Read Cuvok Kwalawsi hay 4 Bible Online

Kwalawsi hay 4 - Cuvok bible

Kwalawsi hay 4

¹Akwar bay ta way hay, metəhezec ɓel takwar hay mambəla ana dapa meŋgə jene eve cəvey ana va meŋgə jene ara aŋga ana. Masəna, akwar may Bay takwar ɓa masa aŋga da baymaləvaŋ.

²Manjah cəɗem cəɗem dapa macə mbahw. Mepərekey dapa macə mbahw ta maŋgə wasay kad Zlavay.

³Dapa macə mbahw takwar ana sə, masənafandaw may, afa Zlavay a da wunandan ma ta way ta mabəzad ma maraɓa te Kəristi masa ya dapa daŋgay mafay ana nesey.

⁴Macə mbahw, afa ya da zlafa mabəzad ma maraɓa ana ŋgesey va maŋguzdiya mambəla ana ara masa ya mazala ka ta ŋgiya.

⁵Mayah medey eve leŋgesl te meven jene dapa taɓa ta ndah masa aca sən Kəristi bay. Map leŋgesl mambəla ana fa pas hay.

⁶A lada ma hay takwar de wefec ndana hay va de jəneceŋ. Masəna mavah ma mambəla ana kad pa ma ta ndana hay.

⁷Tisek, malamaŋ tandakwa masa ya waya, masa aŋga nda maŋga mezlər eve cəvey ana va masa andə ka ŋgə mezlər ta Bay Mazlakava ava aŋga sə, a ta ŋguzdakwaɗ labara taaɗaw hay.

⁸Ya zləraɗ mahwalhwala ana sə, a da gwaɗakwaɗ labara ta manjah taciya fana va matəkakwaɗ rav.

⁹Awnesim, nda maŋga mezlər eve cəvey ana, malamaŋ tandakwa masa anda walakwa elehey a ta daɗ ava aŋga. Aŋga sə, aŋga nda takwar ana. Ac ta gwaɗakwaɗ jene hay masa ece ŋgə fana fakwanay.

¹⁰Aristarkus, masa andaw ava aŋga dapa daŋgay ka gwaɗafakwar. Markwas[2] malamaŋ ta Barnabas ka gwaɗafakwar may. Akwar ka cəna ma da yaŋ manjah tata cay, daha ka husata varakwar, makəsaw mambəla ana.

¹¹Yesu[3] nda masa aca zaliya Zustus, ka gwaɗafakwar ara aŋga ana may. Ac cecəwe deveŋ Zuwef hay masa e ŋgə mezlər eve yey da yaŋ Wunam ta bay ta Zlavay. Ac ka njahata ara jə ta matək rav kad yey.

¹²Epafəras, nda takwar, ka gwaɗafakwar may. Nda maŋga mezlər te Yesu Kəristi ana ŋgesey ka gərda makəɗ vaw dapa macə mbahw mafay takwar aabay. A cə mbahw ana sə, afa akwar de zlec mambəla ana, akwar de tər ka ndah masəfa dapa Mesfeney va maləmad vaw mambəla ana te meŋgə jə masa Zlav a waya fakwanay.

¹³Ya tə yaw mafay tata, ka və yaŋ tata ta masə marga dapa mabay mafay takwar. Asaya, mafay ta ndah da Lawdikiya va ndah da Hirapawlis.

¹⁴Lukas, guula tandakwa daɓtar va Demas aca gwaɗafakwar may.

¹⁵Megweɗefec malamaŋ hay da Lawdikiya. Asaya, magwaɗafa Nimfa va Macam yaŋ ta ndah ta Zlavay masa aca cam yaŋ da way tata.

¹⁶Daha akwar ka jaŋga leeter ana na cay sə, mezlərecen kad Macam yaŋ ta ndah ta Zlavay dapa berne ta Lawdikiya, afa ac da jaŋgaw may. Majaŋgaw akwar ana, leeter masa e te dek da Lawdikiya [4]sə, may.

¹⁷Magwaɗa Arkip e de pə leŋgesl fe mezlər masa a ŋgatiya da vara Bay Mazlakava, a da ŋgana avəda ara aŋga.

¹⁸Yey, Pawl ava ha taaɗaw ana, ta vindakwaɗ megweɗ fa vaw ana nesey. Masənafa yey sə, ya dapa daŋgay. A lada mambəla ana ta Zlavay da njah ava akwar.