Read Cuvok Kwalawsi hay 3 Bible Online

Kwalawsi hay 3 - Cuvok bible

Kwalawsi hay 3

¹E zler dapa masa akwa pərekek dapa maməcay ava Kəristi sə, mayah jene hay masa ac da baymaləvaŋ, dapa slam masa Kəristi aŋga dərŋga, manjaha da ha ta zam ta Zlavay.

²Mapaɗ mawulak yaŋ takwar sə, da yaŋ jene hay da baymaləvaŋ, bəna da yaŋ jene hay ta vavara bay.

³Afa akwar ka məcata, mesfen takwar aŋga maraɓa da vara Kəristi dapa Zlavay.

⁴Pas masa Kəristi mesfen takwar e te ŋguzdek vaw sə, akwar may, akwar te ŋguzdek vaw ava aŋga ana dapa meweɗ tata.

⁵Mafay ana, makəɗa jə ta vavara hay masa ac dapa akwar sə, avəda, ara: Makəs vaw fa zaŋ ana, meŋgə jene hay maləza nda, mahwar mawal jene, mekekesl kad fe jene masa e teh bay, meŋgə ndey fe jə ta ndana hay. Meŋgə ndey fe jə ta ndana ana ŋgesey sə, aŋga ara mekekəred kad mbat hay.

⁶Nesey, jene hay masa ece tembeɗek mezem ta rav ta Zlavay kad yaŋ ndah maŋgaŋgəra nda.

⁷Zleezle sə, akwar manjaha ara nesey ana may, mebərey ana hay nesey aca ŋgə bay da yaŋ manjah takwar.

⁸Amaa təlam nesey, akwar may, magərda meŋgə jeŋ ana hay na fakwanay: Mehec fa rav, mazam rav, suwe, malaf nda va mesuweh ma hay sə, e de təhek dapa ma takwar bay.

⁹Magərda maŋgal ma fa vaw takwar, afa akwar ka cəkwa vaw takwar mezleezle ana va jene hay tata masa akwar masasəraka dapa sə, avəda cay,

¹⁰akwar ka paɗ vaw waya fa vaw masa a ŋgwad vaw cəɗem cəɗem e de tər ara Zlav nda melemekey, afa akwar da səna mambəla ana.

¹¹Təlam nesey, kwa Zuwef hay va ndah masa Zuwef hay bay, kwa ndah masa ŋgwal maŋgəla va ndah masa ŋgwal maŋgəla aabay, kwa ndah masa ndey tec mawuna bay va ndah masa ndey tec mawuna, kwa ɓel hay va ndah masa ɓel hay bay, ac fakwanay amta. Amaa Kəristi sə, aŋga jene fakwanay, aŋga dapa ndana hay fakwanay.

¹²Ara masa Zlav ka palaɗakwar ha wal kad aŋga, akwar ndah tata mavəna, a walakwar elehey. Mafay ana, mapaɗ mawulak yaŋ te metekweney, te meŋgə jene mambəla ana, ta manah yaŋ, ta makwaɗma va te mepəsek fa vaw takwar.

¹³Maɓəs vaw fa vaw takwar, daha ndana ka ŋgana jene mambəla ana aabay kad nda leŋgeɗey sə, aca ra pal mebərey fa vaw teceŋ. Ara masa Bay Mazlakava ta pəlakwaɗ mebər hay takwar, akwar may, mapal mebərey fa vaw takwar.

¹⁴Jə mahwalhwala ana sə, mapaɗ mawal vaw fa vaw takwar, afa mawal vaw sə, aŋga jə mambəla ana macama ndana hay.

¹⁵Da lada sə, meteh te Kəristi masa Zlav ta zalakakwar kad pa, ke te tər ka vaw amta sə, e de ŋgə bay dapa rav takwar. Manjahay dapa maŋgana wasay cəɗem cəɗem.

¹⁶Da lada sə, ma te Kəristi da njah dapa taɓa takwar macəkuma bay: Masasəraka yaŋ takwar, makət vaw dapa taɓa takwar amta amta eve leŋgesl te meven jene, maslana laway kad Zlavay dapa rav takwar, maŋgana wasay ava law hay ta Jaabura, ava law ta mahahəma nda va ava law hay masa Mesfen Mavəna ta viya.

¹⁷Jene hay fakwan masa akwa zlafa magwaɗiya va masa akwa zlafa maŋgiya sə, maŋgaw eve mezel ta Bay Mazlakava Yesu, ava maŋgana wasay kad Zlav Papaŋ jaka pa aŋga.

¹⁸Akwar ŋgwaza hay, mecənecen ma ta mawulah takwar, ara masa a da wafa Bay Mazlakava.

¹⁹Akwar mawula hay, mawal ŋgwazah takwar, akwar ta zam rav da yaŋ ec bay.

²⁰Akwar wude hey, menehecen yaŋ kad papaŋ va mamaŋ takwar hay dapa jene hay fakwanay, nesey jə masa Bay Mazlakava a ɓəliya da varakwar.

²¹Akwar papaŋ va mamaŋ te wude hey, akwar te zəmecen rav te wudeh takwar bay, afa e te mececen vaw avəda.

²²Akwar ɓel hay, menehecen yaŋ kad bay ta way takwar hay dapa vavara nesey dapa jene hay fakwanay. Meŋgecen mezlər teceŋ, akwar ta ŋgiya sə, ara masa aca jəɗakwar ara akwa yah meŋgə jene masa a da wafa ndana hay bay, amaa ava rav mapəla ta ndah masa ece lel fa Bay Mazlakava.

²³Kwa akwa ŋgə mezlər wula wula sə, maŋgaw ava rav mambəla ana, ara akwa ŋgiya kad Bay Mazlakava, bəna ara kad ndana hay bay.

²⁴Masəna, akwar ta ŋgat macam jene hay ta Bay Mazlakava ara meyəv te mezlər takwar. Bay ta way ana sə, Kəristi, akwar sə, akwar dapa mezlər tata.

²⁵Nda maŋga mezlər ara aŋga ana bay sə, a ta ŋgat meyev tata mambəla ana aabay, afa Zlav sə, a pal nda meepel aabay.