Read Cuvok 1 Timawtey 5 Bible Online

1 Timawtey 5 - Cuvok bible

1 Timawtey 5

¹Ndana marndaw sə, ka ta payafa maapay bay, amaa vana mamənak ara papakw. Kətec wudeh gawla hay sə, ara malamakw hay,

²ŋgwazah marŋgwaz hay sə, kətec ara mamaŋ takaa hay. Dahəla hay sə, pec ara dəmakw hay, ava rav mambəla ana.

³Nehecen yaŋ kad ŋgwa macəhwandaw hay masa ac marŋgwaz hay metehwe ana.

⁴Amaa daha ŋgwa macəhwandaw masa wudeh tata mazlakava hay ɓa, daha aabay, wudeh ta wudiya hay ɓa sə, say wude hey ana aca sasərak meŋguzdek melel fa Zlav kad ndah da hwaɗ ta way tec ɗagay va mejəneceŋ ara masa ec te gəlec zleezle sə, may. Ara nesey, a wafa kad Zlavay.

⁵Kad ŋgwaz masa aŋga ŋgwa macəhwandaw metehwe ana, aŋga manjaha pal aŋga amta tata, mawulak yaŋ tata fakwanay mapa da yaŋ Zlavay. A nək jene vara Zlavay va macana mbahw cəɗem cəɗem hwavavaɗ, hwapapas a da jəna.

⁶Amaa ŋgwa macəhwandaw maŋgana jene saw ara aŋga ta waya sə, kwa aŋga eve ndey, aŋga ara nda maməca.

⁷Sləfecen ma ana nesey, afa ndana hay ac da ŋgat mebər de verec bay.

⁸Yaw, daha nda masa e pə leŋgesl fa tərsam tata hay aabay, mahwalhwala ana, ndah da hwaɗ ta way tata. Ŋgesey, ka ləza makəsparav tata avəda ka fəna nda masa ka kəs pa rav aabay.

⁹Ka ta vində mezel ta ŋgwa macəhwandaw kad veŋ ŋgwa macəhwandə hay sə, say ŋgwaz masa aŋga ava mavay 60, daha aabay ka fəna va masa ka kəs mawal pal amta.

¹⁰A lada ndana hay aca səniya dapa mezlər tata mambəla ana. Ara megweɗey: Ke gəlec wudiya hay dapa cəv mambəla ana, ka kəs məlaŋ hay mambəla ana, ke penecen sek ta makəsparav hay, ke təkecen rav ta ndana hay dapa marga hay, ke ŋgə jene hay mekele mekele mambəla ana.

¹¹Amaa ŋgwa macəhwandə seɓeleŋ hay sə, ka ta vində mezel tec bay heley, afa gəla mawulak yaŋ ta mawal te ŋgetefeceŋ sə, ec te ɗəmec saya, ac ta gərda cəv te Kəristi.

¹²Ara nesey, ec ke təɗec pe mebərey, afa ac ka təhaza ma masa ac ta jawiya zleezle sə, aabay.

¹³Kad veŋ ana saya, ac ta tərata maslamayaɗ hay, ac ta ŋgway fa way fa way. Ac ta njah maslamayaɗ hay babəla bay, amaa jə mambəla ana aabay mahwalhwala ana sə, ac ta tərata ka ŋgwazah maŋga mbaɗa mbaɗa hay, ec te kezl pa ma ta ndana hay saw, ac ta gwaɗ ma hay saw masa te megweɗ bay.

¹⁴Mafay ana, ya wal sə, a lada ŋgwa macəhwandə seɓeleŋ hay sə, aca ra kəs mawal, ece re hey wude hey, ece re pə leŋgesl fa hwaɗ ta way tec may, afa maslagəra tandakwa hay ac da ŋgat magwaɗ ma masa e teh bay da yaŋ andakwa bay.

¹⁵Ye gweɗ ara nesey sə, afa ŋgwa macəhwandə seɓeleŋ hay mekele ac ka gərda cəv mambəla ana ka ta cəp cəv ta Saadan.

¹⁶Daha ŋgwaz makəsparav masa aŋga ava ŋgwa macəhwandə hay dapa tərsam tata ɓa sə, e de jəneceŋ. E te gəreɗec pa ha ta makəsparav hay, e de fənec fa gədaŋ bay. Ara nesey, makəsparav hay aca zlafa majən ŋgwazah masa ac ŋgwa macəhwandə hay metehwe ana.

¹⁷Mesnendə hay mapada ma ta makəsparav hay mambəla ana sə, ac mak ta maŋgat mehehəm tec dəɓa ecew, mahwalhwala ana sə, ndah makəɗa vaw teceŋ ta mabəzadakwar va masasərakakwar ma ta Zlavay.

¹⁸Yaw, ma mavinda dapa Ɗelewer mavəna, gege: «Daha zla hay ece ŋgə mezlər de ley sə, ke te pec jaalaŋ pa ma bay.» Asaya, gege: «Nda maŋga mezlərey sə, aŋga mak ta maŋgat meyəv te mezlər tata.»

¹⁹Ka ta kəs maŋgal ma da yaŋ mesnendə ta makəsparav hay bay, say ndah ecew, daha aabay ndah mahkar masa aca tə yaw da yaŋ ma ana ɓa tehwe.

²⁰Ndah[3] maŋga mebərey sə, peyefec meendey ta ndana hay fakwanay, afa ndah dərziya aca ra ŋgə zidaw.

²¹Ya ŋgakaa mbahw fa yam te ndey ta Zlavay, fa yam te ndey te Yesu Kəristi va ta maskəla hay mapala, mbahw, kəs ma ana hay nesey. Dapa mezlər masa ka ŋgiya sə, ka ta pal ndana hay meepel bay.

²²Ka ta vas vaw ta map ha a yaŋ ndana ke te ŋgə mezlər dapa taɓa ta makəsparav hay bay, wuzaɗa nda ana ɗagay. Ka ta talaɗ yaŋ takaa pe mebər ta ndana bay. Paɓa leŋgesl fə yaŋ takaa mambəla ana.

²³Ka ta sə yam meŋgweler babəla bay, amaa saɓa wuzam[4] kusetke, mafay te mehec da hwaɗ takaa, afa cəɗem cəɗem a hacakaa da hwaɗ.

²⁴Mebər ta ndah ŋgeɗ hay sə, a ŋguzdakata wagaa ndana hay ac ta wuzaɗ ma ana. Amaa ta ndah dərziya sə, mebər tec e te ŋguzdek ava dəɓa ta mawuzaɗ ma.

²⁵Ara aŋga ana, mezlər hay masa ndana ta ŋgiya mambəla ana sə, ece reɓ bay. Kwa mezlər hay masa mambəla ana aabay sə, ac ta ŋguzdakata a vəda.