Read Cuvok Tit 1 Bible Online

Tit 1 - Cuvok bible

Tit 1

¹Yey Pawl, nda maŋga mezlər ta Zlavay va maslaŋ te Yesu Kəristi. Zlav ke zlerdeyey ke te helekec ndah tata masa aŋga te peleceŋ kad pa makəsparav va masən ma masa metehwe ana da yaŋ Zlavay. Ma ana sə, e te sesərekec ndana hay aca ra njah ara masa Zlav ta waya.

²Ara nesey, ndana hay ac ta səniya eve metehwe ana, ac ta ŋgat manjah katar ka midakw. Anda sənakwa mambəla ana sə, afa zleezle masa Zlav ka lam vavara aabay heley sə, ke gweɗey, a ta vandakwa manjah katar ka midakw. Zlavay sə, a ŋgal ma aabay,

³ke ŋguzdek manjah katar ka midakw ana dapa pas masa aŋga ta piya zleezle. Ara nesey, ya bəzad ma masa aŋga te gweɗiyey kad ndana hay. Ke viyey mezlər ta mabəzad ma tata ana may. Ara nesey, ya bəzad ma ana kad ndah mekele, afa Zlav nda mambəlandakwa te gweɗiyey ta mabəzad ma ana.

⁴Ya vində leeter ana nesey sə, kad kaa, Tit. Kaa masa ka ka tərata ka wat aɗaw eve metehwe ana, afa ka ka kəs ma te Yesu Kəristi ara yey. Da lada sə, Zlav Papaŋ tandakwa va Yesu Kəristi, nda mambəlandakwa ac da pəsafakaa ma va manjahaɗakaa dapa metehey.

⁵Ya ka gərdakaa de Kəret ka ta ləmad mezlər hay magəra te meləmedey va ka ta pə mesnendə te mezlər hay dapa Macam yaŋ ta ndah ta Zlavay fa wunam ana, fa wunam ana fakwanay ara masa ya ta gwaɗakaa.

⁶Kwa waawa teceŋ da njah aŋga nda masa ma da yaŋ ana aabay, aŋga nda masa ka kəs ŋgwaz amta. Wudeh tata, ac makwaɗma hay. A lada ndana de jewec ava ma hay mafay ta manjah tec mambəla ana aabay bay, daha aabay da yaŋ magal yaŋ teceŋ bay.

⁷Yaw, mazlakava te mesnendə ta ndah te Yesu sə, aŋga nda maŋga mezlər ta Zlavay. Mafay ana, a lada aŋga nda masa ma da yaŋ ana aabay. A ta paɗ yaŋ tata ara a fəna ndah dərziya bay, a ta zəm rav saw bay, a ta van yaŋ tata kad pa wuzam bay, a ta ŋgə gada bay, a ta yah səlay eve cəv masa e teh bay bay.

⁸Amaa a lada aŋga sə, a kəs məlaŋ hay kad hwaɗ ta way tata mambəla ana, nda masa a wal meŋgə jə mambəla ana dapa manjah tata, nda mapana leŋgesl fe jene hay, nda maŋga mezlər eve cəvey ana, nda masa rav tata mapana. Asaya, aŋga nda malaləka[1] vaw tata fe jene hay masa ece teh bay,

⁹aŋga nda matəhaza mesesərek metehwe ana masa anda te sesərekecen kad ndana hay sə, pe leŋgesl tata. Ara nesey, a ta zlafa mevec gədaŋ kad malamaŋ hay dərziya eve mesesərekey ana. Asaya, kad ndah masa aca gwam ka kəs mesesərek ana bay sə, e te ŋguzdek mawulak yaŋ teceŋ ana ŋgesey mambəla ana aabay.

¹⁰Ndana hay gaa, aca wal manahda yaŋ tec kad ndah mekele bay, mahwalhwala ana, deveŋ Zuwef hay makəsparav. Aca gwaɗ ma hay saw, ece fəcec ndana hay.

¹¹Ke te vec cəv ta masasərak ndana hay sabay, afa aca zlaɓ ndah da hwaɗ ta way wula wula fakwanay, eve mesesərek tec hay masa ece teh bay. Ece sesərekec ndana hay sə, ma hay mambəla ana hay aabay, afa aca yah sə, mapəl meyəv teceŋ.

¹²Nda Kəret ana amta deveŋ eceŋ ɓa, aŋga kəleŋ. Nda ana, ke gweɗ zleezle, gege: «Kəret hay sə, ndah maŋgəla ma hay cəɗem cəɗem. Ac ara jə te ley hay masa suwe elehey, ac maslamayaɗ ana hay, ndah ana hay sə, aca yah jene kad hwaɗ tec babəla.»

¹³Ara masa aŋga te gweɗey sə, ma ana tehwe. Mafay ana, peyefec ndah masa magwaɗa ma hay saw ŋgesey, ava gədaŋ. Ara nesey, aca zlafa makəs ma metehwe ana pe leŋgesl teceŋ.

¹⁴Peyefeceŋ sə, afa aca ra gərda macak zləmay fa maɗay hay masa Zuwef hay ta kəriya saw ŋgesey. Asaya, ac ta nah yaŋ kad pa ma majawa ta ndah maŋgwadafa dəɓa ma metehwe ana ta Zlav bay.

¹⁵Jene hay fakwanay mapana da vara ndah masa rav tec mapana may. Amaa da vara ndah masa rav tec maləza, masa ece lel fa Zlav aabay sə, jene mapana de vereceŋ aabay. Ndah ana hay ŋgesey, leŋgesl teceŋ va mawulak yaŋ ta rav tec fakwanay maləza.

¹⁶Ece gweɗ, gege: «Aca sən Zlavay», anjəkar mezlər tec masa aca ŋgiya ŋgesey, e ŋguzdekec sə, aca sən Zlav bay. Ac ndah maləza, ac ndah mayaha ma. Asaya, aca zlafa meŋgə mezlər mambəla ana kwa amta bay.