Read Cuvok 2 Tisalawnik hay 3 Bible Online

2 Tisalawnik hay 3 - Cuvok bible

2 Tisalawnik hay 3

¹Magəra nesey sə, malama va dəma hay, macə mbahw mafay taciya, afa ma ta Bay Mazlakava de zlezlen zef zef va a da ŋgat mehehəm ara masa aŋga da varakwar sə, may,

²afa andə da mbəlata dapa ha ta ndah suwe va ndah maŋga jə masa e teh bay, afa ndana hay fakwanay ac ka kəs pa rav sə, aabay.

³Bay Mazlakava sə, aŋga nda maŋga jene eve cəvey ana, a ta sasalakwar va majəɗakwar fa Nda suwe.

⁴Takwar sə, anda səniya tehwe dapa Bay Mazlakava, jene hay masa andə ka gwaɗakwar ta maŋgiya sə, akwar dapa maŋgiya, kwa maayaŋ kad fəma, akwar ta ŋgana avəda.

⁵A lada Bay Mazlakava da wunakwaɗ rav takwar ka ta wal Zlavay va kad pe mepəsek te Kəristi.

⁶Malama va dəma hay, anda gwaɗakwar eve mezel ta Bay Mazlakava Yesu Kəristi, maŋgəlana vaw malamaŋ tandakwa kwa wula wula masa aŋga masəfaya va masa manjah tata e də wal eve mesesərek hay masa akwar ta ŋgatiya da varandaw.

⁷Akwar ava yaŋ takwar ana, akwa səniya mambəla ana, masa akwar da zazəhwandaw sə, gwagumaw. Andə ka njah dapa taɓa takwar dapa masəfaya sə, aabay,

⁸andə ka nəkafa ndana da ndandaw jene taambəla sə, aabay. Amaa sesəker ava mavə yaŋ taciya va meyəvey dapa mezlərey, hwavavaɗ hwapapas, anda ŋgə mezlərey, afa anda da njah kwa fa ha ta nda amta deveŋ akwar bay.

⁹Daha efes tehwe sə, ma ta ndandaw jene sə, akwar, amaa andə ka wal manjah ke mececeley, afa akwar da zazəhwandaw.

¹⁰Dapa masa andaw da varakwar faŋga sə, andə ka gwaɗakwar: «Daha nda masa a wal meŋgə mezlər bay sə, a da ndə jene bay may.»

¹¹Anda gwaɗakwar ara nesey sə, afa anda cəna ndah mekele deveŋ akwar ac masəfaya hay. Aca wal meŋgə mezlər bay, amaa ece kezl pa ma hay masa e te jənec aabay.

¹²Kad tərsam ta ndah ana ŋgesey sə, dapa Bay Mazlakava Yesu Kəristi, anda gweɗeceŋ va mevec gədaŋ ara nesey: «Aca ra njah teete va meŋgə mezlər ava gədaŋ teceŋ ka ta ŋgat jə ta manday.»

¹³Takwar sə, malama va dəma hay, akwar te yəv te meŋgə jə mambəla ana bay.

¹⁴Daha ndana ka nah yaŋ kad pa ma masa andaw ta gwaɗiya dapa leeter na aabay sə, maɗala nda ana va akwar ta cam vaw ava aŋga bay, afa hwar da ŋgana.

¹⁵Akwar ta paɗ ara maslagəra takwar bay, amaa mavana mamənak ara malamaŋ takwar jaŋgata.

¹⁶A lada Bay Mazlakava nda mavana metehey ava yaŋ tata ana da vakwar metehey, cəɗem cəɗem va kwa eve cəv wula wula. A lada Bay Mazlakava da njah ava akwar fakwanay.

¹⁷Megweɗ fa vaw nesey sə, yey Pawl ava ha taaɗaw ta vindiya. Ye mbeɗ fe leeter aɗaw hay fakwanay sə, ara nesey: Nesey mevində taaɗaw.

¹⁸A lada mambəla ana ta Bay tandakwa Mazlakava Yesu Kəristi da njah ava akwar fakwanay.