Read Cuvok 1 Tisalawnik hay 2 Bible Online

1 Tisalawnik hay 2 - Cuvok bible

1 Tisalawnik hay 2

¹Akwa səniya mambəla ana, malama va dəma hay, makəsa nda masa akwar ta kəsandaw sə, ke ŋgə taambəla aabay.

²Akwa səniya saya masa anda dek dapa berne te Filipi, ac ka ŋgadandaw marga, ac ka lafandaw. Amaa Zlav ka vandaw gədaŋ, ta mabəzadakwar Labara mambəla ana tata sə, dapa meŋgə vəram hay.

³Mabəzad ma taciya sə, aŋga mazlaca da yaŋ mazlak nda bay, da yaŋ mawulak yaŋ masa e teh bay bay va da yaŋ mayah mafəca nda bay.

⁴Amaa Zlav ka wuzaɗandaw ka ta vandan Labara mambəla ana. Təlam nesey, andaw dapa mabəzad Labara ana, anda bəzadiya sə, masa e de wefec kad ndana hay bay, amaa kad Zlav masa mawuzaɗa rav taciya hay.

⁵Ara nesey, akwa səniya mambəla ana, masa kwa andə ka gwaɗ ma hay ta mafəcakwar sə, aabay. Kwa andə ka paɗ mawulak yaŋ taciya ta maŋgat jene da varakwar sə, aabay. Zlavay aŋga nda mata yaw da yaŋ andaw.

⁶Kwa andə ka yah mahahal yaŋ da vara ndana hay sə, aabay, kwa varakwar, kwa vara ndah mekele.

⁷Anjəkar, mafay ta masa andaw maslaŋ hay te Kəristi, andə te meŋguzdek gədaŋ taciya kad yaŋ akwar. Amaa sesəker, andə ka tər taciya ndah makwaɗma dapa taɓa takwar, ara mamaŋ te wudeh te pefec ndey, te ndec jene.

⁸Andaw ava mawal nda taciya macəkuma bay kad akwar. Andə ka ləmada vaw ta mavakwar sə, Labara mambəla ana ta Zlavay aŋga amta babəla bay, amaa kwa mavə mesfen taciya, afa akwar ndah masa anda walakwar elehey.

⁹Malamaŋ va dəmaŋ taciya hay, akwa sənafa marga hay va meyəv taciya hay. Anda ke ŋgə mezlər hwavavaɗ hwapapas, afa andə da njah kwa fa ha ta nda amta deveŋ akwar masa andə ka bəzadakwar Labara mambəla ana ta Zlav na bay.

¹⁰Akwar sə, akwar ndah mata yaw, Zlavay may, aŋga nda mata yaw, masa manjah taciya kad varakwar makəsparav hay, aŋga mavəna, aŋga ara aŋga ana va masa kwa ma da yaŋ ana aabay.

¹¹Akwa səniya, andə ka ŋgana jene kad kwa waawa dapa taɓa takwar ara papaŋ te wude hey ta ŋgana jene kad wudiya hay.

¹²Andə ka vakwar mamənak hay, andə ka təkakwaɗ rav, andə ka gwaɗakwar dəɓa gaa hay, ta manjah ara Zlav ta waya. Aŋga masa aŋga ta zalakakwar kad pa Wunam ta bay tata va membeɗ tata.

¹³Mawala mafay te mey, jaka gəva taciya masa cəɗem cəɗem anda ŋgana wasay kad Zlavay. Dapa masa akwar ta ŋgat ma ta Zlavay masa andaw ta bəzadakwaɗay sə, akwar ka kəsaw, ara ma ta ndana hay bay, amaa ara aŋga metehwe ana ma ta Zlavay, masa e ŋgə mezlər dapa akwar, makəsparav hay.

¹⁴Malamaŋ va dəmaŋ taciya hay, akwar ka zazahw Macam yaŋ hay ta ndah ta Zlavay masa ac de Zudey masa ac ka kəs ma te Yesu Kəristi. Akwar ka sə marga vara malamaŋ takwar hay ara Macam yaŋ ta ndah ta Zlavay de Zudey ta sə marga da vara Zuwef hay.

¹⁵Makəɗa Bay Mazlakava Yesu va ndah mehwedek ma sə, eceŋ ana, ac ka ŋgadandakwa marga may. Aca wafa Zlavay bay va ac maslagəra hay ta ndana hay fakwanay.

¹⁶Aca randan ma ta mabəzad ma kad ndah masa Zuwef hay bay ke te mbəleceŋ. Ara nesey, pas fakwanay, aca pə mebər hay kad yaŋ mebər tec hay ac da nəhaɗ weh. Amaa mamaɗ yaŋ ana, mezem ta rav ta Zlavay ka təɗata a yaŋ eceŋ.

¹⁷Taciya sə, malama va dəma hay, andaw mavəna ava akwar ta manah kusetke, andaw dəreŋ eve ndey takwar, amaa dapa rav taciya andakwa fa slam ana. Andə ka ŋgə gədaŋ saya, ke te veh kad varakwar ka ta wuzaɗakwar, afa anda hwar mawalakwar eve ndey taciya.

¹⁸Mafay ana, andə ka wal medey kad varakwar. Yey Pawl, ava yaŋ taaɗaw ana, ye ke ŋgə vaw dəɓa gaa hay, amaa Saadan, ka randan ma avəda ta maŋgiya.

¹⁹Daha akwar bay sə, naa ma ta zlafa manjah ka mawulak yaŋ ta maŋgat jene taciya, meweslə taciya, mataɗa taciya masa a ta vandaw mewesley fəma ta Bay tandakwa Mazlakava Yesu pas te mevehek tata sə, wa sa wa?

²⁰Aŋga, akwar sə, mahahal yaŋ taciya va meweslə taciya.