Read Cuvok 2 Timawtey 3 Bible Online

2 Timawtey 3 - Cuvok bible

2 Timawtey 3

¹Səna ma na mambəla ana, dapa mamaɗ yaŋ ta pas hay sə, manah hay masa marga dapa sə, ec te ŋgey,

²afa ndana hay ac ta yah meŋgə jə masa mawulak yaŋ tec ta waya war, ac ta wal səlay elehey, ac ta ŋgə həɓa va magal yaŋ, ac ta laf Zlavay, ac ta ŋgaŋgar papaŋ va mamaŋ tec hay, ac ta sən meŋgə wasay kad ndana bay, ac ta nah yaŋ kad pə ma ta Zlav ɓasabay,

³ac ta wal nda ɓasabay, ec te ŋgə metekwen fa ndana ɓasabay, ec te ŋgə mbaɗa mbaɗa fa ndana hay, ac ta kət yaŋ tec ɓasabay, yaŋ tec a ta sasalata, ec te tərec ka maslagəra te jə mambəla ana,

⁴ac ta ŋgwad nda ava ma hay, ec te ŋgə jene hay saw, həɓa e te həɗezlecen ndey avəda, ac ta wal Zlav sabay, amaa ac ta ŋgə sə, say jə masa e wefeceŋ.

⁵Ac ta pə yaŋ teceŋ ara ac ndah ta Zlavay, amaa ac ta laf gədaŋ mazlakava ta Zlavay ana. Ŋgəlec vaw ndah ana ŋgesey dəreŋ,

⁶afa ndah dərziya deveŋ eceŋ, ec te sehwey kad way ta ndana hay ke te fəcec ŋgwazah dərziya maŋga mebərey kad pa səfa teceŋ, ŋgwazah masa mawulak yaŋ tec e hwedec kad pe jene hay masa ac ta waya fakwanay,

⁷cəɗem cəɗem, ac dapa masasərak jene, amaa aca zlafa macəna metehwe ana bay.

⁸Ara masa Yanes va Yambares zleezle ta cənan ma ta Muyiz bay, ara aŋga ana, ndah ana hay ŋgesey sə, ac ta cənan ma te metehwe ana aabay may. Ndah ana ŋgesey sə, leŋgesl tec matərwaɗa, dapa makəsparav sə, ac ara jene taambəla.

⁹Amaa ac ta zlafa medə fəma fəma aabay, afa merezlə tec ŋgesey sə, a ta ŋguzdakata a vəda kad ndana hay fakwanay, ara mawulak yaŋ ta ndah ecew nesey te ŋguzdek zleezle.

¹⁰Amaa kaa sə, ka ka cəpiyey dapa mesesərekey aɗaw, dapa manjahay aɗaw, dapa maləmad vaw aɗaw hay, dapa makəsparav aɗaw, dapa mepəsek aɗaw, dapa mawal nda, dapa majah vaw aɗaw,

¹¹dapa masa ndana hay te ŋgediyey hahar, dapa marga hay masa te ŋgetefiyey dapa berne ta Antakiya, ta Ikawniya va ta Listira. Aŋga, ec ke ŋgediyey marga mabay, amaa Bay tandakwa Mazlakava ke mbəlekiyey avəda dapa ha teceŋ.

¹²Yaw, kwa waawa masa a wal manjah dapa melel fa Zlavay ava macam vaw ava Yesu Kəristi sə, cama ndana hay aca ŋgada marga.

¹³Amaa ta ndah maŋga jə mambəla ana aabay va ndah mafəca nda hay sə, manjah tec e te dey fəma fəma dapa meŋgə jə mambəla ana aabay. Ac ta fəc ndah dərziya va yaŋ teceŋ saya may.

¹⁴Amaa kaa sə, zlec mambəla ana da yaŋ ma masa ka ta cəna va ma masa ka ta kəsiya ara jə masa metehwe ana. Ya gwaɗakaa ara nesey, afa ndah masasərakakaɗ sə, ke səneceŋ.

¹⁵Dəga ka wat, ka sən Ma hay Mavəna. Ma ana hay ŋgesey, ac ava gədaŋ ta mavakaa leŋgesl te meven jene hay masa a hwad nda kad pe membəley jaka pa makəsparav masa dapa Yesu Kəristi.

¹⁶Ma hay masa Mavinda fakwanay dapa Ɗelewer mavəna sə, ece dek da vara Zlavay. Ma ana hay ŋgesey aca jəna nda ka ta sasərak nda, ke te ŋguzdek mezlek ta ndana, ka ta kət nda dapa mebər tata va masasərak nda dapa manjah masa a wafa Zlavay,

¹⁷afa nda maŋga mezlər ta Zlavay da ləmada vaw tata mambəla ana va majaw vaw ke te ŋgə mezlər hay fakwanay mambəla ana.