Read Cuvok 1 Tisalawnik hay 3 Bible Online

1 Tisalawnik hay 3 - Cuvok bible

1 Tisalawnik hay 3

¹Masa andə ka zlafa maɓəs meɓəley ana ɓasabay sə, andə ka kəs mawulak yaŋ ta manjah babəla taciya da Atena.

²Andə ka zlərakwar Timawtey, malamaŋ tandakwa kad varakwar. Aŋga, nda maŋga mezlər ava andaw dapa mezlər ta Zlavay ta mabəzad Labara mambəla ana te Kəristi. A daɗay sə, ka ta sasalakwar va mavakwar gədaŋ dapa makəsparav.

³Afa kwa ndana da gwaguzakwar mafay ta marga hay masa aca ŋgadakwar hahar pəsna na bay, afa akwa səniya mambəla ana, andakwa mapa sə, mafay ta marga ana hay ŋgesey.

⁴Dapa masa andaw da varakwar sə, andə ka sləfakwaɗay, masa ndana hay ac ta ŋgadandakwa marga. Akwa səniya, masa jeŋ ana nesey ka husakata cay.

⁵Mafay ana, ara masa ya zlafa maɓəs maɓəliya sabay, ya ka zləraɗ Timawtey kad varakwar, ke te cənek labara ta makəsparav takwar. Ya ka ŋgə zidaw, ya ka wulakaw gəla Nda mafəca nda [1]ka fəcakwar avəda. Ara nesey, mezlər taciya masa andaw ta ŋgiya da varakwar sə, ka tərata ara jene taambəla.

⁶Timawtey sə, ke dey a varakwar, təlam nesey, ka vahakata cay kad varandaw. Ka gwaɗandan labara da yaŋ makəsparav takwar va mawal nda takwar. Ke gweɗ, gege: Akwa sənafandaw cəɗem cəɗem va masa akwa hwar mawalandaw eve ndey takwar ara masa andaw ta hwar mawalakwar na may.

⁷Ara nesey, malama va dəma hay, andə ka ŋgat gədaŋ dapa akwar mafay ta makəsparav takwar, dapa taɓa ta matakwa taciya hay va mecek taciya hay.

⁸Təlam nesey, anda səfen mila, afa akwar mazlaca mambəla ana dapa Bay Mazlakava.

⁹Ava maŋgə wasay wula masa andə da zlafa maŋgana kad Zlavay mafay ta labara takwar, afa meweslə taciya ana macəkuma bay masa andə ta ŋgatiya mafay takwar fəma ta Zlav tandakwa?

¹⁰Dapa masa anda cə mbahw, hwavavaɗ hwapapas, anda nəkafa a yaŋ a yaŋ, afa a vandaw cəv ta mawalakwar va manəha jə masa magəra te meŋgey dapa makəsparav takwar.

¹¹Da lada sə, Zlavay ava yaŋ tata ana, Papaŋ tandakwa va Bay tandakwa Mazlakava Yesu ac da wunandan cəv te medey kasl kad varakwar.

¹²A lada Bay Mazlakava da gəlakwar fəma fəma va masakakwaɗ mawal vaw takwar gaa dapa taɓa takwar amta amta va kad ndana hay fakwanay, eve mececel ta mawal nda taciya kad akwar sə, may.

¹³Ara nesey, Bay Mazlakava da sasalakwaɗ rav takwar dapa manjah mavəna masa ndana a zlafa megweɗ fətiya aabay, fəma ta Zlav Papaŋ tandakwa, pas te mevehek ta Bay tandakwa Mazlakava Yesu ava ndah tata fakwanay.