Read Cuvok 2 Tisalawnik hay 1 Bible Online

2 Tisalawnik hay 1 - Cuvok bible

2 Tisalawnik hay 1

¹Yey Pawl, Silas va Timawtey. Ya vindiya kad akwar ndah dapa Macam yaŋ ta ndah ta Zlavay da Tisalawnik masa akwar macama ava Zlav Papaŋ tandakwa va Bay tandakwa Mazlakava Yesu Kəristi.

²A lada Zlav Papaŋ tandakwa va Bay Mazlakava Yesu Kəristi ac da vakwar mambəla ana va metehey.

³Malama va dəma hay, a lada anda ŋgana wasay cəɗem cəɗem kad Zlavay mafay takwar. Nesey, jə masa aŋga eve cəvey ana, afa makəsparav takwar e gəley fəma fəma va mawal nda masa akwar ava aŋga dapa taɓa takwar amta amta sə, e gəley dapa kwa waawa takwar fakwanay.

⁴Ara nesey, anda ŋgə həɓa da yaŋ akwar dapa taɓa ta Macam yaŋ hay ta ndah ta Zlavay mafay ta maŋgə gədaŋ takwar te medey fəma fəma va masa akwar mazlaca mambəla ana dapa makəsparav, kwa akwar dapa maɓəs marga hay masa ndana hay aca ŋgadakwar hahar va matakwa hay.

⁵Marga ana hay ŋgesey sə, ece ŋguzdek matəɗ ma ta Zlavay eve cəvey ana. Mamaɗ yaŋ teceŋ sə, ac ta tərakwar ka ndah masa ac mak te mesehw pa Wunam ta bay ta Zlavay masa akwa sə marga mafay ana.

⁶Eve metehwe ana, e ŋgə ara aŋga ana fa yam te ndey ta Zlavay te mevehecen marga kad ndah maŋgadakwar marga hay

⁷va mavakwar masasak vaw ava andaw, kad akwar ndah masana marga hay, pas masa Bay Mazlakava Yesu e te ŋguzdek vaw da baymaləvaŋ ava maskəla hay dapa gədaŋ tata mazlakava.

⁸E te dek dapa taɓa ta kwakwaw mazlakava ke te ŋgedec marga kad ndah masa aca sən Zlav bay va ndah masa aca gwam ka nah yaŋ kad pa Labara mambəla ana ta Bay tandakwa Mazlakava Yesu bay.

⁹Marga masa ac ta siya sə, e te ŋgə ara nesey: Zlav e te zenec avəda katar ka midakw dəreŋ ava Bay tandakwa Mazlakava va gədaŋ tata mazlakava.

¹⁰Pas masa e te vehekey, ndah tata ac ta hahəlan yaŋ, ndah masa ac ka kəs ma tata sə, ac te rəzlec ta mandandazliya. Akwar may, akwar ta njah deveŋ ndah ana ŋgesey, afa akwar ka kəs ma masa andaw ta bəzadakwaɗay.

¹¹Mafay ana, anda cə mbahw cəɗem cəɗem mafay takwar, afa Zlav tandakwa da ŋgatakwar, akwar mak ta maŋgat mezel masa aŋga ta zalakwar. Jaka pa gədaŋ tata mazlakava, a da jənakwar te meŋgə jə mambəla ana fakwanay masa akwa huriya va matəraɗ makəsparav takwar de ŋgə mezlərey.

¹²Ara nesey, ndana hay ac ta hahəm mezel ta Bay tandakwa Mazlakava Yesu mafay takwar, aŋga may, a ta hahəlakwaɗ yaŋ, ara mambəla ana ta Zlav tandakwa va ta Bay Mazlakava Yesu Kəristi.