Read Cuvok 1 Timawtey 6 Bible Online

1 Timawtey 6 - Cuvok bible

1 Timawtey 6

¹A lada ɓel hay fakwanay aca ra pə bay ta way teceŋ sə, ka ndah masa ac mak ta maŋgat manah yaŋ, afa ndana hay aca ra laf Zlavay va mesesərek tandakwa bay.

²Ɓel hay masa bay ta way tec makəsparav hay sə, ac ta gərda menehecen yaŋ mafay ta masa ac malamaŋ hay amta dapa makəsparav bay. Sesəker ece re ŋgec mezlər mambəla ana ka fəna macaaca ana, afa bay ta way tec hay masa ece jənec dapa mezlər hay mambəla ana sə, ac makəsparav hay va malamaŋ hay masa Zlav e welec elehey. Nesey jə masa ke de sesərekeceney va mevec mamənak da yaŋ ana.

³Daha ndana e sesərekec yaŋ ta ma mazlakava mekele kad ndana, daha aabay, aŋga magasa ava ma hay mavəna ta Bay tandakwa Mazlakava Yesu Kəristi aabay va mesesərek da yaŋ ma hay mazlakava masa ece də amta eve melel fa Zlav aabay sə,

⁴ŋgesey, aŋga mahəɗazla dapa magəl yaŋ. Aŋga nda masa e sən jene bay, a wal sə, matə yaw hay va mapay da yaŋ ma hay. Jene hay masa aŋga ta ŋgiya ana ŋgesey sə, ece hwedek səlek, mapay, malaf nda va mawulak yaŋ hay masa ece teh teh bay,

⁵maŋgə gada masa kwakumakw ana aabay masa dek da vara ndah masa leŋgesl tec maləza, masa aca sən metehwe ana sabay. A wulakiya, melel fa Zlavay sə, cəv ta maŋgat zleley.

⁶Eve metehwe ana, melel fa Zlavay sə, cəv mazlakava ta maŋgat zleley kad nda masa e wesl da yaŋ jə masa aŋga ta ŋgatiya,

⁷afa andə ka kəsakakwa jene kad pa vavara aabay, ara aŋga ana pas ta maməc tandakwa sə, andə ta dakwa ava jene aabay.

⁸Ara nesey, daha anda ŋgatakwa jə ta manday va rəkwat sə, ŋgesey, mak kad andakwa cay.

⁹Ta ndah masa aca wal mayah zleley sə, ec te təɗ pa gadaŋ ta mazay jaka pe mekekesl ta vaw mabay ta ndah marəzla. Ac te kezl kad pe menesey va mazay.

¹⁰Mawal səlay elehey sə, ŋgesey, slaslalay te jene hay mambəla ana aabay fakwanay. Ndah dərziya ac ka yahaw mabay kasl pe mezlekec dəreŋ ava makəsparav. Mafay ana, ke hwedefec marga mazlakava ana mabay kad yaŋ eceŋ.

¹¹Amaa kaa, nda ta Zlavay, hwaɓa dəreŋ fe jeŋ ana hay ŋgesey. Yah meŋgə mezlər eve cəvey ana, melel fa Zlavay, makəsparav, mawal nda, mepəsek va makwaɗma.

¹²E ŋgə vəram mambəla ana masa e dek dapa makəsparav. Təhaza manjah katar ka midakw masa ka mazala kad pa ara masa ka ta tə yaw da yaŋ makəsparav takaa mambəla ana meendey ta ndah mata yaw hay mabay.

¹³Yaw, təlam nesey, ya gwaɗakaa fa yam te ndey ta Zlavay, nda mavana mesfeney kad jene hay fakwanay. Ya gwaɗakaa saya fa yam te ndey te Yesu Kəristi matana yaw mambəla ana da yaŋ makəsparav fəma ta bay Paŋws Pilatu.

¹⁴Ya gwaɗakaa, nahda yaŋ kad pə ma majawa ava manjah takaa mapana va mebər fa kaa kwa kusetke aabay kasl pa pas masa Bay tandakwa Mazlakava Yesu Kəristi e te ŋguzdek vaw,

¹⁵pas masa Zlav ta piya. Bay Zlavay sə, aŋga pal amta maŋga bay da yaŋ jene hay fakwanay, aŋga dapa mambivaw cəɗem cəɗem, aŋga Bay da yaŋ bay hay va Bay Mazlakava da yaŋ bay hay mazlakava,

¹⁶Aŋga Ndazlay pal aŋga amta, aŋga manjaha dapa slam mawaɗa masa ndana a zlafa maŋgucafa vaw bay. Masa kwa nda amta masa ka wala aabay, kwa masa a ta zlafa mawala sə, aabay. Membeɗey va gədaŋ mazlakava de ŋgə kad aŋga katar ka midakw. E de ŋgey!

¹⁷Gweɗec ndah eve zleley hay ta vavara nesey, ac ta gal yaŋ va mapaɗ leŋgesl teceŋ a yaŋ zleley tec masa a ta ndəvata ŋga bay, amaa aca ra paɗ leŋgesl teceŋ a yaŋ Zlav nda mavandakwa jene hay fakwanay, afa anda da waslakwa da yaŋ ana.

¹⁸Gweɗeceŋ, aca ra ŋgə jə mambəla ana, meŋgə mezlər mambəla ana gaa sə, da njah ke zleley teceŋ, aca ra pəla ha teceŋ ta mavə jene va mavan jene hay teceŋ ava ndah dərziya.

¹⁹Daha aca ŋgiya ara nesey sə, aca ŋgə sə, aca ɓəc zleley masa e te ndəv aabay, masa ec te wesl da yaŋ ana maayaŋ kad fəma, afa aca ra ŋgat mesfen masa metehwe ana.

²⁰Awa Timawtey, pafa leŋgesl mambəla ana fa ma masa Zlav ta gərakaɗ pa ha takaa. Ŋgəlana vaw ma hay masa saw va ma hay masa ece də wal ava makəsparav. Mesesərek masa ndana hay aca wala ara mesesərek metehwe ana, anjəkar mesesərek metehwe ana bay sə, ka ta tal yaŋ takaa pa bay.

²¹Ndah dərziya ece gweɗey, teceŋ sə, ec eve mesen jene ana ŋga ɓa, amaa ec ke zlekec dapa makəsparav. Mambəla ana ta Zlavay da njah ava akwar.