Read Cuvok 2 Tisalawnik hay 2 Bible Online

2 Tisalawnik hay 2 - Cuvok bible

2 Tisalawnik hay 2

¹Malama va dəma hay, anda nəkafakwar jene pal amta da yaŋ pas te mevehek ta Bay tandakwa Mazlakava Yesu Kəristi va macam vaw tandakwa a cak tata:

²Akwar ta dəŋgazla yaŋ takwar zef zef bay, akwar te ŋgə zidaw bay, kwa jaka pa maŋguzad jene masa e dek da vara Zlavay, kwa jaka pa maɗay hay, daha aabay jaka pe leeter masa aca gwaɗakwar andaw ta vindakwar, ara masa pas ta Bay Mazlakava ana ka husakata cay bay.

³Akwar ta vana cəv kad kwa waawa da fəcakwar eve cəv wula wula bay, afa wagaa pas ana ŋga e te dekey sə, a lada meŋgər mazlakava kad fa Zlavay sə, a dakata ɗagay, Nda suwe va masa aŋga mapa ka ta zay sə, a dakata ɗagay.

⁴Aŋga nda maŋga vəram fe jene hay fakwan masa ndana hay aca zaliya Zlavay va masa ece kekəred kad aŋga. A ta ŋgiya ara nesey kasl pe medey manjah ava yaŋ tata ana dapa Way ta kwakwas va e te ŋguzdek yaŋ tata, aŋga Zlavay.

⁵Akwa sənafa ma masa ya ta gwaɗakwar dapa masa ya da cak takwar sə, sabay geyey?

⁶Təlam nesey, akwa san jə matəhaziya, afa e de ŋguzdek yaŋ tata sə, say pas masa Zlav ta piya.

⁷Gədaŋ maraɓa ta Nda suwe sə, aŋga dapa meŋgə mezlər cay. A ta ŋgiya meereɓ ɓasabay sə, say pas masa nda maran ma ta pəsna nesey sə, ta vana cəvey.

⁸Ara nesey, Nda suwe sə, e te ŋguzdek vaw, Bay Mazlakava Yesu a ta kəɗa avəda cukw cukw eve memeɗ masa e dek dapa ma tata, a ta maməha avəda eve meweɗ te medek tata.

⁹Nda suwe ana ŋgesey, e te dek ava gədaŋ ta Saadan. E te ŋguzdek vaw eve meŋgə mezlər hay mekele mekele masa ac ava gədaŋ, cah hay, jene hay marəzla nda ta mafəc ndana hay

¹⁰va meŋgə jene hay mekele mekele masa ece teh bay ka ta fəc ndah masa ac dapa cəv ta mazay. Ac ta zay ana sə, mafay ta masa ac ka kəsaw va mawal metehwe masa e de mbəlec avəda sə, aabay.

¹¹Mafay ana, Zlav ke zlərec gədaŋ mazlakava te mezlekeceŋ masa aca ra kəs maŋgal ma hay,

¹²afa ndana hay fakwanay ac ka kəs metehwe aabay, amaa ac ka paɗ meweslə teceŋ pe meŋgə jene hay masa ece teh bay, aca ra ŋgat matəɗ ma a yaŋ eceŋ.

¹³Taciya sə, a lada anda ŋgana wasay kad Zlavay kwa pas wula wula mafay takwar, malama va dəma hay masa Bay Mazlakava a walakwar, afa Zlav ka palaɗakwar ha dəga dapa mezlerey ana ke te mbəley jaka pe Mesfeney masa a panakwar va jaka pa makəsparav dapa metehwe.

¹⁴Zlav a zalakakwar sə, ka aŋga ana jaka pa Labara mambəla ana masa andaw ta bəzadakwaɗay, afa akwar da ŋgat mehehəm ta Bay tandakwa Mazlakava Yesu Kəristi.

¹⁵Ara nesey, malama va dəma hay, masasala vaw mambəla ana, matəhaza mambəla ana mesesərek hay masa andaw ta sasərakakwaɗay, kwa ava ma va jaka pe leeter taciya.

¹⁶Da lada sə, Bay tandakwa Mazlakava Yesu Kəristi ava yaŋ tata ana va Zlavay, Papaŋ tandakwa masa ka walandakwa va masa ka vandakwa matək rav masa katar va map mawulak yaŋ ta maŋgat jene,

¹⁷da təkakwaɗ rav va masasalakwar dapa meŋgə mambəla ana cəɗem cəɗem jaka pe mezlər hay va jaka pe megweɗ takwar hay.