Read Cuvok 2 Timawtey 4 Bible Online

2 Timawtey 4 - Cuvok bible

2 Timawtey 4

¹Ya nəkafakaa fa yam te ndey ta Zlavay va te Yesu Kəristi masa e te dekey ke te təɗec ma yaŋ ndah eve ndey va ndah maməca dapa mezel te mevehek te Kəristi va meŋgə bay tata,

²bəzad ma ta Zlavay kad ndana hay, kwa e wefeceŋ, kwa e wefec bay, bəzedecen ma ana cəɗem cəɗem jaŋgata. Ŋguzdecen mebər teceŋ, peyefeceŋ, vec gədaŋ eve mepəsek gaa jaka pa mawulak yaŋ te mesesərekeceŋ.

³Eve metehwe ana, pas ana e te dekey masa ndana hay ac ta wal macak zləmay fe mesesərek metehwe ana sabay. Amaa ac ta cəp mawulak yaŋ tec hay mambəla ana aabay. Ac te kwesek ndah gaa ke te sesərekec jene hay masa aca wal macak zləmay kad pa.

⁴Ac ta cak zləmay fe metehwe ana sə, ɓasabay, ac ta cak zləmay sə, sesəker fa maɗay hay masa saw.

⁵Amaa kaa sə, paɓa leŋgesl fə yaŋ takaa dapa jene hay fakwanay. Ɓəs marga masa aŋga ta ŋgatafakaa, bəzedec Labara mambəla ana kad ndana hay, e ŋgə mezlər takaa masa Zlav ta vakaɗay kasl pe mendəvey ana.

⁶Taaɗaw sə, mesfeney aɗaw a ta vata kad Zlav ara jə te meŋgə kwakwas, pas ta maməc taaɗaw ka husakata cay.

⁷Ya ka ŋgə vəram mambəla ana, ya ka ndəvda mahway aɗaw, ya ka təhaza makəsparav aɗaw.

⁸Dəga təlam nesey, Zlav ka raɓawa meyəv te mezlərey aɗaw ha, afa ye ke ŋgə mezlər ara aŋga ana. Bay Mazlakava nda ma ta təɗana ma yaŋ ndana hay ara aŋga ana a ta vuwa pas masa e te vehekey ke te təɗec ma yaŋ ndana hay. A ta viya ana sə, kad yey amta bay, amaa kad ndana hay fakwanay masa aca wal e de vehekey.

⁹E ŋgə gədaŋ te medekey, ŋgetefiyey təlam nesey,

¹⁰bəna Demas ke gərdeyey, afa a wal jene hay ta vavara elehey. Ka data pe berne ta Tisalawnik. Kəreskes ka data a Galat, Tit ka data a Dalmasi.

¹¹Lukas magəra pal aŋga amta de vereyey. Kəsek Markwas, medek ava aŋga cuweeney kad vereyey, afa e te jəniyey mabay dapa mezlərey aɗaw.

¹²Ya ka zlarda Tisek a Efez.

¹³Daha ke te dekey sə, kəsek rəkwat te memeɗ aɗaw masa ya ta gərda da Turwas vara Karpus ŋga daha. Asaya, kəsek ɗelewer aɗaw hay ɓa, mahwalhwala ana ɗelewer masa maŋga ava mbal.

¹⁴Alekzandərus, nda mavəɗa ɓəray ŋgesey, ka caka meŋgefiyey suwe mabay. Bay Mazlakava a da pəlan meyəv tata masa aŋga ta ŋgiya mambəla ana aabay ŋgesey.

¹⁵Kaa may, pə leŋgesl fətiya, afa ma masa andaw ta sasərakakwa kad ndana hay sə, a wal kwa ndana da kəsiya bay.

¹⁶Masa ece hwediyey macaaca ana kad fəma ta ndah mavəna ma ta ndana hay, afa ya da mbaɗ ma aɗaw sə, kwa ndana ke dek jəniyey aabay. Ndana hay fakwanay ec ke gərdeyey. A lada sə, Zlav de ŋgedec marga bay.

¹⁷Amaa Bay Mazlakava sə, ke gərdeyey aabay, ke piyey gədaŋ tata fa vaw aɗaw, afa ya da bəzad Labara mambəla ana fakwanay kad ndah masa Zuwef hay bay aca ra cəna. Bay Mazlakava ke mbəliyey avəda dapa ma ta mabar[3].

¹⁸Ya səniya, Bay Mazlakava e te mbəliyey avəda dapa jene hay mambəla ana aabay fakwanay, e te mbəliyey avəda kad pa Wunam ta bay tata da baymaləvaŋ. Da lada sə, ndana hay aca ra hahəmaw katar ka midakw. E de ŋgey!

¹⁹Gweɗefec Pəriska[4] va mawula Akilas va ndah da way ta Awnesifar may.

²⁰Erastus sə, ka njahata dapa berne te Kweriŋtiye. Ya ka gərda Tərawfim de Miltus, afa aŋga gwabay.

²¹Vesek vaw te medekey wagaa kiya te memeɗ e te dekey. Ebulus, Pudeŋs, Linus, Kəlawdiya va malamaŋ va dəmaŋ hay dapa Macam yaŋ ta ndah ta Zlavay fakwanay fana aca gwaɗafakaa.

²²A lada Bay Mazlakava da njah eve leŋgesl takaa. A lada mambəla ana ta Zlavay da njah ava akwar fakwanay.