Read Cuvok Fəlipi hay 4 Bible Online

Fəlipi hay 4 - Cuvok bible

Fəlipi hay 4

¹Ara nesey, malama va dəma hay masa ya walakwar elehey, akwar masa matakwam takwar e kəɗiyey mabay, akwar ndah mewesldeyey va akwar mataɗa ta matəkaɗ yaŋ aɗaw. Majaha vaw mambəla ana ara nesey dapa Bay Mazlakava, akwar ndah masa ya walakwar elehey.

²Ye vec gədaŋ kad Evawdi va Siŋtik aca ra njah ava macacal ma dapa Bay Mazlakava.

³Yaw, kaa may, nda masa anda ŋgə mezlər ava kaa metehwe ana, ya nəkafakaa, mbahw jənec ŋgwaza hay ana ŋgesey, afa ac ka ŋgə vəram eve yey ta mabəzad Labara mambəla ana kad ndana hay. Asaya, Kəlemaŋ va ndah mekele masa andə ke ŋgə mezlər fa slam ana eve eceŋ, masa mezel tec mavinda dapa ɗelewer ta manjah katar ka midakw.

⁴Mewesley cəɗem cəɗem dapa Bay Mazlakava. Ya vahda saya, mewesley.

⁵Da lada sə, ndana hay aca ra səna mambəla ana takwar. Bay Mazlakava aŋga hukw cay.

⁶Akwar ta paɗ mawulak yaŋ takwar a yaŋ jə masa akwa huriya bay, amaa dapa pas wula wula fakwanay, maŋguzdan jə masa akwa huriya sə, kad Zlavay dapa macə mbahw, makəɗana ha va maŋgana wasay.

⁷Ara nesey, meteh ta Zlavay masa a fəna leŋgesl hay fakwanay a ta ɓəlafa rav takwar va mawulak yaŋ takwar dapa Yesu Kəristi.

⁸Mamaɗ yaŋ ana, malama va dəma hay, jə metehwe ana hay fakwanay, jene hay masa ndana hay aca hahəmiya fakwanay, jene hay masa maŋga eve cəvey ana fakwanay, jene hay masa mapana, jene hay masa ndana hay aca waya, jene hay masa mak ta manah yaŋ, jene hay mambəla ana va jene hay masa ac mak ta mahahəl yaŋ sə, mapaɗ mawulak yaŋ takwar fətiya.

⁹Jene hay fakwanay masa ya ta sasərakakwaɗay, masa akwar ta kəsiya, masa akwar ta cəna va masa akwar ta wala vara yey sə, meŋgə mezlər ava aŋga. Ara nesey, Zlav te metehey a ta njah ava akwar.

¹⁰Ye ke wesl macəkuma bay dapa Bay Mazlakava, afa akwar ke ŋguzdek saya masa akwa wulak yaŋ da yaŋ yey. Mawulak yaŋ ana ŋgesey sə, akwar ava aŋga ɓa cay, amaa akwar ka ŋgat ha ta maŋguzdiya aabay.

¹¹Ya gwaɗakwar ara nesey sə, ya dapa hwar jene bay. Ya ka sasərak taaɗaw ta manjah dapa manjah wula wula eve mewesley.

¹²Ara megweɗey, ya san manjah dapa maslamarga va manjah dapa mambivaw. Dapa jene hay fakwanay va kwa fəla fəla, ya masasəraka dapa membəney ara dapa mandə jene maagaɓal, dapa mambivaw ara dapa mahwar jene.

¹³Ya zlafa maɓəs jeŋ ana hay na fakwanay mbalay Kəristi te viyey gədaŋ.

¹⁴Akwar ke ŋgiyey jene mambəla ana eve mejəniyey dapa marga aɗaw hay.

¹⁵Akwar ndah de Filipi hay, akwar sə, akwa səniya mambəla ana, dəga dapa mezler ta mabəzad ma ta Labara mambəla ana dapa masa ye gərek vavara ta Masiduwan sə, kwa Macam yaŋ hay ta ndah ta Zlavay dapa wunam hay mekele ec ke jəniyey aabay, say akwar babəla.

¹⁶Masa ya dapa berne ta Tisalawnik sə, akwar ke zləriyey jene sek ecew ke te jəniyey.

¹⁷Ya ka yah mavə jene taambəla takwar sə, aabay, amaa jə masa ya yahiya sə, akwar da ŋgat riba kad yaŋ jene hay mambəla ana masa akwa ŋgiya.

¹⁸Ya ava jene hay ɓa masa te mejəniyey, kwa ka fəna nesey ana. Ya ava jene hay fakwanay, təlam nesey, ya ka ŋgat jə masa Epafərawdit te kəsek da varakwar, masa akwar te zlərek ava aŋga. Jeŋ ana hay sə, ac ara mal te meŋgeŋgəzey masa mezekey ana mambəla ana, ara jə ta kwakwas masa Zlav a waya va masa a wafa.

¹⁹Zlavay aɗaw sə, a ta vakwar jene hay fakwanay masa akwa huriya, mafay te zleley tata hay macəkuma bay dapa Yesu Kəristi.

²⁰A lada mahahal yaŋ de ŋgey kad Zlav Papaŋ tandakwa katar ka midakw. E de ŋgey!

²¹Megweɗefec ndah ta Zlavay fakwanay dapa macam yaŋ takwar eve mezel te Yesu Kəristi! Malamaŋ va dəmaŋ hay masa ec vereyey fana aca gwaɗafakwar.

²²Makəsparav hay fakwan fana, aca gwaɗafakwar, mahwalhwala ana, ndah da way ta bay ta Rawma hay.

²³A lada mambəla ana ta Bay Mazlakava Yesu Kəristi da njah eve leŋgesl takwar.