Read Cuvok Fəlipi hay 3 Bible Online

Fəlipi hay 3 - Cuvok bible

Fəlipi hay 3

¹Magəra nesey sə, malama va dəma hay, mewesley dapa Bay Mazlakava. Yey sə, ye yəv ta mavahakwaɗ ma hay masa ya ka vindakwaɗ cay sə, aabay. Kad akwar sə, a ta sasalakwar dapa manjah takwar.

²Mepə leŋgesl fa gəda hay nesey, ndah maŋga mezlər hay masa ece teh bay, map leŋgesl fa ndah mavana mehehəm kad maŋgal ŋgwal.

³Afa ndah masa ŋgwal tec maŋgəla eve metehwe ana sə, andakwa, ndah makəɗana ha kad Zlavay jaka pa gədaŋ te Mesfen Mavəna. Anda pakwa meweslə tandakwa dapa Yesu Kəristi, andə ka pakwa mawulak yaŋ tandakwa fa kwakwas hay ta ndana ana hay ŋgesey sə, aabay.

⁴Yey may, ya zlafa maŋgə həɓa mambəla ana da yaŋ kwakwas ta ndana hay ana ŋgesey. Daha ndana a wulak maŋgə həɓa mafay ta kwakwas ana hay, ŋgesey, ya may, ya ta zlafa meŋgə həɓa ana ka fəna gaa.

⁵Aca ŋgəlawa ŋgwal sə, dapa manah cahkar ava dəɓa te meheyey aɗaw. Yey sə, ye heyek dapa tərsam te Isreyel hay, da hwaɗ ta way ta gwalay Benjemeŋ. Yey sə, ya nda Ebəre ana per. Jaka gəva ta ma majawa sə, ya nda Farisa ana.

⁶Mafay ta matəhaz rav sə, ya ka ŋgada hahar kad Macam yaŋ ta ndah ta Zlavay. Jaka gəva te meŋgə mezlər ara aŋga ana masa meŋget dapa ma majawa sə, kwa ndana a ŋgat ma da yaŋ yey kusetke aabay.

⁷Anjəkar jeŋ ana hay ŋgesey, zleezle ye ke pec ara meŋget jene, amaa təlam nesey, ye welec ara asar a mafay te Kəristi.

⁸Ye pec jeŋ ana hay fakwanay ara asar sə, mafay ta masan Yesu Kəristi, Bay Mazlakava aɗaw masa aŋga jə mambəla ana macəkuma bay mafəna jene hay fakwanay. Ye ke gərdec jene hay fakwanay mafay tata, ye pec jene hay fakwanay ara jene hay makwiya dapa cuwey, afa ya da ŋgat Kəristi

⁹va macam vaw ava aŋga. Ya wulak masa yey sə, ya nda maŋga mezlər ara aŋga ana mafay ta ma majawa masa ya ŋgiya sə, aabay, amaa mafay ta makəsparav dapa Kəristi. Meŋgə mezlər ara aŋga ana ŋgesey, e dek da vara Zlavay va masa a gas vaw fa makəsparav.

¹⁰Jə masa ya waya sə, nesey: Masan Kəristi va gədaŋ mazlakava te mepərekek tata dapa maməcay, macam vaw dapa marga tata hay va metər ara aŋga dapa maməc tata,

¹¹afa daha e ŋgey sə, ya da ŋgat mapərakata dapa maməcay.

¹²Ya zlafa megweɗ ya ka ŋgata jə masa ya pə ndey fətiya fakwan sə, avəda cay, daha aabay ya ka husata pa mamaɗ yaŋ te jene hay fakwanay cay sə, aabay. Amaa ya ŋgə gədaŋ ta mahway ya da ŋgata avəda, afa Yesu Kəristi ana ke təheziyey avəda.

¹³Malama va dəma hay, ya wulakiya masa ya ka ŋgata jə masa ye pə ndey kad fətiya ana cay sə, aabay heley, amaa ye ŋgə jene pal amta: Ya sənafa jene hay masa ye te gərekec ava dəɓa sabay, ya ŋgaɗ vaw kad fe jə masa aŋga fəma.

¹⁴Ara nesey, ya ŋgaɗ vaw kad vara jə masa ye pə ndey kad fətiya, ka ta ŋgat jə te meyəv masa Zlav ta zalandakwa da wudam mafay ana jaka pa Yesu Kəristi.

¹⁵Andakwa fakwanay, masa andakwa masəfa dapa makəsparav nesey sə, manjahakwa ara nesey ana may. Yaw, daha jene mekele masa akwa cəna wal ava masa ya wulakiya sə, Zlav a ta wunakwaɗ ndey takwar fətiya.

¹⁶Amaa təlam nesey, pa slam masa andə ka husak tandakwa pa, amcakwa dapa cəv amta ana ŋgesey.

¹⁷Malama va dəma hay, mezezəhwiyey akwar fakwanay. Map ndey fa ndah masa ece dey dapa macəp mececel masa ac ta ŋgatiya da varandaw.

¹⁸Yaw, ya ka gwaɗakwar dəga zleezle, ya gwaɗakwar təlam na saya ava makuɗa, ndana hay gaa ece dey ara maslagəra ta hap mazləlawa te Kəristi.

¹⁹Mamaɗ yaŋ ta manjah teceŋ sə, mazay, afa zlav teceŋ sə, hwaɗ teceŋ, aca ŋgə həɓa sə, da yaŋ jene hay masa ec te hwedec hwaray. Dapa yaŋ teceŋ sə, maŋgara jene hay ta vavara war.

²⁰Tandakwa sə, wunam tandakwa aŋga da baymaləvaŋ, masa anda ɓəlakwa Nda mambəla nda, Bay Mazlakava Yesu Kəristi e te dek dərŋga.

²¹Daha ka ta dakata, a ta ŋgwadandakwaɗ vaw tandakwa masa gədaŋ aabay ka ta təraɗ ara vaw tata masa aŋga eve mehehəmey. A ta ŋgiya ana sə, ava gədaŋ masa a vana cəv ta mapaɗ jene hay fakwanay a dara matimaazlaɓ tata.