Read Cuvok Tit 2 Bible Online

Tit 2 - Cuvok bible

Tit 2

¹Amaa kaa sə, sesərekecen ma metehwe ana da yaŋ Zlavay kad ndana hay ara ma ta Zlav te gweɗey.

²Gweɗec ndah masəfa hay sə, aca ra njah makwaɗma hay, ac ra njah ka ndah masa ndana hay ece nehecen yaŋ, ac da njah ka ndah mapana leŋgesl fe jene hay, ndah masasala dapa makəsparav, dapa mawal vaw va dapa mepəsek.

³Ara aŋga ana, gweɗec kad ŋgwazah masəfa hay may, aca ra ŋguzdek manjah tec mambəla ana ara Zlav ta waya. Ara megweɗey, ac ta ŋgə mbaɗa mbaɗa fa ndana bay, ac ta və yaŋ tec kad pa wuzam bay. Amaa aca ra və mamənak hay mambəla ana.

⁴Ece re sesərekecen mawal mawulah tec hay va wudeh tec hay kad ŋgwazah madəm hay.

⁵Ac da njah ka ŋgwazah mapana leŋgesl fe jene hay va fa manjah teceŋ. Aca ra pə leŋgesl fe jene hay da hwaɗ ta way teceŋ. Ac da njah ŋgwazah masa aca wal nda, masa ece cənecen ma ta mawulah teceŋ. Ara nesey, ndana mazlafa malaf ma ta Zlav ɓasabay.

⁶Ara aŋga ana saya may, vec gədaŋ kad wudeh gawla hay, aca ra njah ka wudeh masa ec eve leŋgesl mambəla ana dapa jene hay fakwanay.

⁷Kaa, Tit ava yaŋ takaa ana, ŋguzdec mececeley dapa mezlər takaa hay mambəla ana. Daha ke sesərek jene, sesərekecen metehwe ana, eve cəvey ana.

⁸Da lada sə, ma takaa hay fakwan mapana, afa ndana de hwehwer da yaŋ ana bay. Ara nesey, ke te pec hwar pe ndey ta maslagəra tandakwa hay, afa ac ta ŋgat cəv te megweɗ ma hay masa e teh bay da yaŋ andakwa ɓasabay.

⁹Kad ɓel hay sə, gweɗec aca ra nahda yaŋ kad bay ta way tec hay dapa jene hay fakwanay. Dapa mezlər tec fakwanay sə, aca ra ŋgə jə masa de wefec bay ta way tec hay. Asaya, ac ta tə yaw da yaŋ jene hay ava ta bay ta way tec bay.

¹⁰Ec te kərecen jə ta bay ta way tec bay. Amaa aca ra ŋguzdek yaŋ tec dapa meŋgə jene mambəla ana cəɗem cəɗem, afa bay ta way tec ec de kəsec ka ndah mambəla ana eve cəvey ana. Ara nesey, ndana hay ac ta nahda yaŋ tec fakwanay kad pe mesesərek da yaŋ Zlavay, nda mambəlandakwa.

¹¹Mambəla sə, ndah ta Zlavay aca ra ŋgə jə masa ya ta gwaɗakaa nesey, afa Zlavay ana ke ŋguzdek mambəla ana tata kad ndana hay fakwanay, afa e de mbəlec dapa mebərey.

¹²Zlav e ŋguzdek mambəla ana tata sə, afa a da vandakwa gədaŋ ta magərda semseme va mekekesl fe jene hay dapa vavara fakwanay. Asaya, anda da njahakwa ta pəsna eve leŋgesl mambəla ana, ndah maŋga mezlər eve cəvey ana, ndah masa ec eve melel fa Zlavay dapa vavara nesey.

¹³Ara nesey, anda njahakwa, anda ɓəlakwa pas mambəla ana masa Yesu Kəristi, nda mambəlandakwa e te vehekey, e te ŋguzdek gədaŋ tata. Aŋga sə, aŋga Zlav Bay tandakwa Mazlakava.

¹⁴Aŋga sə, ka zana mesfen tata avəda, ka məcata mafay tandakwa, afa a da mbəlandakwa dapa mebərey. Asaya, a da tərandakwa ka ndah masa ec eve mebər aabay, anda da njahakwa ka ndah tata, ndah mawal meŋgə mezlər mambəla anacəɗem cəɗem.

¹⁵Sesərekecen ma hay masa ya ta vindakaɗ na fakwan kad ndah macəkafakaa zləmay. Vec gədaŋ, peyefec ndah masa aca can ma bay, gweɗec ava gədaŋ masa Zlav ta vakaa fakwanay. Ara nesey, ndana a zlafa maŋgaŋgərakaa mafay te mesesərek takaa ana aabay.