Read Cuvok 1 Tisalawnik hay 4 Bible Online

1 Tisalawnik hay 4 - Cuvok bible

1 Tisalawnik hay 4

¹Magəra nesey sə, malama va dəma hay, mawala jə masa anda nəkafakwar va masa anda vakwar gədaŋ te meŋgey dapa Bay Mazlakava Yesu: Akwar ka sasərakaw da varandaw masa ara gwagumaw akwar de dey dapa manjah masa a wafa Zlavay. Akwar dapa medey ara nesey ana cay, madaɗay dapa manjahay ana nesey fəma fəma saya.

²Akwa səniya, mesesərek hay masa andaw ta sasərakakwaɗ da yaŋ Bay Mazlakava Yesu.

³Jə masa Zlav a waya sə, manjah takwar mapana, akwar ta kəs vaw fa zaŋ ana bay.

⁴A lada kwa waawa takwar a da səna manjah ava ŋgwaza dapa manjah mavəna va ava manah yaŋ.

⁵Akwar ta vana cəv kad mekekesl ta vaw de ŋgə bay da yaŋ akwar ara ndah masa aca sən Zlav bay ta ŋgiya bay.

⁶Mafay ta ma ana nesey, ndana a ta ŋgana jene masa e teh bay kad malamaŋ daha aabay kad dəmaŋ bay, afa Bay Mazlakava a ta ŋgada marga kad ndah maŋga tərsam te mebərey ana ara ŋgesey, ara masa andə ka gwaɗakwar va makətakwar da yaŋ ana cay.

⁷Yaw, Zlav ka zalakandakwa kad pa manjah maləza sə, aabay, amaa a zalakandakwa sə, kad pa manjah mavəna.

⁸Ara nesey, daha nda masa a kazlda mamənak ana na hay ŋgesey sə, a kazl ŋga ndana bay, amaa a kazl Zlavay, nda mavakwar Mesfen Mavəna tata.

⁹Da yaŋ mawal vaw dapa taɓa ta malamaŋ hay, akwa hwar masa ndana da vindakwar ma da yaŋ ana sə, ɓasabay, afa akwar ava yaŋ takwar ana, akwar ka ŋgat ma da yaŋ mawal vaw fa vaw takwar amta va amta ana cay da vara Zlavay.

¹⁰Eve metehwe ana, akwar dapa mawal malamaŋ va dəmaŋ hay dapa vavara ta Masiduwan fakwanay. Anda vakwar gədaŋ malama va dəma hay, maŋgaw fəma fəma mafəna ana saya.

¹¹Mayah manjahay dapa metehey, kwa waawa de ŋgə gədaŋ te meŋgə mezlər tata ava ha tata, ara masa andə ka gwaɗakwar zleezle,

¹²afa manjah takwar da ŋgat mehehəmey dapa mep ndey ta ndah masa aca sən Zlav bay kad fa manjah takwar. Kad veŋ ana saya, masa akwar da hwar ndana a da jənakwar sə, aabay.

¹³Malama va dəma hay, anda wal magərdakwar dapa mesən jene bay da yaŋ ndah maməca bay, afa akwar da njah dapa matakwa ara ndah mekele masa aca pə mawulak yaŋ ta maŋgat jene aabay bay.

¹⁴Daha anda kəsakwa metehwe ana masa Yesu ka məcata va masa ka pərakata, ara aŋga ana, makəsakwa, ndah makəsa Yesu masa ec ke məceceŋ sə, Zlav e te pərekekec avəda ac ta njah ava Yesu.

¹⁵Mawala masa anda gwaɗakwar ara masa Bay Mazlakava te gweɗey: Andakwa, ndah eve ndey, masa andə ta njahakwa kasl pa pas te mevehek ta Bay Mazlakava, andə ta ŋgəlakwaɗ ma ta ndah maməca sə, aabay.

¹⁶Ma te mevə cəvey e te cəney, bay ta maskəla hay e te gweɗey va dərem ta Zlavay e te fətey, ara nesey, Bay Mazlakava ava yaŋ tata ana e te bəreŋgek da baymaləvaŋ. Ndah maməca dapa Kəristi sə, ac te pərekekec kamma ɗagay.

¹⁷Ava dəɓa ana, andakwa masa andakwa eve ndey heley, Zlav a ta baŋgaɗandakwa ka ta njah eve eceŋ dapa zlav ta yam, ka ta cə yaŋ ava Bay Mazlakava dapa memeɗ, ara nesey, andə ta njahakwa ava Bay Mazlakava katar.

¹⁸Mavə gədaŋ dapa taɓa takwar amta va amta eve mesesərekey ana nesey.