa akwar, a da tərakwar ka ndah masa aca zlafa mawal meŋgə mezlər masa e də ara maləmad vaw tata.

¹⁴Akwar te ŋgə jene fakwan eve mehwehwer bay, kwa ava mawulak yaŋ ecew ecew bay,

¹⁵afa akwar de tər ka ndah masa ma da yaŋ akwar aabay, akwar ndah mapana, wudeh ta Zlavay masa kwa magwazav fa vaw aabay dapa taɓa ta ndah maŋga mezlər ara aŋga ana aabay va ndah mambəla ana aabay ta vavara nesey. Meweɗ dapa taɓa teceŋ ara menjewzle hay te weɗ da baymaləvaŋ,

¹⁶ava mebəzedec ma ta manjah katar ka midakw. Meweslə taaɗaw da yaŋ akwar sə, a ta ŋgata gaa pas te mevehek te Kəristi, afa mezlərey aɗaw va marga aɗaw ec de tər ke jene taambəla bay.

¹⁷Kwa daha bembez aɗaw a ta cəhata ara wuzam macəha kad veŋ jə mava te meŋgə kwakwas masa aŋga makəsparav takwar. Ŋgesey, ye wesley, ye te wesley a yaŋ ana mafay takwar fakwanay.

¹⁸Ara aŋga ana, akwar may, mewesley, mewesley eve yey.

¹⁹Ya wulakiya dapa Bay Mazlakava Yesu ta mazlərakwaɗ Timawtey, afa daha ka ta husata varakwar sə, a ta ŋguzdawa labara takwar hay masa e te viyey gədaŋ.

²⁰Kwa ya ka ŋgat ndana mekele macəna jə masa ya ta cəna va mawulaka jə masa ya ta wulakiya da yaŋ akwar sə, aabay, say aŋga ana. Aŋga sə, a wulak yaŋ metehwe ana da yaŋ akwar.

²¹Ta ndah dərziya fakwanay aca wulak sə, meŋgə jə masa ac ta ŋgatiya dapa kad ec war, bəna masa ta Yesu Kəristi bay.

²²Amaa aŋga sə, akwar ka wala masa aŋga te ŋguzdek mezlər tata mambəla ana. Ke ŋgə mezlər eve yey dapa mabəzad Labara mambəla ana ara wat da cak ta papaŋ.

²³Ya wulak ma ta zləraɗ kad varakwar daha ya ka ta wala manjahay aɗaw nesey ka ŋgata afəcaka.

²⁴Ya səniya eve metehwe ana dapa Bay Mazlakava masa yey ava yaŋ taaɗaw ana, mbala ya ta daɗ kad varakwar.

²⁵Ya ka wala mambəla ana, zuwan ya zlərakwaɗ malama Epafərawdit. Aŋga sə, aŋga nda masa andə ka ŋgə mezlər ava aŋga va maŋgə vəram ava aŋga fa slam ana. Akwar ke zlərekey ke te jəniyey dapa masa ya hwar jene.

²⁶Matakwam takwar a ŋgana mabay, a wal a da walakwar fakwanay. Yaŋ tata ka ɓaslata mabay, afa akwar ka cəna masa ka ŋgə gwabay.

²⁷Eve metehwe ana, ka ŋgə gwabay, vaw tata ana ka padan ma bac pa maməcay. Amaa Zlav ka ŋgafa metekweney. E ŋgiya ana sə, fətiya aŋga amta bay, amaa ke ŋgefiyey may, afa a da məcawa vaw mafəna ana bay.

²⁸Ya vasiya ta mazlərakwaɗ zef kad varakwar sə, afa daha akwar ka ta wala sə, akwar te wesl mabay saya va masa e de həlefiyey marga hay.

²⁹Ara nesey, makəsaw eve meweslə mazlakava dapa Bay Mazlakava. Mekəsec tərsam ta ndah ana ara ŋgesey ava manah yaŋ,

³⁰afa ka husa kasl pa mawala maməcay mafay te mezlər te Kəristi. Ka və yaŋ tata kwa kad pa maməcay ke te hwediyey majəna nda masa akwar ava yaŋ takwar ana akwar ka zlafa maŋgiya aabay, afa akwar dəreŋ.