Read Cuvok 1 Timawtey 3 Bible Online

1 Timawtey 3 - Cuvok bible

1 Timawtey 3

¹Mawala, ma masa metehwe ana: Nda masa a wal manjah ke mesnendə ta Macam yaŋ ta ndah ta Zlavay sə, ŋgesey, ka wulak mezlər mambəla ana.

²A lada mesnendə ta Macam yaŋ ta ndah ta Zlavay sə, aŋga eve mebər aabay, aŋga nda masa ka kəs ŋgwaz pal amta, a və yaŋ tata kad pa masə jene hay makwa nda aabay, a pə leŋgesl fə yaŋ tata va manjah tata mambəla ana, a kəs məlaŋ hay eve mewesley, a zlafa masasərak ndana hay,

³a sə wuzam aabay, a yah ma aabay, amaa aŋga nda makwaɗma, a ŋgə gada aabay, e kekeslə fa səlay aabay.

⁴Da lada sə, aŋga nda masa a zlafa mapad ma ta ndah da hwaɗ ta way tata va matəhaz wudiya hay ka ta nahan yaŋ dapa jene hay fakwanay.

⁵Ye gweɗ ara nesey sə, afa daha nda masa a sən mapad ma ta ndah da hwaɗ ta way tata bay sə, a da njah ke mesnendə ta Macam yaŋ ta ndah ta Zlavay sə, a ŋgana gwagumaw?

⁶E de ŋgə sə, aŋga nda waya dapa makəsparav bay, afa magal yaŋ a ta həɗazla avəda, a ta təɗata. Ara nesey, Zlav a ta təɗana ma yaŋ ara aŋga ta təɗana ma yaŋ bay ta haalay.

⁷A lada ndah masa aca sən Zlav bay sə, aca ra tə yaw da yaŋ manjah tata mambəla ana, ac ta paɗ ara jene taambəla bay, afa e de teɗ pe wewer va gadaŋ ta bay ta haalay bay.

⁸Ara aŋga ana, ndah majəna makəsparav hay, da lada sə, ac ava manah yaŋ va megweɗ ma metehwe ana, ac ta sə wuzam bay, kwa mayah səlay ava cəv masa mambəla ana aabay bay.

⁹A lada aca kəs ma maraɓa ta makəsparav masa Zlav te ŋguzdekey ava rav mapana ana.

¹⁰Ac may, a lada Macam yaŋ ta ndah ta Zlavay ece wuzeɗec ɗagay, daha ec eve mebər aabay sə, ŋgesey, aca zlafa meŋgə mezlər ta ndah majəna Macam yaŋ ta ndah ta Zlavay.

¹¹Ŋgwazah[2] may, a lada ac ava manah yaŋ. Ac ta ŋgal dar fa ndana hay bay, ac ta sə wuzam bay. Amaa da lada sə, ece ŋgə mezlər eve cəvey ana dapa jene hay fakwanay.

¹²Ndah majəna makəsparav hay sə, a lada ac ndah masa ac ka kəs ŋgwaz pal amta amta. A lada aca zlafa mapad ma te wudeh tec hay va ndah da hwaɗ ta way tec mambəla ana.

¹³Ndah majəna makəsparav hay maŋga mezlər tec mambəla ana sə, ac ta ŋgat mahahəl yaŋ. Ac ta bəzad ma da yaŋ makəsparav dapa Yesu Kəristi sə, ava zidaw dapa vaw aabay.

¹⁴Ya vindakaa leeter nesey sə, afa ya dapa mawulak yaŋ te medey ka ta wuzaɗakaa dapa manah kusetke fana.

¹⁵Yaw, kwa daha ya ka husaɗ zef aabay sə, ka ta səna avəda eve cəv wula masa ke de dey da hwaɗ ta way ta Zlavay, masa aŋga Macam yaŋ ta ndah ta Zlavay, Zlav masa aŋga eve ndey, ara darakw va matəhaz metehwe ana.

¹⁶Aŋga, eve metehwe ana, ma maraɓa masa andə ta kəsakwa nesey sə, ma mazlakava ana: Ke ŋguzdek vaw ava slaw ta vaw ta ndana, Mesfen Mavəna ka ŋguzda aŋga sə, aŋga nda maŋga mezlər eve cəvey ana. Maskəla hay ac ka wala, ndana hay ac ka bəzad ma da yaŋ ana kad ndah dapa tərsam hay mekele mekele. Ndah dapa vavara ac ka kəsaw, Zlav ka kəsa avəda kad a wudam pa slam tata mawaɗa.