Read Cuvok 1 Tisalawnik hay 5 Bible Online

1 Tisalawnik hay 5 - Cuvok bible

1 Tisalawnik hay 5

¹Malama va dəma hay, mafay ta pas hay va manah hay, akwar hwar masa andə da vindakwaɗ ma da yaŋ ana sə, ɓasabay.

²Akwar ava yaŋ takwar ana akwa səniya mambəla ana, pas ta Bay Mazlakava sə, e te dek ara makar ta vaɗ.

³Dapa masa ndana hay ec te gweɗey: «Meteh ɓa vəla vəla, makaslafay ɓasabay!» Dapa ŋgesey ana, mazə e te hufec ara mehec te mesef ta ŋgwaz, ara nesey sə, ec te mbəl aabay.

⁴Amaa akwar, malama va dəma hay, akwar sə, akwar manjaha dapa ləvaŋ masa pas ana a da hufakwar ara makar bay.

⁵Akwar fakwanay, akwar wudeh ta slam mawaɗa, wudeh ta pas. Andakwa sə, ndah ta vaɗ, kwa ta ləvaŋ bay.

⁶Ara nesey, anda ta njakwa waŋ ara ndah dərziya bay, amaa manjahakwa eve ndey, mapakwa leŋgesl fa yaŋ tandakwa.

⁷Ndah manjana waŋ sə, aca njawaŋ ta vaɗ, ndah masa ece kwey sə, ece kwə ta vaɗ.

⁸Amaa andakwa, masa andakwa ndah ta pas, mapakwa leŋgesl fa yaŋ tandakwa. Mapakwa makəsparav va mawal nda fa vaw ara rəkwat ta vəram, mapakwa mawulak yaŋ ta maŋgat membəley sə, ara tarakwa.

⁹Zlav ka lamandakwa afa mezem ta rav tata de təɗek kad yaŋ andakwa sə, aabay. Amaa afa andə da ŋgatakwa membəley jaka vara Bay tandakwa Mazlakava Yesu Kəristi,

¹⁰masa ka məcata mafay tandakwa, afa kwa daha andakwa eve ndey, kwa andə ka məc tandakwa sə, andə ta njahakwa macama ava aŋga.

¹¹Mafay ana, mavə gədaŋ dapa taɓa takwar va masasal vaw dapa taɓa takwar amta va amta ara masa akwar dapa maŋgiya.

¹²Malama va dəma hay, anda nəkafakwar, menehecen yaŋ kad ndah maŋga mezlərey dapa taɓa takwar. Eceŋ sə, ac ndah masa Bay Mazlakava te zeleceŋ ka ta padakwaɗ ma va ka ta kətakwar.

¹³Mehehəlecen yaŋ gaa va mewelecen mafay te mezlər teceŋ. Manjah eve metehey dapa taɓa takwar.

¹⁴Malama va dəma hay, anda vakwar gədaŋ, mepeyefec ndah masəfaya hay dapa taɓa takwar, mevec gədaŋ saya kad ndah masa vaw tec ka məcata, mejənec ndah bəle hay, manjah dapa mepəsek ava ndana hay fakwanay.

¹⁵Mep leŋgesl, a lada ndana da vah jə mambəla ana aabay kad nda maŋgana jə mambəla ana aabay bay. Amaa dapa manjah takwar sə, mayah meŋgə jene mambəla ana cəɗem cəɗem dapa taɓa takwar va kad ndana hay fakwanay.

¹⁶Manjah cəɗem cəɗem dapa mewesley.

¹⁷Macə mbahw cəɗem cəɗem, akwar te yəv bay.

¹⁸Maŋgana wasay Zlavay kwa dapa pas wula wula fakwanay, afa ara nesey, jə masa Zlav a waya da varakwar jaka pa Yesu Kəristi.

¹⁹Akwar ta ran ma te Mesfen Mavəna te meŋgə mezlər tata bay.

²⁰Akwar ta paɗ ma ta ndah mehwedek ma sə, ara jene taambəla bay.

²¹Mawuzaɗa jene hay fakwanay eve leŋgesl te meven jene. Matəhaza jə masa aŋga mambəla ana.

²²Maŋgəla ana vaw tərsam te jene hay masa ece teh bay fakwanay.

²³Da lada sə, Zlav te metehey ava yaŋ tata ana da panakwar avəda fakwanay. A lada leŋgesl takwar, mesfen takwar va vaw takwar ac da njah mapa ha mambəla ana ke te tər ka ndah masa ma da yaŋ eceŋ aabay pas te mevehek ta Bay Mazlakava Yesu Kəristi.

²⁴Nda mazalakakwar sə, aŋga nda maŋga mezlər eve cəvey ana, ma ta ŋgana mezlər dapa akwar sə, aŋga ana saya.

²⁵Malama va dəma hay, macə mbahw mafay taciya may.

²⁶Megweɗefec malamaŋ va dəmaŋ tandakwa hay fakwanay ava mahumbat vaw.

²⁷Ya kəɗakwar ha eve mezel ta Bay Mazlakava: Mejeŋgecen leeter ana nesey kad malamaŋ va dəmaŋ hay fakwanay.

²⁸Da lada sə, mambəla ana ta Bay tandakwa Mazlakava Yesu Kəristi da njah ava akwar.