Read Cuvok 1 Timawtey 1 Bible Online

1 Timawtey 1 - Cuvok bible

1 Timawtey 1

¹Yey Pawl, maslaŋ te Yesu Kəristi, afa Zlav nda mambəla nda va Yesu Kəristi masa anda pakwa mawulak yaŋ tandakwa fətiya ke viyey cəvey.

²Ya vindiya kad kaa Timawtey, wat aɗaw metehwe ana dapa makəsparav: Da lada sə, Zlavay, Papaŋ tandakwa va Yesu Kəristi Bay tandakwa Mazlakava da pəsafakaa ma, da ŋgafakaa metekweney va manjahaɗakaa dapa metehey.

³Wagaa ye te də kad pa vavara ta Masiduwan sə, ya ka gwaɗakaa, ka da njah dapa berne te Efez, afa ke de gweɗec ndah dərziya pe ndey pe ndey ec te sesərekecen mesesərek hay mazlakava mazlakava mekele kad ndana hay bay.

⁴Gweɗec aca ra gərda maɗay ana hay ŋgesey va ma da yaŋ mezel ta papaŋ ta papaŋ hay masa e ndəv aabay. Ma ana hay ŋgesey sə, ece hwedek matə yaw hay taambəla da yaŋ masən maləmad vaw ta Zlavay masa anda sənakwa jaka pa makəsparav.

⁵Anda gweɗec ara nesey sə, afa aca ra wal ndah dərziya ava mawal vaw masa e dek dapa rav mapana, dapa leŋgesl mambəla ana va dapa makəsparav masa metehwe ana.

⁶Ndah dərziya ac ka ŋgwadafa dəɓa cəv mambəla ana. Ec ke zlekec kad pa matə yaw hay masa a jəna nda aabay.

⁷Aca wal sə, manjah kad ndah mesesərekecen ma majawa kad ndana hay. Amaa aca sən jə masa aca gwaɗiya bay, kwa jə masa aca təkafa ha ava gədaŋ sə, bay.

⁸Aŋga, anda sənakwa ma majawa sə, mambəla ana, daha anda ŋgakwa mezlər ava aŋga eve cəvey ana.

⁹Masənakwaɗay, ma majawa sə, mapa mafay ta ndah maŋga jə mambəla ana bay. Amaa aŋga mapa mafay ta ndah suwe hay va ndah masa ac makəta bay, mafay ta ndah malafa Zlavay va ndah maŋga mebərey, mafay ta ndah masa aca hahəm Zlav aabay va ndah mahahəma jə maləza hay. Asaya, ma majawa ana sə, mapa mafay ta ndah makəɗa papaŋ daha aabay mamaŋ tec hay ka macəhwandaw va ndah makəɗa ndana hay fakwanay.

¹⁰Aŋga mapa mafay ta ndah makəsa vaw fa zaŋ ana, mafay ta mawulah makəsa vaw ava mawal caliya va ndah mahusamda ndana hay kad pe ɓeley, mafay ta ndah maŋgəla ma hay, mafay ta ndah masa ece mbeɗ saw va mafay ta kwa waawa maŋga jene mambəla ana aabay wula wula fakwanay masa aŋga wal eve mesesərek tandakwa mambəla ana nesey.

¹¹Mesesərekey ana e dek dapa Labara mambəla ana maŋguzda Zlavay masa aŋga eve mehehəm mabay, aŋga slaslalay ta mambivaw. Mavuwa Labara mambəla ana sə, aŋga, afa ya da bəzadiya kad ndana hay.

¹²Ya ŋgana wasay kad Yesu Kəristi Bay tandakwa Mazlakava maviyey gədaŋ. Ya ŋgana wasay ana sə, afa ke weleyey, ke peɗiyey ka nda mambəla ana fa yam te ndey tata, eve mekəsiyey kad pe mezlər tata,

¹³yey masa zleezle ya ka lafaw, ye ke ŋgedec marga kad ndah tata, ye ke ŋgefec suwe ndah tata. Amaa Zlav ke ŋgefiyey metekweney, afa jə masa ye te ŋgec fakwanay ŋgesey sə, ya sən ma da yaŋ ana bay, ya ka kəs ma tata aabay heley.

¹⁴Amaa Bay Mazlakava ke ŋgiyey mambəla ana tata gaa, ka viyey gədaŋ ta makəsparav va mawal nda masa e dek dapa macam vaw ava Yesu Kəristi.

¹⁵Mawala ma metehwe ana masa ndana hay fakwanay aca ra kəsiya: Yesu Kəristi e dek kad pa vavara sə, ka ta mbəl ndana hay dapa mebərey. Yaw, yey sə, ya nda maŋga mebər mahwalhwala ana deveŋ eceŋ.

¹⁶Amaa Zlav ke ŋgefiyey metekweney, afa a wal Yesu Kəristi de ŋguzdek mepəsek tata jaka piyey, yey, ya nda maŋga mebər mahwalhwala ana. A ŋguzdawa ara nesey sə, afa ye de vec gədaŋ kad ndah ma ta kəsa ma tata masa ac ta njah katar ka midakw.

¹⁷Da lada sə, ndana hay aca ra hahəmaw va mahahəlan yaŋ ta Zlav Bay Ndazlay, Zlav masa a məc aabay, e wel bay va masa aŋga pal amta, katar ka midakw. E de ŋgey!

¹⁸Timawtey, wat aɗaw, wala mesesərek masa ya ta gəraɗ pa ha takaa ara masa ndah mehwedek ma hay ta bəzadiya zleezle da yaŋ kaa, afa daha ka ka ta ŋgat gədaŋ jaka pa, ka da ŋgə vəram mambəla ana,

¹⁹ava makəsparav va mawulak yaŋ mambəla ana. Ndah dərziya ac ka kazlda. Ara nesey, makəsparav teceŋ ka məcata.

²⁰Himeney va Alekzandərus sə, ac deveŋ ndah ana hay may. Ye ke peɗec pa ha ta Saadan, afa aca ra sasərak magərda malaf Zlavay.