Read Cuvok Ebəre hay 1 Bible Online

Ebəre hay 1 - Cuvok bible

Ebəre hay 1

¹Zleezle sə, Zlav ke gweɗec kad papaŋ ta papaŋ tandakwa hay dəɓa gaa, eve cəv hay mekele mekele jaka pa ma ta ndah mehwedek ma tata.

²Amaa təlam nesey, dapa pas ta mamaɗ yaŋ te jene hay fakwanay sə, Zlav ka gwaɗandakwa jaka pa ma ta Wudiya. Zlav ka paɗ ka nda ma ta cama jene hay tata fakwanay, aŋga masa e lemek jene hay dapa vavara fakwanay jaka vara vaw.

³Wudiya ana ŋgesey, aŋga te ŋguzdek meweɗ ta gədaŋ tata. Ke ŋguzdek Zlavay sə, aŋga meemey, a təhaz dərgazlav fakwanay pa ha tata jaka pa gədaŋ mazlakava ta ma tata. Ava dəɓa ta masa ka ndəvda mepenecen mebər ta ndana hay cay, ka njah da ha ta zam ta Bay Zlav da baymaləvaŋ.

⁴Wat sə, ka tərata ka nda mafəna maskəla hay, Zlav ka vana mezel mazlakava ana mafəna teceŋ.

⁵Yaw, kwa Zlav ke gweɗ kwa kad maskəla amta deveŋ maskəla tata hay masa: «Kaa sə, ka wat aɗaw, e zler dəga ta pəsna, ya papakw» sə, aabay. Asaya, kwa ke gweɗ masa: «Yey sə, ya ta njah ka papaŋ, aŋga sə, a ta njah ka wat aɗaw» sə, aabay may.

⁶Amaa dapa masa Zlav e te zlərek wudiya cəvandaw kad pa vavara sə, gege: «A lada maskəla hay ta Zlav fakwanay ece re kekəred fəma tata.»

⁷Da yaŋ maskəla hay sə, ke gweɗ, gege: «E tərec maskəla tata hay ke memeɗ hay, va ndah maŋga mezlər hay tata ke neneŋ ta kwakwaw.»

⁸Amaa da yaŋ Wudiya sə, ke gweɗ, gege: «Gwadadakw ta bay takaa, awa Zlavay, aŋga mapa katar ka midakw, meŋgə bay takaa da yaŋ ndana hay sə, aŋga mazlaca nduwak.»

⁹Ka ka wal meŋgə jene ara aŋga ana, jə masa e teh bay sə, ka ndarakaa. Mafay ana, awa Zlavay, Zlav takaa ka yahaɗakaa ha kad aŋga ava macəhakaa mal te mewesley fa yaŋ deveŋ mandala takaa hay.

¹⁰Asaya, gege: «Bay Mazlakava, melemek vavara dəga dapa mezlerey ana sə, kaa. Baymaləvaŋ sə, aŋga mezlər ta ha takaa.

¹¹Jeŋ ana hay na fakwanay ac ta ndəvata, amaa kaa sə, ka ta njahay. Vavara va baymaləvaŋ sə, ac ta nasata ara rəkwat mava,

¹²ka ta paɗiya ara mapaɗ rəkwat, aŋga, ac ta ŋgwadata ara rəkwat, amaa kaa sə, ka ta njahay ara nesey ana, mavay hay takaa, ec te ndəv aabay.»

¹³Kwa Zlav ke gweɗ kad maskəla amta deveŋ maskəla tata hay masa: «Dek njaha a ha ta zam aɗaw, ye de peɗec maslagəra takaa hay a hwaɗ ta ha takaa» sə, aabay.

¹⁴Naa maskəla hay fakwanay sə, ac mesfen hay maŋga mezlər ta Zlavay, masa e zlərdeceŋ ke te jənec ndah masa ac ta ŋgat membəley?