Read Cuvok 2 Timawtey 2 Bible Online

2 Timawtey 2 - Cuvok bible

2 Timawtey 2

¹Kaa wat aɗaw, jaha vaw dapa mambəla ana ta Zlavay jaka pa Yesu Kəristi.

²Ma hay masa ka ta cəna de vereyey meendey ta ndana hay mabay mata yaw da yaŋ ana sə, gəraɗ pa ha ta ndah maŋga mezlər eve cəvey ana masa ac ta zlafa mesesərekecen kad ndah mekele saya may.

³Ɓəs marga hay masa a ŋgatafakaa ara kafaraŋ te Yesu Kəristi mambəla ana.

⁴Daha kafaraŋ mambəla ana, masa aŋga dapa vəram, a wal mazlakava tata da hahəmiya sə, kwa a wulak yaŋ eve jene mekele aabay, say ava vəram ana ŋgesey.

⁵Ara aŋga ana dapa kwakwarɗa, nda masa a hway, daha ka nahda yaŋ kad pa kwakwas ta mahway ana aabay sə, a zlafa maŋgat jene mafay ta masa ka fəna ndana hay sə, aabay.

⁶Nda te mehəvey, masa a sə marga mabay dapa mezlər tata. Efes da lada sə, ma ta caka mandə jə te mehəv tata macaaca ana sə, aŋga ana ɗagay.

⁷Ka cəna ma masa ya ta gwaɗakaa na biba. Ara nesey, Bay tandakwa Mazlakava a ta vakaa leŋgesl ta mapanakaɗ ma ana fakwanay.

⁸Sənafa Yesu Kəristi, nda dapa tərsam ta bay Deevet. Yesu masa ka pərakata dapa maməcay, ara Labara mambəla ana masa ya bəzadiya nesey te gweɗey,

⁹ya sə marga hay dapa daŋgay nesey sə, mafay ta Labara mambəla ana. Ac ke jeweyey ava jajarɓay fana dapa daŋgay ara ya nda makar mazlana uway ta ndana hay. Amaa ma ta Zlavay sə, majawa aabay.

¹⁰Mafay ana, ye ɓəsec marga ana hay fakwanay mafay ta ndah masa Zlav te yeheɗec ha sə, afa aca ra ŋgat membəley dapa Yesu Kəristi va manjah dapa slam mawaɗa katar ka midakw.

¹¹Ma hay masa ya ta gwaɗakaa nesey sə, ac ma hay metehwe ana: «Daha andə ka məc tandakwa ava Yesu sə, andə ta ŋgatakwa mepərekey ka ta njah eve ndey ava aŋga ana may.

¹²Daha andə ka ɓəsakwaɗ marga hay avəda ava aŋga sə, andə ta ŋgakwa bay da yaŋ jene hay fakwanay ava aŋga ana may. Amaa daha anda gwaɗakwa, anda sənakwa bay sə, aŋga may, e te gweɗey, a sənandakwa bay.

¹³Kwa daha anda gərakwaɗ ma tata, amaa aŋga sə, a gərda ma tata aabay, afa a zlafa meŋgə jene wal ava ma masa aŋga te gweɗey sə, aabay.»

¹⁴Sləfecen ma hay masa ya ta gwaɗakaɗ nesey kad ndah dərziya. Ɓeɓəcec ava gədaŋ fəma ta Zlavay, aca ra gərda mapay hay, afa a jəna nda aabay, say mazə ndah macəka zləmay fa ma ana hay ŋgesey.

¹⁵E ŋgə gədaŋ te meŋguzdek yaŋ takaa ka nda masa aŋga mak ta maŋgat mehehəm fa yam te ndey ta Zlavay, ara nda maŋga mezlər masa a ŋgə hwar fe mezlər tata aabay va mabəzad ma metehwe ana kad ndana hay eve cəvey ana.

¹⁶Meŋgə baazlam hay masa taambəla sə, ke te kezl pa bay. Ndah maŋga baazlam ana ara ŋgesey sə, ec te dey fəma fəma ava madaɓa dəreŋ ava Zlavay.

¹⁷Ma tec masa ac ta gwaɗiya ŋgesey sə, e ŋgweŋguɓey ara mbəlek masa gwerleŋ dapa. Himeney va Filetus ac deveŋ ndah ana ŋgesey.

¹⁸Ac ke zlekec dapa metehwe ana, aca ŋgal ma ava megweɗey, Zlav ke pərekek ndana hay avəda dapa maməc cay. Ara nesey, ec ke zlekdec ndana hay gaa dapa makəsparav.

¹⁹Eve metehwe ana, sek ta way masa aŋga ava gədaŋ, masa Zlav ta tatəhiya ava ha tata sə, a ta vay mabay. Mavinda fe sek ta way ana, gege: «Bay Mazlakava a sən ndah tata.» Mavinda saya, gege: «Kwa waawa mazala mezel ta Bay Mazlakava sə, say a gərda meŋgə jene hay mambəla ana aabay.»

²⁰Da way ta nda mazlakava sə, maŋgat maŋgam hay ta gənaɓ va ta ɓəray babəla bay. Amaa ta hap va ta rəɓasl hay ɓa. Ŋgeɗ hay ac mapa ke te ŋgə mezlər ava aŋga pas ta macunam hay, ŋgeɗ hay ac mapa ke te ŋgə mezlər ava aŋga pas mafalaŋ hay.

²¹Nda masa ka pana yaŋ tata dapa jə maləza hay nesey sə, a ta njah ara maŋgam masa mapa ka pas ta macunam hay, aŋga mapa ha wal ke te ŋgə mezlər ta bay ta way va te meŋgə mezlər hay mambəla ana fakwanay.

²²Hwaɓa dəreŋ fe jə mambəla ana hay aabay masa e wefec wudeh gawla hay, yah meŋgə mezlər eve cəvey ana, makəsparav, mawal nda, manjah dapa metehey ava ndah macana mbahw kad Bay Mazlakava ava rav tec mapana.

²³Amaa ndah masa aca tə yaw hay saw sə, ŋgəlec vaw. Ka səniya, matə yaw saw sə, e hwedek meŋgə gada.

²⁴Nda maŋga mezlər ta Bay Mazlakava sə, a lada da pay bay, de welec ndana hay fakwanay. A lada a zlafa mesesərekec ndana hay va maɓəs mahuraslə ma hay mekele mekele fəma tata.

²⁵Da lada sə, e sesərekec ndah masa aca gwam ka kəs ma tata bay sə, eve leŋgesl eve leŋgesl. Masəniya wa, gəla ac ta ŋgwada rav teceŋ ka ta sən metehwe ana,

²⁶ac ta ŋgata leŋgesl tec avəda mambəla ana, ec te mbəlec dapa gadaŋ ta bay ta haalay masa aŋga te təhezekeceŋ ke te ŋgec jə masa aŋga ta waya.