Read Cuvok Kwalawsi hay 2 Bible Online

Kwalawsi hay 2 - Cuvok bible

Kwalawsi hay 2

¹Yaw, ya wal sə, akwar da səna ya dapa meŋgə vəram masa gədaŋ dapa mafay takwar, mafay ta ndah da Lawdikiya va ta ndah mekele masa kwa ec ke weleyey aabay.

²Ya ŋgə vəram mafay teceŋ ana sə, afa ac ra ŋgat gədaŋ, ac ra ŋgat macam vaw dapa mawal vaw va maŋgat masəna jə metehwe masa leŋgesl metehwe ana ta viya. Ara nesey, ac ta səna ma masa maraɓa ta Zlavay sə, avəda, ara megweɗey, Kəristi ava yaŋ tata ana.

³Zleley hay te leŋgesl te meven jene hay va te mesen jene sə, ac maraɓa dapa aŋga.

⁴Ya gwaɗakwar ara nesey sə, afa ndana a da fəcakwar ava ma hay mambəla ana aabay ta maŋgal ma bay.

⁵Masəna sə, kwa daha yey ava yaŋ taaɗaw ana ye deveŋ akwar aabay, amaa leŋgesl aɗaw aŋga ava akwar. Ye wesley, afa ya wala akwar dapa meŋgə jene hay eve cəvey ana va masa makəsparav takwar da yaŋ Kəristi aŋga masasala.

⁶Ara masa akwar ka kəs Yesu Kəristi ka Bay Mazlakava. Ara nesey, manjahay dapa macam vaw ava aŋga.

⁷Makway slaslalay dapa aŋga va malamaɗ manjah takwar fətiya. Masasala vaw takwar cəɗem cəɗem dapa makəsparav ara mesesərek masa akwar ta ŋgatiya va macə mbahw ta maŋgana wasay gaa kad Zlavay.

⁸Mepə leŋgesl, afa kwa ndana da təhazakwar eve dəɓel te leŋgesl te meven jene ta nda magəda bay. Ma ana hay ŋgesey, ma ta mafəc nda va ma masa yaŋ ta ma ana aabay. Leŋgesl te meven jene ana ŋgesey, e dek dapa kwakwas hay ta ndana hay va te mesfen hay maŋga mezlər dapa vavara nesey, bəna da vara Kəristi bay.

⁹Afa Zlavay ava yaŋ tata ana fakwanay aŋga dapa vaw te Kəristi.

¹⁰Dapa macam vaw takwar ava Kəristi ŋgesey sə, akwar eve jene hay fakwanay, afa aŋga bay da yaŋ mesfen hay ta bay va mesfen hay ta matimaazlaɓ.

¹¹Dapa macam vaw takwar ava aŋga, akwar ka ŋgəla ŋgwal takwar avəda. Maŋgal ŋgwal ana ŋgesey sə, masa ndana ta ŋgəliya bay, amaa e dek da vara Kəristi. Ka pəlandakwa avəda dapa manjah tandakwa dapa mebərey.

¹²Ava meŋgə beetem, akwar mapəsaha ava Kəristi, akwar ke pərekek takwar dapa maməcay ava aŋga saya, afa akwar ka kəs gədaŋ ta Zlav mepərekek Kəristi dapa maməcay.

¹³Akwar masa zleezle akwar ara ndah maməca mafay te mebər hay takwar va masa ŋgwal takwar maŋgəla bay dapa slaw ta vaw sə, Zlav ka vakwar mesfeney ava Kəristi: Ka pəlandakwaɗ mezlek hay tandakwa fakwanay.

¹⁴Ka gərda ɗelewer ta majaw nda ava ma masa majaw nda ava ma, ta ma hay ta ma majawa masa a ŋgə vəram ava andakwa ac mavinda dapa, ka zana avəda, ka zləlawaɗ fa hap mazləlawa.

¹⁵Zlav ke cəkwecen gədaŋ ta Maskəla hay maŋga bay va Maskəla hay masa ac ava matimaazlaɓ sə, avəda, ke pec hwar pe ndey fəma ta ndana hay fakwanay, eve metəreŋgec ara ɓel hay fa slam ana dapa ɓarakwa ta Wudiya.

¹⁶Yaw, ara nesey, akwar ta vana cəv kad ndana da jawakwar ava ma da yaŋ jə ta manday, da yaŋ jə ta masay, da yaŋ macunam hay, da yaŋ medek ta kiya fa wudam va da yaŋ pas ta masasak vaw te Zuwef hay bay.

¹⁷Jeŋ ana hay fakwan ŋgesey sə, ac ara meezeŋ te jene hay mambəla ana masa ec te dekey. Amaa jə mambəla ana ŋgesey sə, vaw te Kəristi.

¹⁸Akwar te vec cəv kad ndah masa ece ŋguzdek yaŋ teceŋ jaka avəda ac makwaɗma hay va masa aca kəɗ ha kad maskəla hay da jawakwar ava ma bay. Aca vana mehehəm macəkuma bay kad mesəhwen teceŋ. Tərsam ta ndah ana ŋgesey aca gal yaŋ taambəla jaka pa mawulak yaŋ tec masa e dek dapa slaw ta vaw.

¹⁹Ndah ana ŋgesey, ac macama ava Kəristi masa aŋga yaŋ sə, aabay. Anjəkar mbalay Kəristi masa vaw fakwanay a ŋgat jə ta mandə tata va aŋga macama mambəla ana eve mevez hay va dəmmbazl hay. Ara nesey, e gəley ara Zlav ta waya.

²⁰Daha akwar ka camata dapa maməcay ava Kəristi va akwar ka mbəlata dapa gədaŋ te mesfen hay maŋga bay dapa vavara, naa akwa paɗ yaŋ takwar a dara ma hay masa ndah ta vavara ta jawiya ara masa akwar dapa vavara nesey sə, mafay te mey?

²¹«Ka ta kəsiya bay! Ka ta cakiya bay! Ka ta ɓəla bay!»

²²Jeŋ ana hay ac maŋga ke te nesey, daha mezlər maŋga eve eceŋ cay. Ac ma hay masa ndana hay ta jawiya va mesesərek hay masa ndana hay te wulekekey.

²³Eve metehwe ana, kwakwas ta macə mbahw ta yaŋ ta nda amta, manah yaŋ kad maskəla hay va maŋgada hahar kad slaw ta vaw sə, ac ara leŋgesl te meven jene. Anjəkar ma hay majawa ana ŋgesey aca jəna nda aabay, aca nah sə, kad mawulak yaŋ ta slaw ta vaw tec babəla.