Read Cuvok 2 Timawtey 1 Bible Online

2 Timawtey 1 - Cuvok bible

2 Timawtey 1

¹Yey Pawl, maslaŋ te Yesu Kəristi ara masa Zlav ta waya ta vində leeter nesey. Zlav ke zlerdeyey ka ta bəzad ma da yaŋ manjah katar ka midakw dapa Yesu Kəristi ara masa ka gwaɗa daha zleezle.

²Ya vində leeter ana nesey kad kaa Timawtey, wat aɗaw masa ya waya elehey. Da lada sə, Zlavay, Papaŋ tandakwa va Yesu Kəristi Bay tandakwa Mazlakava da pəsafakaa ma, da ŋgafakaa metekweney va manjahaɗakaa dapa metehey.

³Ya ŋgana wasay kad Zlavay masa ya ŋgan mezlərey ava rav aɗaw mapana ara papaŋ ta papaŋ taaɗaw hay zleezle. Dapa masa ya cana mbahw cəɗem cəɗem, hwavavaɗ hwapapas, ya ŋgana wasay mafay takaa.

⁴Ya sənafa makuɗa[1] takaa, matakwam takaa e kəɗiyey, ya wal ya da walakaa, afa ye de wesl gaa.

⁵Ya sənafa, makəsparav masa metehwe ana dapa kaa. Makəsparav ana sə, masa mamaŋ ta mmakw Luwis va mmakw Ewnis ac ava aŋga kamma fa kaa. Ya səniya eve metehwe ana, makəsparav ana nesey, da varakaa ɓa may.

⁶Mafay ana, ya sləfakaɗ saya, gədaŋ te mezlər masa Zlav ta vakaa dapa masa ya pakaa ha yaŋ sə, təhaza gədaŋ ana mambəla ana,

⁷afa Mesfen masa Zlav ta vandakwa sə, a pandakwa zidaw pa vaw aabay. Sesəker a vandakwa gədaŋ, a jənandakwa ta mawal vaw, a vandakwa leŋgesl ta majal vaw[2].

⁸Ka ta ŋgə hwar ta matə yaw da yaŋ Bay tandakwa Mazlakava bay. Ka ta ŋgə hwar fe yey bay, yey, masa ya dapa daŋgay mafay tata nesey. Amaa ɓəs marga hay eve yey mafay ta Labara mambəla ana ava magas vaw fa gədaŋ mazlakava ta Zlav

⁹masa ka mbəlandakwa avəda, ka zalandakwa, anda da tərakwa ka ndah tata. A ŋgiya ara nesey sə, mafay te mezlər tandakwa ta wafa bay, amaa mafay ta masa aŋga ta waya va mambəla ana tata. Dəga vavara malama bay heley sə, Zlav ka wal mapəsafandakwa ma mafay te mezlər masa Yesu Kəristi a ta ŋgiya.

¹⁰Təlam nesey, mapəs ma ana ka husakata cay, afa Yesu Kəristi, nda mambəlandakwa, ke ŋguzdek vaw. Aŋga sə, ka sasarafa maməcay, ke ŋguzdek mesfeney va manjah katar ka midakw jaka pa Labara mambəla ana.

¹¹Zlav ke peɗiyey ka maslaŋ tata, afa ya da bəzad Labara mambəla ana nesey, ye de sesərekeceney.

¹²Wala, ya ɓəs marga ana hay nesey sə, mafay ana. Amaa hwar e kəɗiyey mafay ana aabay, afa ya sən nda masa ya ka paɗ makəsparav aɗaw da yaŋ ana. Ya səniya eve metehwe ana, Zlav aŋga ava gədaŋ ta majəɗ Labara mambəla ana masa aŋga ta gərawa pa ha aɗaw sə, kasl pe mendəvey ana.

¹³Təhaza mesesərek hay masa ka ta cəna de vereyey ara mececeley dapa manjah takaa dapa makəsparav va mawal vaw masa maŋgat dapa macam vaw ava Yesu Kəristi.

¹⁴Mesesərek hay mambəla ana masa ka ta cəna nesey sə, pafa leŋgesl mambəla ana ava gədaŋ te Mesfen Mavəna masa aŋga dapa andakwa.

¹⁵Ara masa ka səniya ndah dapa vavara ta Azi fakwanay ac ke gərdeyey. Kwa Figelus va Hermawzen ac ke gərdeyey may.

¹⁶Amaa ta Awnesifar sə, pas mekele e dekey e viyey gədaŋ, kwa ka ŋgə hwar fəma ta ndana hay te medek wuzeɗiyey dapa daŋgay sə, aabay. Da lada sə, Bay Mazlakava de ŋgefec metekwen fa ndah da hwaɗ ta way tata.

¹⁷Amaa sesəker mehusek tata pe berne ta Rawma fana sə, ke yehiyey ava matəhaz rav, ke ŋgetiyey avəda.

¹⁸Ka səniya mambəla ana, aŋga sə, ke jəniyey mabay dapa masa ya dapa berne te Efez. A lada Bay Mazlakava da ŋgafa metekweney pas ta mavan ma ta ndana hay.