Read Cuvok 1 Timawtey 2 Bible Online

1 Timawtey 2 - Cuvok bible

1 Timawtey 2

¹Ara nesey, jə macaaca ana masa ya wal megweɗey, da lada sə, ndana hay aca ra nəkafa jene Zlavay, aca ra cana mbahw, aca ra cə mbahw mafay ta kwa waawa va maŋgana wasay mafay ta ndana hay fakwanay,

²mafay ta bay hay va mazlakava hay maŋga bay da yaŋ vavara fakwanay, afa andə da njahakwa dapa mambivaw va dapa metehey. Asaya, andə da njahakwa dapa melel fa Zlavay va manjah dapa meŋgə jə mambəla ana.

³Macə mbahw ana sə, jə masa mambəla ana va jə masa a wafa Zlavay, nda mambəlandakwa,

⁴masa a wal ndana hay fakwanay aca ra mbəlaɗay. Asaya, a wal aca ra səna ma metehwe ana.

⁵Eve metehwe ana, Zlavay sə, aŋga pal amta. Maslamda[1] ta ndana hay va Zlavay sə, pal amta may. Maslamda ana sə, Yesu Kəristi,

⁶masa ka vana yaŋ tata avəda mafay ta membəlek ndana hay fakwanay dapa mebərey. Nesey matə yaw masa aŋga ta viya dapa pas masa Zlav ta piya.

⁷Mafay ana, Bay Zlavay ke peɗiyey ka nda mabəzada ma tata va maslaŋ tata. E zlerdeyey sə, ke te sesərekecen ma tata kad ndah masa Zuwef hay bay, dapa makəsparav va ma metehwe ana. Ye gweɗ nesey sə, tehwe ya ŋgal ma aabay.

⁸Yaw, ya wal sə, a lada mawulah aca ra cə mbahw kwa fəla fəla. Dapa macə mbahw ana sə, aca ra baŋgaɗa ha tec hay mapana kad a wudam, ava mazam rav bay va mapay bay.

⁹Ta ŋgwazah sə, a lada ac ra pə rəkwat eve cəvey ana, ac ta jasl vaw teceŋ ava jene hay masa e de ŋgec ndey kad ndana hay bay: Kwa ava macə yaŋ hay, kwa ava jə ta uway hay ta gənaɓ daha aabay gavda hay, kwa ava rəkwat hay ta səlay bay,

¹⁰amaa sesəker aca ra jasl vaw sə, eve mezlər hay mambəla ana, ara masa a lada kad ŋgwazah manaha yaŋ kad Zlavay.

¹¹Dapa mesesərek hay sə, a lada ŋgwazah aca njah teete, aca cak zləmay ava manah yaŋ.

¹²Ya vana cəv kad ŋgwaz da sasərak mawal daha aabay meŋgə bay da yaŋ ana sə, aabay. Amaa da njah teete.

¹³Ye gweɗ ara nesey sə, afa Zlav e lemek macaaca ana sə, Adamaw. Ava dəɓa ana, e lemek Hawa.

¹⁴Saadan, e fəcek macaaca ana ke te ŋgə mebərey sə, Adamaw bay, amaa e fəcek sə, Hawa, ka təɗata pe mebərey.

¹⁵Ara nesey, ŋgwaz e te mbəl sə, jaka pe mehey wude hey, amaa say e dey fəma fəma dapa makəsparav, a wal nda, manjah tata mapana, a ŋgə həɓa aabay.