Read Cuvok 1 Timawtey 4 Bible Online

1 Timawtey 4 - Cuvok bible

1 Timawtey 4

¹Mesfen Mavəna ka gwaɗa mambəla ana, gege: Dapa memeɗ te jene hay sə, ndah dərziya ac ta gərda makəsparav ac ta nah yaŋ kad pa ma te mesfen hay maləza mafəca ndana hay va makəs mesesərek hay masa ece dek da vara damkwaw hay,

²ec te zeceŋ jaka pa maŋgwada nda ava ma ta ndah maŋgəla ma hay. Ac ta zlafa mavən jə mambəla ana va jə mambəla ana aabay sə, bay. Ara leŋgesl tec ka ndalata ava ɓəray masa kwakwaw fətiya.

³Ec te recen ma ta ndana hay ta makəs ŋgwaza hay va mandə jene hay mekele mekele. Anjəkar Zlav e lemekec jeŋ ana hay sə, afa ndah makəsa ma tata, masəna ma metehwe ana, aca ra ndiya ava maŋgana wasay.

⁴Aŋga, jene hay fakwanay masa Zlav ta lamiya sə, mambəla ana. Jene masa te mekezl sə, aabay, daha anda ndakwa ava maŋgana wasay.

⁵Ye gweɗ ara nesey sə, afa ma ta Zlavay va macə mbahw sə, aca təra jeŋ ana avəda ke jə mambəla ana fa yam te ndey ta Zlavay.

⁶Sesərekecen jeŋ ana hay na fakwanay kad malamaŋ va dəmaŋ tandakwa hay dapa Macam yaŋ ta ndah ta Zlavay. Ara nesey, ka tərata ka nda maŋga mezlər te Yesu Kəristi mambəla ana, nda mandana ɗaf ta labara ta makəsparav mambəla ana va mesesərek mambəla ana masa ka ta cəpiya.

⁷Amaa makar maɗay hay saw ara ŋgwazah marŋgwaz sə, ka ta cak zləmay kad pa bay. Sasəraka slaw ta vaw takaa, ka da njah dapa melel fa Zlavay.

⁸Masasərak vaw sə, a jəna nda kusetke war, amaa melel fa Zlavay sə, a jəna nda dapa jene hay fakwanay, afa ka gwaɗandakwa ha a ta vandakwa manjah katar ka midakw, təlam nesey va maayaŋ kad fəma.

⁹Ma masa ya ta gwaɗakaa nesey sə, ma metehwe ana. Da lada sə, kwa waawa da kəsaw ava rav pal amta.

¹⁰Daha anda ŋgakwa mezlərey, anda kəɗakwa vaw dapa sə, afa andə ka pakwaɗ mawulak yaŋ tandakwa fakwanay a yaŋ Zlav masa aŋga ɓa eve ndey cəɗem cəɗem. Aŋga sə, aŋga nda mambəla ndana hay fakwanay, mahwalhwala ana sə, makəsparav hay.

¹¹Nesey ma hay masa ke de gweɗeceney va mesesərekeceney.

¹²Da lada sə, ndana da pakaa ara jene taambəla mafay ta masa ka wat bay. Amaa sesəker ŋguzdek yaŋ takaa kad makəsparav hay ara mececeley jaka pa: Megweɗ takaa, manjah takaa, mawal nda takaa, makəsparav takaa va jaka pa manjah takaa mapana.

¹³Və yaŋ takaa cəɗem cəɗem te mejeŋgecen ma ta Zlavay kad makəsparav hay. Vec gədaŋ, sesərekeceŋ kasl pas masa ya ta husaɗay.

¹⁴Gədaŋ te mezlər masa Mesfen Mavəna ta vakaa sə, ka ta paɗ ara jene taambəla bay. Sənafa ka ŋgat gədaŋ ana nesey sə, pas masa ndah mehwedek ma zleezle te gweɗ da yaŋ kaa va masa mesnendə hay ta Macam yaŋ ta ndah ta Zlavay ta pakaa ha yaŋ.

¹⁵Nesey jə masa ka da paɗ pe leŋgesl takaa. Təhaza mambəla ana. Ara nesey, ndana hay fakwanay ac ta wala megəl takaa fəma fəma dapa mezlərey.

¹⁶Pə leŋgesl fə yaŋ takaa va fe mesesərek masa ke sesərekecen kad ndana hay. Njah cəɗem cəɗem te meŋgec jeŋ ana hay fakwanay. Daha ka ŋgiya ara nesey sə, ka mbəla yaŋ takaa avəda va membəl ndah macəkafakaa zləmay.